Yeesu arahyuka
20
Kurusiku rwa okwamba rwa obhutuuro, nyenkyo juri, Mariamu Magidarena akagya kumbihira ya Yeesu. Akanyoora erigina rinú ryaringa riteerwe kumunwa gwa embihira, rihiringitiibhwe. 2 Mbe, akarwa-ho hayo nkenyo, akagya ku Simoni Petero na kumwihigira unú Yeesu yaaringa ahanjiri. Akabhakeerya ega, “Abhantu bharuusirye omubhiri gwa Omukuru weetu mumbihira, kora tutamanyiri enú bhaguteeri!”3 Mbe, Petero na omwihigira oundi uyo, bhakeemuka, bhakagya kumbihira. 4 Bhonsego bhabhiri bhaaringa bharakenya, nawe, omwihigira oundi uyo akakenya okukira Petero na akamukangatira okuhika kumbihira. 5 Akeehiinya, akasoomererya mumbihira, akarora ensanda endabhu inú bhaamubhiikira Yeesu, nawe, ataasoha munsi.
6 Mbe, Simoni Petero akamurwa enyuma, akahika harya, akasoha mumbihira na akamaaha ensanda endabhu inú bhaamubhiikira Yeesu. 7 Kweki akamaaha ekitambaara kinú bhaamubhoha Yeesu kumutwe. Kitaaringa hamwi na emyenda egindi, nawe, kyaringa kikunyirwe na okutuurwa embarika. 8 Kimwi, omwihigira oundi uyo, unú yaakangata okuhika hayo, wonse akasoha mumbihira. Akamaaha, akeekirirya, 9 onyoora bhaaringa bhakyari okumanya Amangʼoore Amarabhu ganú garagamba ega, Yeesu areenderwa ahyuke okurwa mubhaku. 10 Mbe, abheehigira bharya bhakagya iika owaabho.
Yeesu aramwibhukira Mariamu Magidarena
11 Nawe, Mariamu Magidarena yaaringa yeemiriiri haangʼi na embihira enu arakuura. Hanú yaaringa arakuura, akeehiinya akasoomererya mumbihira, 12 akabharora bhamaraikaa bhabhiri, bheebhoheri emyenda emirabhu. Bheekeeri hanú bhaaringa bhareerye omubhiri gwa Yeesu. Maraika oumwi yaaringa yeekeeri orubhaara rwa kumutwe, oundi yaaringa yeekeeri orubhaara rwa kumaguru. 13 Bhamaraika bharya bhakamubhuurya ega, “Ee maayi, kwaki orakuura?” Wonse akabhakyukya ega, “Abhantu bhagegeri omubhiri gwa Omukuru waani, kweki ntakumanya enú bhaguteeri!” 14 Hanú Mariamu yaagamba amangʼana gayo, akeekyukya, akamurora Yeesu yeemiriiri haryaharya, nawe, Mariamu ataamumanya.
15 Yeesu akamubhuurya ega, “Ee maayi, kwaki orakuura? Bhoono, oratuna-wi?” Mariamu akeeganirirya ega, omuntu urya yaaringa omukori wa emirimu mumugunda, akamukyukya ega, “Ee taata, nyoore nuuwe ogugegeri-mo omubhiri gwaye, nkeerya enú oguteeri, oni ngende okugugega.” 16 Yeesu akamubhirikira eriina yaaye ega, “Uuwe Mariamu!” Mariamu akeekyukya, akamurora Yeesu, akagamba mukigambo kya Ekiebhurania ega, “Rabhoni!” Rabhoni, ensonga yaaye niiga “Omwihigirya.” 17 Yeesu akamukeerya ega, “Otangwata, nkyari okugya murwire ku Taata. Mbe, genda obhakeerye abheehigira bhaani ega, ndagya murwire ku Taata, unú ni-Seweenyu, ku Waryubha waani, unú ngʼ-Waryubha weenyu.” 18 Mbe, Mariamu Magidarena akagya kubheehigira bha Yeesu, akabhakeerya amangʼana ganu, ega, “Maaha, oni mmuruuji Omukuru!” Kimwi, akabhatondera gonsego ganú Yeesu yaamuragirirya.
Yeesu arabheebhukira abheehigira bhaaye
19 Ekabha mugoroobha orusiku ruryarurya rwa okwamba rwa obhutuuro. Abheehigira bha Yeesu bhaaringa bheekumeenʼye munyumba eimwi na okusiika ebhiseku, kwa okubha bhaaringa bharabhoobhoha abhatungi bha Abhayahudi. Kora onyoora ebhiseku bhyaringa bhisiikirwe, rumwigo Yeesu akamaahikana kubhurabhu, na okwimirira gati waabho, akabhakeerya ega, “Omurembe gubhe na bheenyu!” 20 Yeesu hanú yaamara okubhakeerya gayo, akabhoorokya amabhoko gaaye na orubharu rwaye. Hanú abheehigira bhaamurora Omukuru, bhakajomerwa bhukongʼu. 21 Yeesu akabhakeeranʼya kweki ega, “Omurembe gubhe na bheenyu. Kya ego Taata Waryubha yaantuma oni, egoego na oni ndabhatuma bheenyu mukyaro hanu.” 22 Mbe, hanú yaamara okugamba gayo, akabhahuutira omwika, akabhakeerya ega, “Munyoore Omutima Omurabhu.b 23 Nyoore muraabhira abhantu obhusarya bhwabho, Waryubha wonse aribhaabhira obhusarya bhwabho. Nyoore mutakubhaabhira, Waryubha wonse ataribhaabhira.”
Yeesu aramwibhukira Tomaso
24 Omwihigira oumwi wa abheehigira bha Yeesu ekumi na bhabhiri bharya, eriina ryaye Tomaso, unú bhaamubhirikira ega, “Ekisare”, ataaringa hamwi na abheehigira abhandi hanú Yeesu yaabheebhukira. 25 Mbe, abheehigira abhandi bharya bhakamukeerya ega, “Bheetu tumuruuji Omukuru.” Nawe, weeki akabhakyukya ega, “Oni nyoore ntaarore ebhimoa bhya emisumaari mumabhoko gaaye, na okumukuunʼya ebhimoa bhiyo na ebhyara bhyani na okutuura okubhoko kwani kurubharu harya, ntakwikirirya kora ahake.”
26 Hanú gyahwa eginsiku munaane, abheehigira bha Yeesu bhakeekumanʼya hamwi kweki munyumba. Orusiku ruyo Tomaso wonse yaaringa hamwi nabho. Ebhiseku bhyaringa bhisiikirwe, rumwigo, Yeesu akamaahikana kubhurabhu, akeemirira gatigati waabho, akabhakeeranʼya ega, “Ndabhakeeranʼya. Omurembe gubhe na bheenyu!” 27 Mbe, Yeesu akamukeerya Tomaso ega, “Nuuje unkuunʼye na ekyara kyaho mumabhoko gaani. Kweki, unkuunʼye na okubhoko kwaho kurubharu rwani. Otagendererya okwanga okwikirirya, nawe wikirirye.” 28 Tomaso akamukyukya ega, “Omukuru waani na Waryubha waani!” 29 Yeesu akamukyukya ega, “Wikiriirye kwa okubha unduuji. Bhanonkerwe bhanú bhaanyikiriirye, kora nyoore bhatarandora.”
Ensonga ya ekitabho kinu
30 Yeesu yaakora ebhika ebhindi ebhyaru, bhinú abheehigira bhyaye bhaabhirora, bhinú bhitaangʼoorwa mukitabho kinu. 31 Nawe, ebhimanyiiriryo bhinú bhiringi mukitabho kinu, bhyangʼoorwa, naho mwikirirye ega, Yeesu ngʼo Kiristu Omutuurya,c Omwana wa Waryubha,d naho kwa okumwikirirya, munyoore obhuhoru kwa eriina ryaye.