Kiŋwaati ki chá fie ki
Jɔɔŋ
1
Ə mi che kwoo ki kimbumə ki bəne bə kimbemi. Mbīeŋ kiŋwaati kɨhŋ bə wə kpɛ nnu Chu shaala maa bə bwɔni bwo. Bə kichɛɛŋ nlèki bəŋ. Ə kwaa mi nnu nlèki bəŋ kə. Bəne binhliŋ bbəŋ bə́ kə̀lə kichɛɛŋ yii lèki dəŋ bəŋ. 2 Kkə lèki bəŋ yu kichɛɛŋ kkɨŋ ki dùŋ kie ə be mə, ki lə yee ki bā ə be mə bwɔɔ mənhliŋ. 3 Tɔŋ linwaa bə hlɨŋ yi kwonə maa kindunshiiŋ kkɨŋ ki fù ə Chu Tah ya go bə Jisho Kleto lə yee ki dūŋ bə be ye kkə dùŋ lə ə kichɛɛŋ mə, kkə dùŋ dəŋ bə kinleki.Yee bə dûŋ ə kichɛɛŋ mə, bə dùŋ dəŋ ə kinleki mə
4 N'yu ntɨ̄ŋ gbaaŋ ye ŋŋə̀ŋ lə ye bwɔni bieeŋ bədi bie bə bə̄lə kichɛɛŋ yəəŋ ye Tah Chu mà kɨnə lə lə yee kkə fə̀. 5 Fidiɛɛ bə́ mah bwɔni, n'yu nnōŋ bu noŋnə n'yɔ̄ɔ lə, yee kkə lèki go ŋiaa. Nu kə duŋ nə ŋkɨnə fwɔ ju nnu n'yu mbīeŋ bə wə kə. Ə ŋkɨnə ko nnu kkə mà duŋ bə wu chɔɔ jə həmɛɛ. 6 Kinleki kɨhŋ lə kkɨŋ ki dùŋ kie lə yee kə bə̂lə bəŋkɨnə biih. Ŋkɨnə nu duŋ nnu bə mà woo ki wu ə kaani həmɛɛ lə, yee bə dûŋ ə kinleki mə.
7 Bəne kiŋaaŋkə bbəŋ bə́ kàalə yo bie yaŋ mbiŋ nte, ə duŋ bəne bbəŋ bə́ dùŋ kə bemi lə Jisho Kleto mà bwoo yaŋ kwe ye mbɛɛ ŋkee lə. Mbini yo mbɛɛ lə ŋwuŋ yo kaalənə, i dùŋ dəŋ mbɛɛ nnu i kə̀nə tɔŋ liyi bə Kleto. 8 Yee bə jə̂ bwɔɔ bə bikuu bieeŋ bə yá kə laa fieŋ ffɨŋ bə nɨŋna. Yee bə jû bəmbwo kənə bikoonə bieeŋ binhliŋ. 9 Mbɛɛ mənhliŋ nnu i yu jīŋ i gə̀ŋ kwaa fwi fwi i kə lèmi ə keehnə ki Kleto bəŋ kə, mbini yo baa lə kənə Chu ə wu mə kə. Mbɛɛ nnu i lèmi bwɔɔ mənhliŋ ə keehnə ki Kleto bəŋ, ə nnu i kə̀nə Tili bə Ŋiaani ə wu go. 10 Ə mbɛɛ lə bwo ə bəŋ go nakə bwoo ə duŋ bə kɨhŋ keehnə, bə kə tɨŋ nə jə wu ə bəŋ chəŋ ləkə chee wu kə dududu. 11 Ə mbɛɛ lə chee wu, kəə mbɛɛ yo buhaŋ wu ə nimi liih liwaha mə.
Die nni həŋgbɔŋ