Pamere mbini janda nang kodo
21
1 Waktu Yesus ada ka dalap Rumah Allah, Ia nele urak-urak kaya nama pamere umpu-ia ka dalap pati. 2 Ia uga nele siko janda nang kodo nama dua ote duit tamagaa ka dalap pati na.3 Lalu Yesus bakata, “Prati baiꞌk-baiꞌk, janda nang kodo ntu labih aya pamere ia taꞌk pamere urak-urak nang ada ka kitu. 4 Krana umpu-ia mere taꞌk rata ia nang balabih-abih, tape janda ntu biar gaꞌk ia kodo, ia mere biabis ape nang ada ka ia.”
Rumah Allah daꞌk dingroboh
5 Waktu ada dua-tege urak kajah ngomong wan muji Rumah Allah nang mbada cega, nang dimuat taꞌk batu-batu nang baginyar uga taꞌk asel pamere urak. Tape Yesus madah ka umpu-ia, 6 “Datak ari ia nana, ape nang ngkanaꞌk nele na daꞌk dingroboh sampai batu ia angin mang sote agi nang tasusun.”
Sangsara nang daꞌk dingadap ulih urak nang pacaya ka Yesus
7 Lalu umpu-ia batanya ka Yesus, “Guru, mila na daꞌk tajadi? Ape tande ia kaloꞌk na daꞌk tajadi?”
8 Yesus nyaut, “Ati-ati ngkanaꞌk, usah sampai ngkanaꞌk kana tipu, krana banyaꞌk urak datak nana ngako-ngako makai dama Aku lalu bakata, ‘Aku ntu Raja nang Tukang nylamat!’ Uga ‘Ari kiamat udah samaꞌk.’ Usah ngkanaꞌk nuna umpu-ia! 9 Kaloꞌk ngkanaꞌk nangar urak baparang wan balawan, usah ngkanaꞌk gali. Krana nang bage sana arus tajadi dulu, tape bukat barati dunia daꞌk kiamat.”
10 Lalu Yesus nglanjot omong Ia ntadi, “Bangsa nang sote daꞌk baparang duan bangsa nang lain, bage sana uga krajaan nang sote daꞌk baparang duan krajaan nang lain. 11 Gempa bumi nang mbada koat, panyakit awar, uga urak nang klayung daꞌk tajadi ka mane-mane. Bage sana uga daꞌk tajadi banda-banda nang muat urak mbada gali wan ada tande-tande nang mbada hebat taꞌk langin. 12 Tape giangin na tajadi, ngkanaꞌk daꞌk kana tangkap wan kana siksa; ngkanaꞌk daꞌk dingadel ka rumah-rumah sambayang lalu dinama ka dalap panjara. Ngkanaꞌk uga daꞌk dimaba ka adap raja-raja wan urak-urak nang bakuasa, krana ngkanaꞌk pacaya ka Aku. 13 Waktu nalah ngkanaꞌk bisa nyampai kabar baiꞌk nang taꞌk Allah. 14 Maka nsana mbulat ati ngkanaꞌk, supaya usah dulu bapikir bage mane cara mbela diri ngkanaꞌk. 15 Krana Aku inyan nang daꞌk mere ka ngkanaꞌk kapande ontoꞌk bakata-kata supaya ngkanaꞌk angin bisa dinantak uga kana lawan ulih munsuh-munsuh ngkanaꞌk.
16 Malah indo-ama ngkanaꞌk, kamar ulu ngkanaꞌk, sanyadi ngkanaꞌk uga page-page ngkanaꞌk daꞌk nyarah ngkanaꞌk ka urak-urak nang bakuasa. Lalu dua-tege urak ka ntara ngkanaꞌk daꞌk dimunuh. 17 Ngkanaꞌk uga daꞌk kana banci ulih urak biabis, krana pacaya ka Aku. 18 Tape angin mang salamar taꞌk buu ngkanaꞌk nang daꞌk ilang. 19 Kaloꞌk ngkanaꞌk tatap stia, ngkanaꞌk daꞌk namu idup nang kakal.”
Tantang Yerusalem nang daꞌk dingancur
20 “Kaloꞌk ngkanaꞌk nele Yerusalem kana kapong ulih tantara-tantara, ngkanaꞌk arus nao kaloꞌk angin lama agi Yerusalem na daꞌk ancur. 21 Waktu na urak-urak nang ada ka Yudea arus ndari diri ka gonong, urak-urak nang diap dalap kota arus napuꞌk kota na, urak-urak nang ada ka kampong usah tama ka dalap kota na. 22 Krana ari nalah waktu Allah ontoꞌk ngukum, supaya ape nang dah dinulis ka dalap Kitab Suci tajadi. 23 Claka mbini-mbini nang tangah buntik wan nyusu mmuda waktu na! Krana sangsara nang mbada hebat daꞌk tajadi ka sloroh banua ntu, uga bangsa ntu daꞌk kana ukum. 24 Ada nang daꞌk mati kana bunuh duan iso punti, ada uga nang daꞌk dinahan lalu dimaba ka bangsa-bangsa lain. Yerusalem daꞌk dingancur lalu dinguasa ulih urak-urak taꞌk bangsa-bangsa nang angin nganal Allah, sampai abis waktu nang udah dinantu Tuhan ontoꞌk umpu-ia.”
Anaꞌk Taleno daꞌk datak
25 “Nana ada tande-tande nang mbada hebat ka mata ari, bulat wan bintak. Uga ka dunia ntu bangsa-bangsa daꞌk gali wan bingung ngadap glombang laot nang baguruh bage guntur. 26 Urak-urak daꞌk mbada gali krana kuater nele ape nang tajadi ka dunia ngia, krana kuasa-kuasa nang ada ka langin daꞌk baguncah.
27 Pas waktu na urak daꞌk nele Anaꞌk Taleno datak ka dalap muaramang duan smua kuasa Ia wan sinar Ia nang mbada tampaꞌk. 28 Sigaꞌk banda-banda na mole tajadi, ngkanaꞌk arus badiri tagap uga ati ngkanaꞌk arus tatap koat, krana waktu Allah daꞌk nylamat ngkanaꞌk dah samaꞌk.”
Umpama batak ara
29 Lalu Yesus madah umpama ntu ka umpu-ia, “Tele baiꞌk-baiꞌk batak ara wan batak kayu nang lain. 30 Kaloꞌk ngkanaꞌk nele batak ara na dah mmole baocoꞌk, ngkanaꞌk pasti nao kaloꞌk kamaro dah samaꞌk. 31 Bage sana uga, kaloꞌk ngkanaꞌk nele tande-tande na tajadi, ngkanaꞌk arus nao kaloꞌk Krajaan Allah dah samaꞌk.
32 Ngkanaꞌk arus ingan baiꞌk-baiꞌk kata-kata Aku ntu: Urak-urak jaman kinintu angin daꞌk mati giangin tande-tande na tajadi. 33 Langin wan bumi daꞌk ilang, tape kata-kata Aku angin bisa ilang.”
Nasehat supaya bajaga-jaga
34 “Jaga diri ngkanaꞌk, supaya ngkanaꞌk angin sibok duan pesta pora wan mabuꞌk-mabuꞌk uga malar kuater duan kapralu ngkanaꞌk ka dunia ngia. Kaloꞌk bage sana pikir ngkanaꞌk, maka nsana ngkanaꞌk angin siap nrima ari Tuhan nang tampe-tampe daꞌk datak. 35 Krana na daꞌk tajadi ka taleno nang ada ka dunia biabis. 36 Jaji ngkanaꞌk arus bajaga-jaga uga malar badoa, supaya ngkanaꞌk mangkeh ngadap kajadi na uga supaya ngkanaꞌk mampu badiri ka adap Anaꞌk Taleno.”