Amangʼana Amajomu ga Yeesu Kiristu
kya ego gaangʼoorwa na
Ruuka
Obhukangati
1
Omusuukwa Teofiro, abhantu abhaaru bhakoreri ekituunyo kya okugangʼoora amangʼana garya gaakoreka gati yeetu. 2 Bhaangʼoora amangʼana ganú twakeeribhwa na bhanú bheerorera amangʼana gayo kwa ameeso gaabho, okurwa kubhwambiro bhwa emirimu gya Yeesu. Bhayo mbo, bhaaringa bharanyaraganʼya amangʼana gayo eguru ya Yeesu. 3 Oni nonse, neekomerye bhwaheene kya ego gaakoreka okurwa kubhwambiro. Naaruuji m-bujomu nkungʼoorere, naho 4 uuwe wonse, obhe na obhuheene bhwa amangʼana ganú weehigiribhwa.Obhurooti bhwa okwibhurwa kwa Yoana Omubhatiiji
5 Eribhaga rinú Herodea yaaringa omukama wa ekyaro kya Yudea, yaaringa-ho omusyengerib umwi, eriina ryaye yaabhirikirwanga Jakaria, wa omuganda gwa omusyengeri Abhia. Omukari waaye wonse, yaaringa wa oruganda ruyo rwa omusyengeri Harooni, eriina ryaye yaabhirikirwanga Jabheti. 6 Bhabhiri bhayo bhaaringa abhaheene embere ya Omukuru Waryubha. Bhaaringa bharagwata amaragiriryo gaaye gonsego, bira amasoro. 7 Bhataaringa bheebhwiri, kwa okubha omukari yaaringa omugumba, na bhaaringa bhariiri omuunyu mwaru.
8 Orusiku rumwi, rwaringa orwiru rwa omuganda gwa Jakaria okusyengera embere ya Waryubha. 9 Okuringʼaana na egimiira gya obhusyengeri, Jakaria akasorwa okusoha munyumba enkuru ya mwisyengerero rya Omukuru Waryubha,c amutuutire-mo ekurusu. 10 Jakaria hanú yaasoha okutuuta ekurusu, abhantu abhaaru bhaaringa bheekumeenʼye kibhara, bharasabha Waryubha.
11 Rumwigo, Jakaria akeebhukirwa na maraikad wa Omukuru Waryubha. Maraika uyo, akeemirira orubhaara rwa obhuryo rwa ahasi ha okutuutira ekurusu. 12 Jakaria hanú yaamurora, akeetakya, ee. Akoobhoha bhukongʼu.
13 Nawe, maraika uyo, akamukeerya ega, “Uuwe Jakaria, tiga okoobhoha! Ganú waasabhanga Waryubha, yeegwiri. Mukaaho Jabheti arikwibhurira omwana wa ekisaaja, orimutoga Yoana. 14 Omwana uyo, ngʼo arikora mubhe na obhujomerwa bhukongʼu na abhantu abhaaru bharijomererwa okwibhurwa kwaye. 15 Aribha omukuru, embere ya Omukuru Waryubha. Atarinywa edivaie kora amarwa agandi gogonse garya. Ariijuribhwa na Omutima Omurabhu,f kora akyari munda ya ngʼina waabho. 16 Arihindya abhantu abhaaru bha Isiraeri ku Mukuru Waryubha waabho. 17 Arimukangatira Omukuru, aseemye abhantu bhanú bhariija okumuturuungʼana, aryorokereribhwa na omutima na eginguru, kya egya Eriya.g Aribheegwanʼya bhesewaabho na abhaana, na bhanú bhataana egintungwa ku Mukuru Waryubha, aribhakora bhabhe nagyo bhwaheene.”
18 Jakaria akamubhuurya, “Ndeegwa, oni na mukaani turingi abhagotu! Eribha egaki twibhure omwana?”
19 Maraika akagamba ega, “Nooni Gabhurieri, unú ndeemirira embere ya Waryubha. Yantumiri enú oringi, niije okukukeerya amangʼana amajomu gayo. 20 Nawe, kwa okubha otakwikirirya amangʼana gaani, okwambira bhoono, orabha erimuumu. Okuhikira kwibhaga rinú amangʼana gayo garikoreka, otakutura okuhaira. M-buheene, garikoreka.”
21 Mbe, abhantu bhanú bhaaringa bharaganyirira Jakaria ahuruke kibhara, bhakaruguura kwa okurora kya ego yaatigita muyo. 22 Yaaja okurwa-mo, ataanagya kweki okugamba nabho, akaamba okubhoorokya na amabhoko. Rumwigo, bhakamanya aruuji obhurori munyumba enkuru ya mwisyengerero rya Waryubha. Wonse akagendererya okubha erimuumu.
23 Na eribhaga yaaringa amariri eginsiku gyaye gya okusyengera munyumba enkuru ya mwisyengerero rya Waryubha, akagya iika. 24 Eribhaga erindi, omukari waaye Jabheti akagega enda. Akamara emyeri etaanu yeebhisiri, akagamba ega, 25 “Omukuru Waryubha ngʼo yankoreeri ego! Nonse yanhiitukiri, yanduusirye eginsoni kubhantu.”
Obhurooti bhwa okwibhurwa kwa Yeesu
26 Enda iyo, hanú yaahikya emyeri esansabha, Waryubha akatuma maraika Gabhurieri kumugi gwa Najareeti mukyaro kya Gariraaya, 27 ahike kumuhara umwi unú yaaringa atarataara na omusaaja, eriina ryaye yaabhirikirwanga Mariamu. Omuhara uyo yaaringa arombeerwe obhuko na omusaaja umwi, eriina ryaye yaabhirikirwanga Yusufu, wa oruganda rwa omukama Daudi.h 28 Maraika uyo, akagya owa Mariamu, akamukeerya ega, “Ndakukeeranʼya, uuwe waanonkwa bhukongʼu! Omukuru Waryubha aringi hamwi na uuwe.” 29 Hanú Mariamu yeegwa amangʼana ga maraika uyo, enkoro yaaye ekeetanduka bhukongʼu, akeebhuurya, “Ni-nkeeranʼya-ki inu?”
30 Nawe, maraika uyo, akamukeerya ega, “Uuwe Mariamu, tiga okoobhoha, waanonkwa ku Waryubha. 31 Bhoono, oragega enda, wibhure omwana wa ekisaaja, omutoge Yeesu. 32 Aribha omukuru, aribhirikirwa Omwana wa Waryubhai wa eguru ya bhyonsego. Omukuru Waryubha arimuhaana kweki obhutungi bhwa omukama Daudi, jaaji waabho. 33 Na aribha Omukuru wa abhantu bhonsego bha Isiraeri, koko. Obhukama bhwaye, bhutarihwa kweki.”
34 Mariamu akamubhuurya maraika ega, “Eringʼana rinu riribha egaki, enu oni ntamanyiri omusaaja?” 35 Maraika akakyukya ega, “Omutima Omurabhu arikuujira, na obhuturo bhwa Waryubha wa eguru ya bhyonsego, bhurikukundikirya. Kwa ego, omwana unú oriibhura, aribha omwahurwa na aribhirikirwa Omwana wa Waryubha. 36 Na omuhiiri waaho Jabheti, unú bhaabhirikiranga omugumba, mubhugotu bhwaye bhuyo, yaagegeri enda, na omweri gunu n-gwa kasansabha. 37 Yaagegeri enda, kwa okubha ku Waryubha, ritariho rinú ritakuturika.” 38 Mariamu akakyukya, “Ndingi omugaya wa Omukuru Waryubha. Ebhe kuoni kya ego ogambiri.” Rumwigo, maraika uyo akagya.
Mariamu aragya okukeeranʼya Jabheti
39 Kuginsiku giyogiyo, Mariamu akaseemya orugendo, akagya bhwangu owa Jabheti, kumugi gumwi gwa kuginkuku gya Yudea. 40 Hanú yaasoha munyumba ya Jakaria, akakeeranʼya Jabheti. 41 Jabheti hanú yeegwa okukeeranʼya kwa Mariamu, omwana unú yaaringa munda yaaye, akahooya. Hayohayo, Jabheti akeejuribhwa na Omutima Omurabhu. 42 Akagamba kwa eriisi erinene ega, “Kubhakari bhonsego, uuwe nuuwe waanonkwa! Na omwana unú oriibhura, wonse yaanonkwa. 43 Oni niwi, kora ngʼina waabho Omukuru weetu uujiri okunkeeranʼya? 44 Hanú nigwiri okukeeranʼya kwaho, hayohayo omwana unú aringi munda yaani, yaahooya kwa obhujomerwa. 45 Uuwe waanonkwa, kwa okubha wikiriirye amangʼana ganú Omukuru Waryubha yaakukeerya garikoreka!”
Eriimbo rya Mariamu
46 Mariamu akagamba ega,
“Enkoro yaani, eramugungya Omukuru Waryubha,
47 erajomererwa Waryubha, Omutuurya waani,
48 kwa okubha, yanhiitukiri oni, omugaya waaye,
kora onyoora ndingi omuntu wa insi.
Okwambira bhoono, abhantu bha eginganda na eginganda,
bharaabhenga bharambirikira ega, owa enonkwe.
49 Waryubha wa Obhuturo, yankoreeri ekika,
na eriina ryaye ritakuhunkanibhwa na eriina erindi.
50 Aragendererya okwabhira abhantu bha eginganda na eginganda bhanú bharamwigwa.
51 Akoreri amangʼana amakuru kwa eginguru gyaye,
anyarageenʼye abha emitwe emikongʼu.
52 Yeetuumirye abhakuru kubhitumbi bhyabho bhya obhutungi,
abheesuuhya abheemukirye.
53 Abha omweko abheegutirye bhujomu,
nawe, abhaniibhi abhakenyerye amabhoko masa.
54 Abhabheereri Abhaisiraeri, abhagaya bhaaye,
kwa okuhiituka okubhaabhira.
55 Yaakoreri gayo kya ego yaaringa arageeni na Abhurahamu na bhajaaji weetu,
kora kubhantu bhonsego bha oruganda rwaye, koko.”
56 Bhoono, Mariamu akeekara owa Jabheti emyeri esatu, akamara akahunjuka owaaye.
Okwibhurwa kwa Yoana Omubhatiiji
57 Orusiku rwa okwibhura kwa Jabheti rukahika, akeebhura omwana wa ekisaaja. 58 Abhamenyani bhaaye na abhahiiri bhaaye, hanú bheegwa kya ego Omukuru Waryubha amwabhiiri, bhakajomerwa hamwi nawe.
59 Omwana uyo, hanú yaahikya orusiku rwa munaane, bhakaaja okumusaara. Bhakeenda bhamuhaane eriina rya esewaabho, Jakaria. 60 Kora ego ngʼina waabho akaanga, akagamba ega, “Tiigo-ha! Abhirikirwe Yoana.” 61 Bhakakyukya ega, “Ndeegwa, atariho omuhiiri weenyu, unú arabhirikirwa eriina riyo!”
62 Bhakabhuurya esewaabho, kwa okumoorokya na amabhoko, naho abhakeerye eriina rinú areenda okutoga omwana waaye. 63 Akabhasabha ekibhaau, akakingʼoora ega, “Eriina ryaye ngʼo Yoana.” Bhonsego bhakaruguura.
64 Rumwigo, omunwa gwaye na orurimi rwaye bhikanyoora obhuturo bhwa okuhaira kweki, akamukumya Waryubha. 65 Abhamenyani bhonsego bhakaruguura bhukongʼu. Eringʼana riyo rikamanyikana bhukongʼu kumigi gyonsego ginú giringi kuginkuku gya Yudea. 66 Bhonsego bhanú bheegwa, bhakabha bhareebhuurya, “Omwana uyo aribha omuntu wa egaki?” Bhaagamba ego, kwa okubha heene, Omukuru Waryubha yaaringa hamwi nawe.
Eriimbo rya Jakaria
67 Jakaria esewaabho omwana uyo, akeejuribhwa na Omutima Omurabhu. Akaruusya obhurooti ega,
68 “Omukuru Waryubha weetu wa Isiraeri agungibhwe,
kwa okubha yaajiri okututuurya bheetu, abhantu bhaaye.
69 Atuheeri Omutuurya owa eginguru okurwa kuruganda rwa omugaya waaye Daudi,
70 kya ego yaaringa amariri okugamba akare hayo, kwa enjira ya abharooti bhaaye abharabhu bha omutima.
71 Yaatukeerya ega, akaatutuurirye okurwa kubhasigu bheetu
na mumabhoko ga bhanú bharatubhihirirwa.
72 Akagamba ega, arihiituka eriraganoj ryaye erirabhu rinú yaakora na bhajaaji weetu,
na aribhaserenʼya.
73 Eriragano riyo, ndyo rirya yaateena kujaaji weetu Abhurahamu ega,
74 atutuurye okurwa mumabhoko ga abhasigu bheetu,
naho tubhe turamusabha bira obhoobha.
75 Kweki, tubhe abha egintungwa na abhaheene embere waaye, eginsiku gyetu gyonsego.
76 Uuwe omwana waani, oribhanga orabhirikirwa omurooti wa Waryubha wa eguru ya bhyonsego.
Orimukangatira Omukuru Waryubha, anyoore omuseemeerye enjira.
77 Orikeerya abhantu bhaaye ega, bharituuribhwa
kwa okwabhirwa obhusarya bhwabho,
78 okuringʼaana na ekyabhira ekinene kya Waryubha weetu.
Obhutuurya bhuyo bhurituujira okurwa murwire kya endingaasi,
79 na bhurimirikira bhanú bharingi mukisunte,k
bhanú bharingi munyanko na mungʼanga ya oruku.
Aritoorokererya, naho tugendenga kunjira ya omurembe.”
80 Bhoono, omwana uyo Yoana, akakiina, akanyoora eginguru munkoro yaaye. Akagya okwikara kukibhara, okuhikira eribhaga rinú yeeyorokya ku Bhaisiraeri.