Yeesu araanga ameehigiryo ga Abhafarisaayo
7
1-4 Kuginsiku girya, Abhafarisaayo na Abhayahudi abhandi, bhataaringa bhararya bira okwisaabha okuhikira kubhikokora. Bhaakoranga ego, okuhiituka egimiira gya abhakuru bhaabho kya ego gyaringa. Hanú bhaarwanga mumudiira, bheesaabhanga mbere amabhoko, kya ego yeenderwanga, nho bhararya. Kweki, bhaahiitukanga egimiira gyabho egindi eginjaru egya akare, kya okoogya ebhikombe, ebhifurira na ebhintu ebhindi.Orusiku rumwi, Abhafarisaayo na abheehigirya nyabhurebhe bha amaragiriryo bhakaaja okurwa mumugi gwa Yerusaremu, bhakeekumanʼya hanú Yeesu yaaringa. Bhakarora abheehigira nyabhurebhe bha Yeesu, bhararya ebhyakurya bhateesaabhiri amabhoko, kya ego yaaringa ereenderwa kugimiira gyabho.a
5 Mbe, Abhafarisaayo na abheehigirya bha amaragiriryo, bhakamubhuurya Yeesu ega, “Kwaki abheehigira bhaaho bhatakugwata egimiira gya abhakuru bheetu, bheeki bhararya ebhyakurya, bira okwisaabha amabhoko?”
6 Yeesu akabhakyukya ega, “Bheenyu bhanyarwambe. Omurooti Isaaya yaaroota bhujomu eguru yeenyu, hanú yaangʼoora ega,
‘Abhantu bhanu bharansuuka kwa amangʼana ageenego,
nawe, emitima gyabho giringi ahare na oni.
7 Bharansyengera bhusa,
kwa okubha ameehigiryo ganú bhareehigirya, muna ega, n-ga Waryubha,
m-maragiriryo ga abhantu.’b”
8 Yeesu akagendererya okubhakeerya ega, “Bheenyu muratiga amaragiriryo ga Waryubha, muragwata egimiira gya abhantu.
9 “Muuna enjira enjomu ya okwanga amaragiriryo ga Waryubha, naho mugwate egimiira gyenyu! 10 Yaani Waryubha yaagamba okuhitira ku Musa ega, ‘Obhasuuke eseweenyu na ngʼina weenyu.’c Kweki ega, ‘Omuntu wowonse unú aramutuka esewaabho kasi ngʼina waabho, ereenderwa yeetwe.’d 11 Nawe bheenyu, mureehigirya ega, m-bujomu omuntu okukeerya esewaabho kasi ngʼina waabho ega, ‘Ebhintu bhinú nkaaturiri okukubheera, bhibheeri Koribhani,’ yaani bhibheeri omutuho ku Waryubha. 12 Kwa ego, okurekana na ameehigiryo gayo, kurakora omuntu yaange okubheera esewaabho kasi ngʼina waabho, ekintu. 13 Kwa okukora ego, murajeera amaragiriryo ga Waryubha, naho muture okuhiituka egimiira gyenyu abheene. Na murakora amangʼana amaaru ganú garahunkana kya gayo.”
Amangʼana ganú garamukonʼya omuntu
14 Yeesu akabhirikira omuganda gwa abhantu kweki, akabhakeerya ega, “Bhonsego munyitegeerere, mumanye kinú ndagamba. 15 Kitariho ekintu kinú kiraasohe kumuntu, kimukore abhe omukonu embere ya Waryubha, nawe bhinú bhirarwa mumutima gwa omuntu, mbyo bhiramukora abhe omukonu. [ 16 Unú yaana amatwi yeegwe!]e”
17 Hanú yaatigana na omuganda gwa abhantu guyo, akasoha munyumba, nho, abheehigira bhaaye, bhakamubhuurya eguru ya ekirengyo kiyo. 18 Akabhakeerya ega, “Bhoono, kora bheenyu bhonse, mutarangʼeeniha? Mutaramanya ega, kitariho ekintu kinú kiraasohe kumuntu, kiramukora abhe omukonu embere ya Waryubha? 19 Ekintu kinú kirasoha kumuntu, kitakusoha mumutima, nawe kirasoha munda, na kiramara kireeswa muchoroni.” Kwa okugamba ego, yaabhiraama ebhyakurya bhyonsego bhibhenga bhirariibhwa.f 20 Akagendererya okugamba ega, “Kinú kirarwa mumutima gwa omuntu, nkyo kiramukora abhe omukonu. 21 Ndagamba ego, kwa okubha mumitima gya abhantu, mmo gararwa ameetegeerero amabhiibhi, obhusuunu, obhwibhi, obhwiti, 22 obhusimbe, orunamba rwa ebhintu, obhubhiibhi, obhubheehi, obhwingʼahirya, amatuki, orwango, ekisiraani na obhutengʼo. 23 Amabhiibhi gayo gonsego, gararwa mumutima, na ngo garamukora omuntu abhe omukonu.”
Eimani ya omukari oumwi unú ataringi Omuyahudi
24 Mbe, Yeesu akarwa mukyaro kya Gariraaya, akagya kurutunga rwa emigi gya Tiro na Sidoni. Eyo, akeekara munyumba nyabhurebhe, ateendanga omuntu wowonse amanye hanú aringi. Nawe, akamanyikana. 25-26 Eyo, yaaringa-yo omukari oumwi, unú ataaringa Omuyahudi. Omukari uyo, yaaringa arwiriri Foinike mukyaro kya Siria. Omuhara waaye, yaaringa na ekihwi ekibhiibhi. Hanú omukari uyo, yeegwa ega, Yeesu aringi haangʼi, rumwigo akamuseeta, akatema ebhiru mumaguru gaaye. Akamwisasaama amuruusye omwana waaye ekihwi.
27 Yeesu akamukyukya ega, “Etaringi bhujomu okugega ebhyakurya bhya abhaana na okwesera egimbwa. Mbere abhaana bheegute.”g 28 Omukari uyo, akamukyukya ega, “Niigo eringi Omukuru, nawe, kora egimbwa ginú giringi hansi wa emeja, girarya amasaagyo ga abhaana.”
29 Yeesu akamukyukya ega, “Okurekana na eringʼana riyo ogambiri, imuka ogende, ekihwi kirwiri kumuhara waaho.” 30 Kimwi, omukari uyo, akagya iika owaaye, hanú yaahika, akanyoora omwana waaye yeerambikiri kubhuriri, na ekihwi kimurwiri-ko.
Yeesu arahwenʼya omuribhu wa amatwi
31 Kimwi Yeesu akeemuka kurutunga rwa Tiro, akahita gatigati ya Sidoni, akagya kunyanja ya Gariraaya, gati ya orutunga rwa Dekapori. 32 Eyo yaaringa-ho omuntu oumwi, unú yaaringa omuribhu wa amatwi na kweki yaaringa na eritatura. Abhantu nyabhurebhe bhakamureeta ku Yeesu, bhakamwisasaama Yeesu amutuurire amabhoko, amuhwenʼye. 33 Yeesu akagya nawe kabhejyo okurwa mumuganda gwa abhantu harya, akamutuurira ebhyara mumatwi. Akatuuja amate kukyara kyaye, akamuhaka kururimi. 34 Akamaaha murwire, akeekya ekikohe, akamukeerya ega, “Efata,” ensonga yaaye niiga, “Ribhuka.” 35 Hayohayo, omuntu urya amatwi gakaribhuka na orurimi rwaye, akaamba okuhaira bhujomu.
36 Yeesu akakemera omuganda gwa abhantu bharya ega, bhatakaakeerya omuntu wowonse ganú akoreri. Nawe, kya ego yaagendereryanga okubhakemera, niigo bhaagendererya okuraarika amangʼana gayo bhukongʼu. 37 Bhakaruguura bhukongʼu, bhakagamba ega, “Akoreri amangʼana gonsego bhujomu, kora abharibhu bha amatwi bheegwe na abhamuumu bhahaire!”