Amakorwa ga Abhatumwa 1

Amakorwa ga Abhatumwa bha Yeesu

Omusuukwa Teofiro, mukitabho kyani kya mbere, naakungʼoorera eguru ya amangʼana gonsego, ganú Yeesu yaakora na okwihigirya, okurwa kubhwambiro bhwa emirimu gyaye, 2 okuhikira orusiku runú yeenurwa okugya murwire. Hanú yaaringa akyari okwinurwa, yaabharagirirya abhatumwa bhaaye, bhanú yaaringa asoreri. Yaabharagirirya kwa enjira ya Omutima Omurabhu, eguru ya emirimu ginú bharikora. 3 Hanú yaamara okukwa na okuhyuka, Yeesu yaaringa arabhakomererya abhatumwa bhaaye, mara kaaru na kwa ebhimanyiiriryo ebhyaru ega, maheene m-muhoru. Kwibhaga rya eginsiku mirongo ena, yaaringa areeyorokya na yaabheehigiryanga amangʼana eguru ya obhukama bhwa Waryubha.

4 Orusiku rumwi, Yeesu hanú yaaringa asikeeni hamwi na abhatumwa bhaaye, akabhakaanʼya ega, “Mutakaarwa mumugi gwa Yerusaremu. Muganye muyo, okuhikira hanú murinyoora Omutima Omurabhu, unú Taata yaabharaga, na oni naaringa mbakeererye. 5 Yoana Omubhatiiji, yaabhatiijanga abhantu kwa amanji, nawe, kwibhaga rya eginsiku nkego, bheenyu muribhatiijwa kwa Omutima Omurabhu uyo.”

Yeesu areenurwa okugya murwire

6 Eribhaga erindi, abhatumwa bhayo hanú bhaaringa hamwi na Yeesu, bhakamubhuurya ega, “Omukuru, eribhaga rinu ndyo oribhahindirya Abhaisiraeri obhukama bhwabho?” 7 Akabhakyukya ega, “Taata kwa obhutungi bhwaye omwene, yaamura ega, n-duuha gariibhuka. Bheenyu mutakwenderwa okumanya eribhaga na orusiku rwa gayo. 8 Nawe, murinyoora eginguru hanú Omutima Omurabhu aribhaajira, muribha abheemiririri bhaani Yerusaremu, mbaara gyonsego gya Yudea, na Samaria, okuhikira kubhuteero bhwa ekyaro.”

9 Yeesu hanú yaamara okubhakeerya abhatumwa bhaaye gayo, bhonsego bhaaringa bhamumaahiriri. Rumwigo, akeenurwa okugya murwire. Erisaaru rikamukundikirya, bhataamurora kweki. 10 Hanú bhaaringa bhakyatungʼaariri erisaaru riyo, rumwigo, abhantu abhabhiri bhakeemirira haangʼi nabho! Abhantu bhayo bhaaringa bheebhoheri emyenda emirabhu pee. 11 Mbe, bhakabhabhuurya ega, “Bheenyu, abhantu bha Gariraaya, ndeegwa mwimiriiri hanu, enu mumaahiriri murwire? Yeesu uyo yeenwirwe okurwa kubheenyu, okugya murwire, ariija kweki egoego, kya ego mumuruuji aragya.”

12 Kimwi, abhatumwa bhakareka munkuku ya Emijeituni, bhakahunjuka Yerusaremu. Haaringa haangʼi, orugendo rwa muna ekirometa eimwi ego. 13 Bhakasoha mumugi, bhakagya bhakasoha mukinyumba muginyumba ginú giikarireeni, hanú bheekaranga-mo. Abhatumwa bhayo bhaaringa, Petero, Yoana, Yakobho, Andurea, Firipo, Tomaso, Bhatoromayo, Mataayo, Yakobho omumura wa Arifayo, Simoni oumwi wa ekyama kya Abhajeroote, na Yuda omumura wa Yakobho. 14 Bhayo bhonsego, bheekumanʼyanga hayo, bhaamusabhanga Waryubha kwa omutima ogumwi, hamwi na Mariamu ngʼina waabho Yeesu, na abhakari abhandi, na abhamura bhaabho Yeesu.

Matia arasorwa okubha omutumwa

15 Kuginsiku giyo, abheekirirya bha Yeesu bhanú bhaaringa bheekumeenʼye muyo, bhaaringa muna egana rimwi na mirongo ebhiri (120). Mbe, Petero akeemirira gati yaabho akagamba ega, 16 “Abhahiiri bhaani kuimani, amangʼana ganú gaangʼoorwa mu Mangʼoore Amarabhu eguru ya Yuda, geenderwanga gakoreke. Amangʼana gayo gaagambwa na Omutima Omurabhu okuhitira kumukama Daudi, eguru ya Yuda unú yaahira abhantu bhanú bhaagwata Yeesu. 17 Weeki, yaaringa omutumwa omurikyetu, twaringa tuheerwe emirimu ginu hamwi.

18 “Yuda yaagura omugunda kwa egimbirya ginú yaanyoora okurwa kukikorwa kyaye ekibhiibhi. Kimwi, akagwa mumugunda muyo bhwibhumbike, akabhaaruka enda, obhura bhonsego bhukeetika kibhara. 19 Eringʼana riyo, rikamanyikana kubhamenyi bhonsego bha Yerusaremu. Kwa ego, omugunda guyo, bhakagutoga eriina mukigambo kyabho ega, Hakeri Dama, ensonga yaaye niiga, Omugunda gwa Amanyinga.”

20 Mbe, Petero akagendererya okugamba amangʼana ganú gaangʼoorwa mukitabho kya Egijabhuri eguru ya Yuda, ega,

“‘Omugi gwaye gutigare eritongo,

omuntu wowonse, atariija okumenya-mo.’

Kweki, yaangʼoorwa ega,

‘Omuntu oundi agege omweya gwaye gwa emirimu gya obhutumwa.’

21 Ego, tureenderwa tusore omuntu oundi unú twasoorananga nawe, eribhaga ryonsego rinú Omukuru Yeesu yaaringa hamwi na bheetu, 22 okwambira hanú Yeesu yaabhatiijwa na Yoana, okuhikira okwinurwa kwaye okugya murwire. Uyo, araabhenga arabheerana na bheetu, okwimiririra obhuhyuki bhwa Yeesu.”

23 Mbe, bhakagamba amariina ga abhantu abhabhiri. Owa okwamba n-Yusufu, eriina erindi yaabhirikirwanga ega, Bharisabha, kweki erindi ega, Yusito. Na owa kabhiri, yaabhirikirwanga ega, Matia. 24 Hanú bhaamara, bhakamusabha Yeesu ega, “Omukuru, nuuwe omanyiri emitima gya abhantu bhonsego. Kwa ego, turakusabha otoorokye, ngʼ-uuha osoreri gati ya abhabhiri bhanu, 25 naho agege omweya gwa emirimu gya obhutumwa ginú Yuda yaatiga. Weeki hanú yaakwa, yaagya ahasi hanú omururo gutakusima.” 26 Kimwi, bhakatema ekuura, ekuura ekasora Matia. Mbe, Matia uyo, akoongeribhwa kubhatumwa abhandi bharya ekumi na umwi.