Phagadāng Hadā
Ak Hoda
1
Ei phogodang hodagan Jisu Kristortun. Jhadi gori hi godhi jebo sieni tar banidajigune degibartei, mui tar banidajibuo, Johono sidu Itchiore, tar sorgo-dudtuo di padeinei, janei di die. 2 The Itchioro hoda sombonde, Jisu Kristor shakki sombonde ar jieni degkie sieni begkanir sombonde shakki die. 3 Somoibuo hai ejchie hinottei, je ei agami hoie hodagani madai ar sune, ar mui legilungge hodagani mane, the hoballie.Salam ar Baini
4 Johone Asia dejot sattuo mondolire leger,
Je ikkieio age, agottun dhori elo, ar ebo, tartun ar tar singasono samne thande sattuo Aptagunottun doyegan ar shantigan tomar idu thok. 5 Ar Jisu Kristortun, je bischias-joggio shakkigan, morattun polim jiei uttie, ar pittimir rajaguno ugure sason-gorie, the tomare doyegan ar shantigan duok. Je amare hos peinei amar pabpani tar nijor logandoi dhoi phelei die. 6 Tar Itchior ar Babor sidu the amare raja ar dhormo guru baneie. Mohimagan ar hemodagan umore-umor tar ok. Amen. 7 Sawh, the megsagot gori ejer. Prottiek soge tare degibak, ar jigune tare gudeion tharaio degibak. Tar harone pittimir beg jador manuschune gujhi-gujhi hanibak. Siennie obo. Amen. 8 “Mui Alpha ar Omega, arambogan ar thuman,” Ien Probuie hor. “Je ikkieio age, agottun dhori elo, ar ebo, Sorbo Shoktimannuo.”
Munischioro Puor Dogkiebuo
9 Mui, tomar bhei Johon ar tomar somare Jisu Kristor rejjioganot hosto bhug gorie ar soijjiogoriebuo. Itchioro hodaganottei ar Jisu Kristor shakkiganottei Patmos dippuot agong. 10 Probur Dinnuot, mui Aptabuot elung. Sebeden mor pijendi ekkuo birat ro begolo sobdo dogkie gori suinniong. 11 Robuoi hoie, “Mui Alpha ar Omega, Polimmuo ar Sejorbuo. Tui jieni degor sieni ekkuo boiot leg ar sieni Asia dejot sattuo mondoli agonde, Ephesi, Sumyrna, Pergamos, Thyatira, Sardis, Philadelphia, ar Laodicea siguno sidu padei dis.”
12 Sebeden more horte robuore sebartei mui phirilung. Phirinei mui degilungge sattuo sonar serag-dani. 13 Sattuo serag-danir moiddie ek jon Munischioro Puobuo dogkie degilung. The uri agede haboran thengopada song daga jeie ar tar bugkuot ekkan sonar pat bereie elo. 14 Tar siriebuo ar suloni ulo dogkie dhub, ar borobo dogkie dhub. Tar sogkun aguno jilo dogkie jolon. 15 Tar thengani hamaro olon-shalot shap gorsie joljollie hajo dogkie joler. Tar robuo pani ghumgumotte dogkie. 16 Tar den adtandoi sattuo thara dhori age ar tar muonottun ekkan do-dhara dhar horgo nigillie. Tar muon belan dok-dokkie gori jolede dogkie joler.
17 Mui tare seionggeio tar thenganit mora dogkie gori porsiong. Hintu tar den adtan mor ugure thoinei holo, “No dores. Mui Polimmuo ar Sejorbuo, 18 mui Jedabuo. Mui morsiong, ar sa, mui umore-umor baji agong. Amen. Padalor ar moronor shabigan mor adot age. 19 “Tui jieni degilie, jieni age ar jieni ienir porendi jhadi ghodi jebo sieni leg. 20 Mor den adtanot sattuo thara ar sattan sonar serag-dani degkuoschie sieno oghur gubonano sombonde leg, sattuo thara olakke sattuo mondolir dudtun. Ar sattan serag dani degkuoschie sigun olakke sattuo mondoli.