3 Jɔɔŋ 1

Kiŋwaati ki chá shɔ ki

Jɔɔŋ

Ə mi che kwoo ki kimbumə ki bəne bə kimbemi. Mbīeŋ kiŋwaati kɨhŋ bə wə Gayu mbweŋ tɔŋ. Nlèki wə ə kichɛɛŋ mə.

Jɔɔŋ dohi Gayu

2 Mbweŋ tɔŋ, nchèe Chu lə bieŋ binhliŋ yee bi jāa kinwaakə ə wɛɛ wo mə, wə tà gbo ye ŋkələ lə lə wə yu tā gbo ə fiana wa mə. 3 Mmà ŋ'woo njənjə gbaaŋ ye bəŋgwoŋ biaa bədi mà bwii lə yaŋ bwo nachɛ ye wə yu lēmi ə kichɛɛŋ bəŋ bə tɔŋ lo linhliŋ. Ə chɛɛŋ ba lə wə yu bə̀lə kichɛɛŋ. 4 Fieŋ fidi baala duŋ mu ffɨŋ duŋ ə fi fə ə n'yee ŋ'wō njənjə kah bəŋ'wo lə bwɔni bəŋŋ bie bə́ bə̄lə kichɛɛŋ.

5 Mbweŋ tɔŋ, nimi llɨŋ wə nɨ̀ŋ le bə bəŋgwoŋ biaa, gbaaŋ bə nfúuntə, wə yu nɨ̄ŋ yəəŋ. 6 Bə́ mà yɔɔla bə kimbumə ki bəne bə kimbemi ki yaŋ ki kinleki ko. Yee wə jû kwaa wə chɨ̀nə bəmbini bie bəne ə je nni Chu kìɛɛ mə ə gbɛŋ wibə mə. 7 Wə kələ lə bə́ fwoo bweenə yu yii li Kleto, bə́ kee lə kinchɨnə kidi kkɨŋ ki dùŋ kə duŋ nə ki bəne bə Chu kə. 8 Nəni, kkə kənə bənfwɔŋ dɨŋ bəmbini bie bəne, fo bee bə́ lə duŋ bəne bbəŋ bə́ nɨ̀ŋ ə fieŋ bəŋ fimwi ki kichɛɛŋ.

Ki Diotefɛ bə Demitiyu

9 Mmà mbieŋna fieŋ fidi bə kimbumə kieeŋ ki bəne bə kimbemi, kwaalə Diotefɛ nnu i lèki yo bənchi gbo wiih fwi, i nakə woo mbɛɛ nnu ndùŋ yo kə. 10 Nəni, bwɔɔ nnu nlə mbwo, ə nchi fieŋ ffɨŋ i fə̀ həkwe, ye i yu jāalə bə dunə, i yɔ̀ɔ díe yiwaha ə mi go. Ye i yu fə̄lə nəni, i yaa fiili dəŋ bə fimbini fie fieŋ kə. I yu nɨ̄hŋ bənjə bəŋgwoŋ biaa, i baŋ dəŋ bəne bbəŋ bə́ lèki lə bə́ tɨŋ jə bə́, lə bə́ kə tɨŋ nə jə kə. Bwɔɔ nnu bə́ kiɛɛ lə bə́ ntɨŋ jə bə́, i hlə kohiŋ bə́ bu kohiŋnə ə kimbumə ki bəne bə kimbemi mə.

11 Mbweŋ tɔŋ, wə kə yee wə fɛ̂hiŋ fieŋ fiwaha kə. Yee wə fɛ̂hiŋ ə duŋ fieŋ finwaa. Mbɛɛ nnu i fə̀ fieŋ finwaa lə mbɛɛ Chu, nnu i fə̀ fiwaha lə nnu i kə ŋəŋ nə ə Chu go kə.

12 Demitiyu duŋ wu fiih mbɛɛ nnu bəne binhliŋ yɔ̀ɔ bieŋ binwaa kiih, fwɔ wiih winwaa yɔ̀ɔ dəŋ kiih. Be dəŋ kkə yɔ̀ɔ kiih. Wə kələ lə fieŋ ffɨŋ kkə yɔ̀ɔ kiih lə chɛɛŋ.

Cheenə

13 N'yu ŋkaani ŋkə̄nə bieŋ kiŋaaŋkə bəmbieŋ bə wə, kwaalə ŋkə nleki bəmbieŋ bu bieŋnə bə gaanə ki kiŋwaati kə. 14 Ŋŋəŋ lə ə she chɛɛ ə mbwo ŋŋəŋ wə chəə, ə yee bee wə yɔ̄ɔ mbɛɛ kee mbɛɛ díi bə díi.

15 Yee kindunshiiŋ dûŋ bə wə. Binshiŋ biaa bie bi chēe wə. Chee nə mi binshiŋ biaa bənhliŋ mbɛɛ mwi mwi.