1 Juan 1

1 Juan

Nabena karta Juanba b̶ʉd̶a

Chi Chokae Nibabiabarii Bed̶ea

1 Arab̶aed̶eed̶e chi Chokae Nibabiabarii Bed̶ea abadau b̶uasii, maud̶e wabid̶a b̶uu. Mauba jaradead̶a daiba ũrisid̶au. Mau dai dauba unusid̶au maud̶e juaba wausid̶au. Mauba waud̶a kauwa ichiasid̶au. Mau ʉ̃rʉbena daiba nau kartad̶e b̶ʉmaa panuu. 2 Mau chokae nibabiabarii Dachi Akõreba nau iujãad̶e unubiasii. Daiba mau unusid̶aud̶eeba mau ʉ̃rʉbena biawãra berrea panuu. Daiba machimaa jara panuu mau chi ewaricha chokae nibabiabarii. Arab̶aed̶eed̶e ichi Akõre ome bajãad̶e b̶uabachii. Mau bajãad̶e b̶uad̶a Dachi Akõreba daimaa nau iujãad̶e unubiasii. 3 Daiba unuped̶aad̶a maud̶e ũriped̶aad̶a machimaa jara panuu machi sid̶a dai ome ãbuacha Dachi Bajãad̶ebena Akõre ome maud̶e ichi Warr Jesucristo ome biꞌia panad̶amera. 4 Joma mau daiba b̶ʉmaa panuu dachi ãrea kĩrajʉʉd̶ai baita.

Dachi Akõre kachiruaswãe nii

5 Daiba Jesucristod̶eeba ũriped̶aad̶a machimaa jara panuu naubʉ: Dachi Akõre ʉ̃d̶aa kĩra nii ne jomad̶e jipa niid̶eeba. Mauba ichid̶e pãriu ab̶a bid̶a wãꞌãe. 6 Ichi ome ãbua biꞌia panuu aaduubʉrã, maamina pãriud̶e nibaaduubʉrã, setaa jara panuu. Biawãra bed̶ea ijãad̶awẽa panuu. 7 Maamina ichi ʉ̃d̶aad̶e b̶uu kĩra dachi sid̶a ʉ̃d̶aad̶e nibaaduubʉrã, ãbarã ome ãbua biꞌia panad̶ai. Maud̶e ichi Warr Jesucristo oa ched̶aba dachi kachirua joma jeraabarii.

8 Dachi kachiruaswãe panuu a panuubʉrã, ara dachi du ab̶a setaa jara panuu maud̶e biawãra bed̶ea adua panuu. 9 Dachi Akõreba jara b̶uu kĩra ara ichiba waubariid̶eeba, maud̶e jipa waubariid̶eeba, dachiba kachirua wauped̶aad̶a ichimaa jaraaduubʉrã, mau kachirua perdonai. Joma kachirua wauped̶aad̶a jeraai. 10 Kachirua waud̶akau aaduubʉrã, Dachi Akõre chi seta nii a panuu maud̶e ichi bed̶ea ijãad̶awẽa panuu.