Yoana 1

Amangʼana Amajomu ga Yeesu Kiristu

kya ego gaangʼoorwa na

Yoana

Engʼana yaaja mukyaro okubha omuntu

Kubhusimuka hayo, Engʼana yaaringa-ho. Engʼana uyo, yaaringa hamwi na Waryubha, Engʼana uyo, yaaringa Waryubha. 2 Okurwa obhusimuka, Engʼana uyo, yaaringa hamwi na Waryubha. 3 Ebhintu bhyonsego bhyabhumbwa okuhitira ku Engʼana uyo. Kitariho kora ekintu ekimwi kinú kyabhumbwa bira weeki. 4 Engʼana uyo, ngʼo obhusimuka bhwa obhuhoru, na obhuhoru bhuyo, mbo bhurareeta endingaasi kubhantu bhonsego. 5 Endingaasi iyo, erangʼarabha mukisunte, kora ekisunte kitaatura okuihiga.

6 Yeebhuka omuntu oumwi, unú yaatumwa na Waryubha. Omuntu uyo, yaabhirikirwanga ega, Yoana. 7 Yoana uyo, yaaja okwimiririra endingaasi iyo, naho abhantu bhonsego, bhature okuyiikirirya kwa okuhitira obhwimiririri bhwaye. 8 Weeki ataaringa endingaasi iyo, nawe, yaaja naho ayiimiririre. 9 Endingaasi eritinya iyo erangʼarabhira abhantu bhonsego, yaaringa eraaja mukyaro kinu.

10 Uyo ngʼo yaaringa mukyaro munu, kweki ekyaro kyonsego kyabhumbwa okuhitira kuweeki. Nawe, abhantu bha mukyaro bhataamumanya. 11 Yaaja kubhantu bhaaye, nawe, bheeki bhataamwikirirya. 12 Nawe, bhonsego bhanú bhaamuturuungʼana na okumwikirirya, akabhahaana obhuturo bhwa okubha abhaana bha Waryubha. 13 Bhayo bhataringi abhaana bha Waryubha, kwa okwibhurwa kwa enjira ya abhantu, kasi kwa orunamba rwa omubhiri, kora kwa obhwendi bhwa omuntu, nawe, n-kwa obhwendi bhwa Waryubha.

14 Mbe, Engʼana uyo, akabha omuntu, akeekara gati yeetu. Na bheetu tukarora obhukuru bhwaye, obhukuru bhwa Omwana omumwemwe wa Taata Waryubha. Yaaringa na eriruguto erinene na obhuheene bhonsego.

15 Yoana yaamwimiririra, akagamba kwa eriisi erinene ega, “Uyo ngʼo naaringa ndabhakeerya eguru yaaye ega, ‘Araaja omuntu oumwi enyuma yaani, omukuru okunkira oni, kwa okubha yaaringa-ho oni ntareebhurwa.’”

16 Okurekana na obhukunaani bhwaye, Waryubha atuheeri bheetu bhonsego eriruguto ryaye, kweki aragendererya okutoongerya eriruguto erindi. 17 Okurwa akare, Waryubha yaaruusya amaragiriryo gaaye, okuhitira ku Musa, na bhoono aruusirye eriruguto ryaye na obhuheene bhwaye, okuhitira ku Yeesu Kiristu. 18 Atariho omuntu unú yaakamuruuji Waryubha. Nawe, nu-Mwana waaye omumwemwe omwenego, weeki wonse ngʼ-Waryubha, aringi hamwi na Taata Waryubha, uyo ngʼo yaakora tukamumanya Waryubha.

Obhwimiririri bhwa Yoana Omubhatiiji

(Mataayo 3:1-12; Mariko 1:1-8; Ruuka 3:1-18)

19 Bhunu mbo obhwimiririri bhunú Yoana yaaruusya hanú abhatungi bha Abhayahudi bhaatuma abhasyengeri na Abharaawi okurwa Yerusaremu, bhagye ku Yoana bhamubhuurye ega, “Uuwe niwi?” 20 Akabhakyukya bira okubhisa obhuheene ega, “Oni ntaringi Kiristu Omutuurya.” 21 Bhakamubhuurya kweki ega, “Bhoono uuwe niwi? Uuwe nuuwe omurooti Eriya?” Yoana akabhakyukya ega, “Oni ntaringi Eriya.” Bhakamubhuurya kweki ega, “Uuwe nuuwe omurooti unú turaganyirira okurwa ku Waryubha?” Yoana akabhakyukya ega, “Ntaringi oni.” 22 Bhakamubhuurya kweki ega, “Bhoono uuwe niwi? Tukeerye, naho tugende tubhakeerye bhanú bhatutumiri. Uuwe oragamba egaki eguru yaaho uuwe omwene?” 23 Yoana akabhakyukya okurekana na amangʼana ganú omurooti Isaaya yaagamba, ega,

“Oni ngʼ-urya ‘omuntu unú aribhanga kukibhara araraarika kwa eriisi erinene ega,

Mwimye enjira inú Omukuru Waryubha arihita!’ ”

24 Gati ya abhantu bhanú bhaaringa bhatumirwe ku Yoana, bhaaringa-mo na Abhafarisaayo. 25 Bhakamubhuurya ega, “Nyoore uuwe otaringi Kiristu Omutuurya, kora omurooti Eriya, kora omurooti unú turaganyirira okurwa ku Waryubha, kwaki orabhatiija abhantu?” 26 Yoana akabhakyukya ega, “Oni ndabhatiija abhantu kwa amanji, nawe, gati yeenyu ariho omuntu unú bheenyu mutamumanyiri. 27 Uyo ngʼo araaja enyuma yaani. Ntakwenderwa kora okubha omugaya waaye, wa okusibhura egingoye gya eginkeeto gyaye.”

28 Amangʼana gayo, gaakoreka mumugi gunú gurabhirikirwa ega, Bhetania, orubhaara rwa bhuturira-ryubha rwa oruuji rwa Yorodani, ahasi hanú Yoana yaaringa arabhatiija abhantu.

Yeesu m-Mwana wa Eringʼondi wa Waryubha

29 Ejo wendeko, Yoana akamurora Yeesu aramuuja-ko. Akabhakeerya abhantu bhanú bhaaringa hayo ega, “Mumaahe, uyo ngʼo Omwana wa Eringʼondi wa Waryubha, unú aragega obhusarya bhwa abhantu bhonsego bha mukyaro munu! 30 Uyo ngʼo naaringa ndabhakeerya eguru yaaye ega, ‘Araaja omuntu oumwi enyuma yaani, omukuru okunkira, kwa okubha yaaringa-ho oni ntareebhurwa.’ 31 Kora oni ntaaringa mmanyiri ega, weeki niwi, nawe, niijiri okubhatiija abhantu kwa amanji, naho atubhurwe kubhantu bha Isiraeri.” 32 Nho, Yoana akeemiririra ganú yaaringa aruuji, akagamba ega, “Naarora Omutima Omurabhu, areetuuma okurwa murwire kya enguuti, na okwikara eguru yaaye. 33 Nawe, oni ntaaringa mmanyiri ega, weeki niwi, nawe, Waryubha unú yaantuma okubhatiija kwa amanji, ngʼo yaankeerya ega, ‘Omuntu unú orirora, Omutima Omurabhu areetuuma na okwikara eguru yaaye, uyo ngʼo aribhatiija abhantu kwa Omutima Omurabhu.’ ” 34 Hayo, Yoana akagamba ega, “Oni nduuji gayo gonsego, na bhoono ndeemiririra ega, uyo ngʼo Omwana wa Waryubha.”

Yeesu arasora abheehigira bhaaye bha okwamba

35 Ejo wendeko, Yoana yaaringa yeemiriiri hayo kweki, hamwi na abhabhiri gati ya abheehigira bhaaye. 36 Nho, akamurora Yeesu aragenda haangʼi nabho, akabhakeerya abheehigira bhaaye ega, “Mumaahe, uyo ngʼo Omwana wa Eringʼondi wa Waryubha!” 37 Hanú abheehigira bhabhiri bhayo bheegwa ego, bhakamuseeta Yeesu. 38 Yeesu akeekyukya, akabharora bharamuseeta. Akabhabhuurya ega, “Muratuna-ki?” Bheeki bhakamukyukya ega, “Ee Rabhi, oreekara-ha?” Ensonga ya eringʼana “Rabhi” niiga, “Omwihigirya”. 39 Yeesu akabhakeerya ega, “Muuje muharore.” Nho, bhakagya bhakarora hanú yaaringa areekara. Hanú bhaahika hayo, yaaringa ensa ekumi gya mugoroobha, bhakeekara nawe kwa orusiku ruyo.

40 Omwihigira oumwi gati ya abheehigira bhabhiri bhanú bheegwa amangʼana ga Yoana, bhakamara bhakamuseeta Yeesu, yaaringa arabhirikirwa Andurea, omumura waabho Simoni Petero enda eimwi. 41 Rumwigo, akagya okumutuna omumura waabho unú yaabhirikirwanga ega, Simoni. Hanú yaamunyoora, akamukeerya ega, “Tumuruuji Masiha!” Ensonga ya eringʼana “Masiha” niiga, “Kiristu Omutuurya.” 42 Kimwi Andurea akamuhira Simoni ku Yeesu. Yeesu akamumaahirira Simoni, akamara akamukeerya ega, “Uuwe n-Simoni, omwana wa Yoana. Nawe bhoono, oraabhirikirwenga ega, Kefa.” Eriina riyo, mu Kiyunani, n-Petero, ensonga yaaryo niiga, “Eritare”.

Yeesu arasora abheehigira abhandi bhabhiri

43 Ejo wendeko, Yeesu akaamura ega, agye mukyaro kya Gariraaya. Nho, akamurora Firipo, akamukeerya ega, “Njo, unsoorane.” 44 Firipo yaaringa omuntu wa mumugi gwa Bhetisaida, omugi gunú Andurea na Petero bhonse bhaaringa bhararwira.

45 Mbe, Firipo akamurora Natanaeri, akamukeerya ega, “Tumuruuji omuntu unú Musa yaangʼoora amangʼana eguru yaaye, mubhitabho bhya amaragiriryo, na uyo ngʼo abharooti bhonse bhaangʼoora amangʼana eguru yaaye. Eriina ryaye arabhirikirwa Yeesu wa Najareeti, omwana wa Yusufu.” 46 Nawe, Natanaeri akamubhuurya Firipo ega, “Ekintu kyokyonse ekijomu, kiratura okurwa mumugi gwa Najareeti?” Firipo akamukyukya ega, “Njo, orore.”

47 Hanú Yeesu yaamurora Natanaeri aramuuja-ko, akagamba eguru yaaye ega, “Mumaahe, omuntu uyo m-Mwisiraeri eritinya, ataana obhungʼeeningʼeeni.” 48 Natanaeri akamubhuurya Yeesu ega, “Ummanyiri egaki?” Yeesu akamukyukya ega, “Kora hanú Firipo yaari atarakubhirikira, oni naari nkuruuji wikeeri hansi mumuti gwa omutini.” 49 Natanaeri akamukyukya ega, “Rabhi, uuwe m-Mwana wa Waryubha! Nuuwe Omukama wa Isiraeri!” 50 Yeesu akamubhuurya ega, “Oreekirirya kwa okubha nkukeererye ega, nkuruuji wikeeri hansi mumuti gwa omutini? Orirora amangʼana agandi amarito okukira ganu!” 51 Kimwi akamukeerya ega, “Ndabhakeerya obhuheene ega, murirora orwire rusiikukiri, na murirora bhamaraika bha Waryubha bharariina na okwituuma kwa Omwana wa Adamu.”