Yeesu aramusabha Waryubha
17
Hanú Yeesu yaamara okugamba gayo gonsego, akamaahirira murwire, akasabha ega,“Ee Taata, eribhaga rihikiri. Obhoorokye abhantu obhukuru bhwa Omwana waaho, naho Omwana wonse abhoorokye obhukuru bhwaho kya ego bhuringi. 2 Ungʼeeri obhutungi eguru ya abhantu bhonsego, naho mbahaane obhuhoru bhwa koko bhonsego bhanú waangʼaana. 3 Obhuhoru bhwa koko mbo bhunu, abhantu bhakumanye uuwe, unú ngʼ-Waryubha owa heene omwenego, kweki bhamanye oni Yeesu Kiristu, unú waantuma kubheene. 4 Oni noorokerye obhukuru bhwaho kubhantu bhonsego mukyaro hanu, kwa okukunaanʼya emirimu ginú waantuma okugikora. 5 Ee Taata, ndasabha worokye obhukuru bhwani, obhukuru bhunú naaringa nabho eribhaga rinú twaringa hamwi, kora ekyaro kitarabhumbwa.
Yeesu arabhasabhira abheehigira bhaaye
6 “Ee Taata, nkutubhwiri kya ego oringi uuwe kubhantu bhanú ungʼeeri mukyaro hanu. Bheeki bhaaringa bhaaho, uuwe okangʼaana oni, bhonse bhagwatiri eringʼana ryaho. 7 Bhoono mbe, bhamanyiri ega, ebhintu bhyonsego bhinú waangʼaana, bhyarwa kuuwe, 8 kwa okubha mbakeererye gonsego ganú waankeerya, bhonse bhageekiriirye. Bhamanyiri obhuheene ega, naarwa kuuwe, kweki bheekiriirye ega, nuuwe waantuma. 9 Ndabhasabhira bhayo, ntakusabhira ekyaro, nawe, ndabhasabhira abhantu bhanú waangʼaana kwa okubha m-baaho. 10 Abhantu bhaani bhonsego, m-baaho, kweki abhantu bhaaho bhonsego, m-baani. Obhukuru bhwani bhumaahikeeni kubhantu, okuhitira kubhanú waangʼaana. 11 Oni ntaribha kweki mukyaro munu, nawe, bhoono ndaaja kuuwe. Nawe, bheeki bharigendererya okubha mukyaro hanu. Taata Omurabhu, ndakusabha obhaangararire kwa obhuturo bhwa eriina ryaho rinú ungʼeeri, naho bhabhe ekintu kimwi, kya ego oni na uuwe turingi ekintu kimwi. 12 Hanú naaringa hamwi nabho naabhaangararira kwa obhuturo bhwa eriina ryaho, rinú waangʼaana. Naabhaangararira bhujomu, naho ntabhurya kora oumwi gati yaabho, okutiga unú areenderwa okusikibhwa, naho gakunaane ganú gaangʼoorwa mu Mangʼoore Amarabhu.a
13 “Taata, bhoono ndaaja kuuwe. Oni ndabhakeerya abheehigira bhaani gonsego gayo, eribhaga nkyari mukyaro kinu, naho bhabhe na obhujomerwa bhwani bhonsego mumitima gyabho. 14 Mbakeererye abheehigira bhaani amangʼana ganú waangʼaana. Nawe, abhantu bha mukyaro munu bharabhabhihirirwa, kwa okubha bheeki bhataringi bha mukyaro hanu, kya ego oni ntaringi wa mukyaro hanu.
15 “Taata, ntakusabha ega, obharuusye mukyaro hanu, nawe ega, obhatuurye na omusarya urya Erisambwa. 16 Bheeki bhataringi bha mukyaro munu, kya ego oni ntaringi wa mukyaro munu. 17 Taata, ndakusabha obhakore okubha abhantu bhaaho kimwi, kubhuheene bhwaho, kwa okubha eringʼana ryaho ndyo obhuheene. 18 Kya ego waantuma oni mukyaro, egoego na oni mbatumiri bheeki mukyaro. 19 Niruusirye oni omwene kuuwe, kurusumo rwabho, naho bheeruusye kubhuheene bhwaho.
Yeesu arabhasabhira bhanú bharamwikirirya
20 “Ntakubhasabhira bhayo abheenego, nawe, ndabhasabhira kora bhonsego bhanú bharinyikirirya kwa ekisigo kya ganú abheehigira bhaani bhareehigirya. 21 Ndasabha ega, bhayo bhabhe ekintu kimwi. Taata, ndasabha bhabhe munsi weetu, kya ego uuwe oringi munsi waani, na oni ndingi munsi yaaho. Ndasabha ega, bhabhe ekintu kimwi, naho abhantu bha ekyaro bheekirirye ega, nuuwe waantuma. 22 Obhukuru bhunú waangʼaana oni, mbaheeri abheehigira bhaani, naho bhabhe ekintu kimwi, kya ego oni na uuwe turingi ekintu kimwi. 23 Oni mbe munsi waabho, kya ego uuwe oringi munsi yaani. Kwa ego, ndasabha ega, bhakunaane kubhumwi bhwabho, naho abhantu bhonsego bha mukyaro bhamanye ega, nuuwe waantuma, kweki bhamanye ega, obhahanjiri kya ego unhanjiri oni.
24 “Taata, ndeegomba ega, bhanú ungʼeeri bhabhe hamwi na oni hanú ndibha, naho bhabhurore obhukuru bhwani bhunú waangʼaana, kwa okubha waanhanja kora ekyaro kitarabhumbwa. 25 Taata wa heene, abhantu bha mukyaro munu bhatakumanyiri. Nawe, oni nkumanyiri, kweki abheehigira bhaani bhamanyiri ega, nuuwe waantuma. 26 Oni mbeehigiirye kya ego uuwe oringi, kweki ndagendererya okukora ego, naho bhahanjane kya ego unhanjiri oni, na oni mbe munsi waabho.”