குற்றநிவர்த்தி கீவத்துள்ளா ஹரெக்கெ
பூஜாரிமாரிகும், ஜனங்ஙளிகும் பேக்காயி குற்ற நிவர்த்திகுள்ளா ஹரெக்கெத மோசே கொண்டு பொப்பத்தெ ஹளுது (9:1-6)
9
ஆரோனினும், அவன மக்களும் பூஜாரிமாராயிற்றெ நேமிசிதா எட்டாமாத்த ஜின, மோசே ஆக்களும், இஸ்ரேல் தலெவம்மாரினும் ஊதுபரிசிட்டு, 2 ஆரோனாகூடெ, <<நீ ஒந்து கொறவும் இல்லாத்த ஒந்து எத்துமறித நிங்கள சுத்திகரணாக பேக்காயி, தெய்வாக பூரண ஹரெக்கெ களிக்கு. அதே ஹாற ஒந்து செம்மறிஆடினும் தெய்வாக பூரண ஹரெக்கெ களிக்கு. 3 எந்தட்டு, ஜனங்ஙளா சுத்திகரணக பேக்காயி, ஒந்து ஆடு முட்டனும், ஒந்து வைசுள்ளா ஒந்து எத்துமறிதும் ஒந்து ஆடுமறிதும் இஸ்ரேல்காறாகூடெ கொண்டு பொப்பத்தெ ஹளிட்டு, தெய்வாக பூரணமாயிற்றெ கிச்சாளெ கவுசி ஹரெக்கெ களிக்கு. 4 அதுகூடாதெ, சமாதான ஹரெக்கெ களிப்பத்தெ பேக்காயி, ஒந்து எத்தினும், ஒந்து ஆடுமறிதும், அதனோடெ ஒள்ளெ மாவினாளெ எண்ணெ ஹுயிது கலசிட்டு, தெய்வாக ஆகார ஹரெக்கெதும் கொடு. அம்மங்ங, தெய்வ தன்ன பெகுமானத நிங்க எல்லாரிகும் இந்து காட்டி தக்கு. ஹளி ஹளிதாங்.5 அதுகொண்டு மோசே, ஜனங்ஙளாகூடெ கொண்டு பொப்பத்தெ ஹளிதா எல்லதனும் ஆக்க தெய்வத கூடார மெனெத அங்களாக கொண்டு பந்துரு. 6 எந்தட்டு மோசே, <<தெய்வத பெகுமானத நிங்க காம்பத்தெ பேக்காயி ஆப்புது இதொக்க கீவத்தெ ஹளிது>> ஹளி ஹளிதாங்.
பூஜாரிமாரா குற்றாக நிவர்த்தி கீவுது (9:7-14)
7 அதுகளிஞட்டு மோசே ஆரோனாகூடெ, <<நீ ஹரெக்கெ திம்பதப்படெ ஹோயிட்டு, நின்ன குற்ற நிவர்த்திகும், ஜனங்ஙளா குற்ற நிவர்த்திகும் பேக்காயி தெய்வ ஹளிதா ஹாற பூரண ஹரெக்கெ களி>> ஹளி ஹளிதாங். 8 அதுகொண்டு ஆரோனு ஹரெக்கெ திம்பதப்படெ ஹோயி, தன்ன சுத்திகரணாக பேக்காயி எத்துமறித கொந்நா. 9 அம்மங்ங அவன மக்க, ஆ எத்துமறி சோரெத கோப்பெயாளெ ஹிடுத்து அவனகையி கொட்டுரு. அவங் அதன தன்ன கையிபரலாளெ முக்கி ஹரெக்கெ திம்பத நாக்கு கொம்பிகும் உஜ்ஜிதாங். பாக்கி உள்ளா சோரெத ஹரெக்கெ திம்பத அடி ஹுயிதாங். 10 எந்தட்டு, தெய்வ மோசேதகூடெ ஹளிதா ஹாற தென்னெ, அதன எல்லா கொளுப்பும், பித்தும், சங்ஙினாளெ உள்ளா கொளுப்பும் எத்தி ஹரெக்கெ திம்பதாளெ பீத்து கவுசிதாங். 11 எந்தட்டு எத்துமறித எறச்சியும், அதன தோலும் ஒக்க எத்தி, ஜனங்ஙளு தங்கி இப்பா சலந்த ஹொறெயெ கொண்டு ஹோயி கிச்சு கவுசிதாங். 12 எந்தட்டு ஆரோனு, பூரண ஹரெக்கெகுள்ளா ஆடினும் கொந்நா. அவன மக்க, அதன சோரெத கோப்பெயாளெ ஹிடுத்து அவனகையி கொட்டுரு. அவங் அதன ஹரெக்கெ திம்பத சுத்தூடும் தளுத்தாங். 13 அவன மக்க ஆ ஆடின தெலெதும், துண்டுமாடிதா எறச்சிதும் எத்தி கொட்டுரு. அவங் அதனொக்க ஹரெக்கெ திம்பதமேலெ கவுசிதாங். 14 ஹிந்தெ அதன கொடலினும், கொறவினும் கச்சி கொண்டு பந்தட்டு, கிச்சளெ ஹைக்கி பூரணமாயிற்றெ கவுசி ஹரெக்கெ களிச்சாங்.
ஜானங்ஙளா குற்றாக நிவத்திகீவுது (9:15-17)
15 அந்த்தெ அவங் தன்ன குற்றாக பேக்காயி தெய்வத கையிந்த மாப்பு பொடிசி சுத்த ஆப்பத்தெ பேக்காயி ஹரெக்கெ களிச்சா ஹாற தென்னெ, ஜனங்ஙளா குற்ற நிவர்த்திக பேக்காயும் ஆடின ஹரெக்கெ களிச்சாங். 16 எந்தட்டு அதன தெய்வ ஹளிதா நேமப்பிரகார தென்னெ பூரண ஹரெக்கெ களிச்சாங். 17 எந்தட்டு, ஜினோத்தும் பொளாப்பங்ங களிப்பா பூரண ஹரெக்கெதகூடெ தென்னெ, ஜனங்ஙளு கொண்டு பந்தா ஆகார ஹரெக்கெயாளெ ஒந்து ஹிடியும் எத்தி ஹரெக்கெ திம்பதாளெ இப்பா கிச்சாளெ ஹைக்கி சுட்டு, ஹரெக்கெ களிச்சாங்.
சமாதான ஹரெக்கெ களிப்புது (9:18-21)
18 எந்தட்டு ஜனங்ஙளு சமாதான ஹரெக்கெக பேக்காயி, கொண்டு பந்தா எத்தினும், ஆடு முட்டனும் ஆரோனு கொந்நா. அதன சோரெத அவன மக்க ஒந்து கோப்பெயாளெ ஹிடுத்து அவனகையி கொட்டுரு. அதன அவங் ஹரெக்கெ திம்பத சுத்தூடும் தளுத்தாங். 19-20 எந்தட்டு அது எருடன நெஞ்சு கண்டதும் கொளுப்போடெ உள்ளா அதன பாலும், கொடலா சுத்தூடுள்ளா கொளுப்பும், அதன பித்தும், சங்ஙாமேலெ உள்ளா கொளுப்பினும் ஒக்க, ஆரோனா மக்க எத்தி அடுக்கி பீத்துரு. ஆரோனு அதனொக்க கிச்சாளெ ஹைக்கி பூரணமாயிற்றெ கவுசி ஹரெக்கெ களிச்சாங். 21 எந்தட்டு மோசே ஹளிதா ஹாற தென்னெ, அவெ எருடன நெஞ்சு கண்டதும், எருடன பலக்கைகொறவாளெ ஒந்நொந்தும் எத்தி, தெய்வத முந்தாக போசிகாட்டி, தெய்வாக சமர்ப்பண கீதாங்.
பூஜாரி ஜனத அனிகிருசுதும், தெய்வத பெகுமான ஜனங்ஙளு காம்புதும் (9:22-24)
22 அந்த்தெ ஆரோனு குற்றநிவர்த்தி ஹரெக்கெ, பூரண ஹரெக்கெ, சமாதான ஹரெக்கெ இதொக்க கீது களிஞட்டு, தன்ன எருடு கையிதும் போசி, <<தெய்வ நிங்கள எல்லாரினும் அனிகிருசட்டெ>> ஹளி ஹளிட்டு, ஹரெக்கெ திம்பந்த கீளெ எறங்ஙிதாங். 23-24 எந்தட்டு, மோசேயும், ஆரோனும்கூடி, தெய்வத கூடாரமெனெ ஒளெயெ ஹுக்கி ஹொறெயெ பந்தட்டு, <<தெய்வ நிங்கள எல்லாரினும் அனிகிருசட்டெ>> ஹளி ஹளங்ங தென்னெ, தெய்வ ஆகாசந்த ஒந்து கிச்சின அயெச்சு ஹரெக்கெ திம்பதாளெ பீத்தித்தா எல்லதனும் கிச்சு கவுசித்து. அந்த்தெ தெய்வ தன்ன பெகுமானத எல்லா ஜனாகும் காம்பத்தெ மாடித்து. அதன கண்டா ஹாற தென்னெ, எல்லாரும் சந்தோஷத்தோடெ ஒச்செகாட்டி, நெலதாளெ கவுந்நு பித்து, தெய்வத கும்முட்டுரு.