Kiŋwaati kkɨŋ Pwɔɔ mà bieŋ bə
Filimuŋ
1
Ə mi Pwɔɔ, n'yo ə chəŋ munfwa mə yu ndùŋ ŋwuŋ Kleto Jisho. Ə bee ŋgwoŋ ya Timɔti. Mbieŋ kiŋwaati kɨhŋ bə wə Filimuŋ mbweŋ ya tɔŋ nnu kkə nɨ̀ŋ ə fieŋ bəŋ fimwi. 2 Mbīeŋ dəŋ bə Afia jɛmi ya, bə Alkipu nnu bee bə́ jù ə fieŋ bəŋ fimwi ye bəne bə ntɨmə lə, maa dəŋ bə kimbumə ki bəne bə kimbemi bbəŋ bə́ bùmə ə wə chəŋ. 3 Chu Tah ya bə Baba Jisho Kleto i nyii kinleki bə bəŋ, baa nə dəŋ bəŋ kindunshiiŋ.Pwɔɔ nə kimbaafɛɛ bə Chu yu Filimuŋ
4 Filimuŋ, bwɔɔ nnu nchèe Chu bwɔɔ mənhliŋ nhlè ko, nnə̀ kwaa ə duŋ kimbaafɛɛ bə Chu ŋgwəŋ yu wə, 5 yulahalə n'yu ŋ'wō ye wə yiilə tɔŋ ə Baba Jisho mə, bə ye wə lèki bəne bbəŋ bə́ dùŋ bə Chu bənhliŋ. 6 Nchèe Chu lə ye wə yiilə tɔŋ lo ə Jisho mə, bəŋ bə bəne bə Chu bie mbuhuŋ, fɨhŋ lə fə ə wə kaanə kələ bieŋ binwaa binhliŋ bbɨŋ bi dùŋ biaa bbɨŋ bi buhaŋ be bə Kleto. 7 Ŋgwoŋ, dɨŋ kɨhŋ kinleki kkɨŋ wə nyìi kie fəə n'yee ŋ'wō njənjə gbaaŋ gbo tā mi dəŋ, yulahalə wə fə̀ tɔ́ŋ ŋə bəne bə Chu də̀.
Pwɔɔ kɔnɔ Filimuŋ ki Onishimu
8 Fieŋ fidi hlə yee fi dūŋ həmə ffɨŋ ŋkiɛɛ lə wə hə fə, duŋ ə n'yɔɔ n'yɔɔnə bə muŋgeni mmuŋ ŋkə̀nə ye mbɛɛ Kleto lə lə wə fə. 9 Kwaalə, yu kinleki, nlə ŋkwi kwáŋ ə ŋkwinə bə wə. Mi Pwɔɔ ndùŋ ŋwucha, mbaa ndùŋ dəŋ ə chəŋ munfwa mə fidiɛɛ yu ndùŋ mbɛɛ Kleto Jisho. 10 N'yu ŋkwī kwáŋ bə wə yu ŋiaa Onishimu, nnu mmà njəə wu ye ŋiaa kimbemi lə ndùŋ yaŋ ə chəŋ munfwa mə. 11 Foo mà duŋ, i dùŋ fieŋ finya bə wə, kwaalə fidiɛɛ i chu duŋ mbɛɛ ya bee wə bənhliŋ.
12 N'yu nfāŋ chuu wu dɨŋ bə wə fidiɛɛ, i duŋ tɔŋ lɨŋŋ. 13 Nlèki lə nhə nchi wu baha ə mi go lə yee i fwōŋ mi kwa lo ye ndùŋ lə yaŋ ə chəŋ munfwa mə yu hlɨŋ nwaa nni i dùŋ ki Jisho. 14 Kwaalə, ŋŋəŋna lə duŋ ə nfə fieŋ ye fɨhŋ lə wə ŋkələ həmə hləŋ, yulahalə ŋkə nleki lə nimi lo linwaa llɨŋ wə nɨ̀ŋ le bə mi yee li dūŋ ye n'yə̄ələ wə ə n'yəə mə kə. Ŋkiɛɛ lə yee fi dūŋ ye tɔŋ lo lèki lə.
15 Ləkə Onishimu mà no ə wə dí ə bwɔɔ bəŋ chɛɛ nəni, lə bwɔɔ nnu mə fiimə bwo chu dɨŋ, ə bəə wu yee bə dūŋ bwɔɔ mənhliŋ, 16 i baa lə duŋ nfwa kə, i kaah nfwa. I duŋna dɨŋ Kleto tɔŋ, baa duŋ dəŋ mi hədɨŋ gbaaŋ ye i mà duŋ lə dəŋ ə wə mə, ye i duŋ lə mbɛɛ ŋkee baa duŋ dəŋ mbɛɛ Baba. 17 Nəni, ə wə ŋəŋ lə bee wə nɨ̀ŋ ə fieŋ bəŋ fimwi, wə tɨŋ jə wu ye wə hə duŋ lə bəntɨŋ jə mi. 18 Ə fi duŋ lə i mà fəə fieŋ fidi həkunə bə wə, ləkə lə, i yo bə fie wa, wə chi yi ə yii lɨŋŋ bəŋ. 19 Mbīeŋ fɨhŋ ə duŋ bə kwaŋ wuŋŋ lə, “Mi Pwɔɔ nlə nhluŋ.” N'yɔ̄ɔ nəni kinhle kidi hləŋkə bə mi kkɨŋ duŋ ə n'yɔɔ lə wə kənə fie ji bə mi, yulahalə kinduŋh kkɨŋ wə kə̀nə kie fidiɛɛ duŋ yu mi. 20 Nəni ŋgwoŋ, bu chɨnə kwaa mi ə diɛɛnə kɨhŋ mə yu Baba. Fə nəni yu kimbumə kiaa ə Kleto mə fo gbo lə nwaa mi. 21 Mbīeŋ bə wə nəni, ŋkə̄lə kə naamə lə wə lə bemi bənfə fieŋ ffɨŋ n'yɔ̄ɔ fie, bwɔɔ nnu wə kiɛɛlə wə fə, ə wə fə kahiŋ lə.
22 Bəmbaa yiinə mu, bwɛɛ mi dɔhɔ kinɔŋnə, yulahalə n'yu ŋkēe fwi ŋkə̀lə lə Chu lə wo Chu cheenə weŋ faŋ mi bə bəŋ.
Cheenə