Ɔ̀ tɔnkɛrɔ bòo lɛ á sãawi à wé
9
1 Ɛ́ bòo ɛ́ nín wìe ɛ́ yí te niǹte? Ɛ́ nín wìe ɛ́ yí Dɔfĩn tɔnkɛrɔ? ɛ́ nín wìe ɛ́ yí mi ke Ɲunsɔ Yiezu? Ɛ́ bòo ɛ́ mípe ɛ́ yí mú bòo lɛ ɛ́ ń yú ɔ́ Ɲunsɔ tɔnlɔ́ lɛ ɛ́ nín tɛ́ hũn?
2 Hɛ̀rí kɛ́ ɓɛ́ dɔ̀ viì ɛ̀ ǹpe ɛ́ yí Dɔfĩn tɔnkɛrɔ, ɛ̀ mìpe viì ɛ́ ń iè ɔ̀pe àá bɔ̀bín. Mìpe mì ńcɛɓánlɔ́n àá ɔ̀ Ɲunsɔ ɛ́ temu iè mù bòo lɛ ɛ́ zɛ̃́ní kɛ́ ńpe ɛ́ iè ɔ̀ pe Ɲunsɔ tɔnkɛrɔ àá bɔ̀bín.
3 Ɛ́ lɛ iè mù bòo lɛ ń dàa ɛ́ nín dàá kɔ̃́ní ɓɛ́pe lɛ ɛ́ niǹ wũ̀aní:
4 Bòo ɛ́ ké sũǹ hṹn yí fɔ́ɓán ɛ̀ kè yí bɔ̀-díe àá mí bɔ̀-ɲuriè hɔ̀ tɔnlɔ́ lɛ ɛ́ ké ɛ́ tɛ́ bòo hũn?
5 Bòo ɛ́ ń hṹn hṹn yí dɛ̀ ńdɛsĩ̀rɔ hṹnu dɔ̀ ɛ́ yá wé àá kìe hṹnu á wóo níiní mi kɛ̀a bòo lɛ ɛ́ ɓɛ́ pe tɔnkɛriè lɛ kɛ́ àá ɔ́ Ɲunsɔ ɓà zɛ̀ɓɛ̀ àá ɔ́ Piɛre ɛ́ dàa wóò wé mu?
6 Íee kɛ́ ńpe àá Baranabaasi kè dòonún ɛ́ temu fɔ́ɓán ɛ̀ kè wóo tɛ́ ɛ̀ dàá díiní kéte?
7 Á iè sɛ̃̀nɛ̀dɔ́sí hɔ́sɔ ɛ́ mí ɲɛùn mɛun kɛ́ á te míte ɛ́ wóò sàaní ɛ̀ dàá tɛ́ mí sɛ̃̀nɛ̀dɔ́sí yaamu tɔnlɔ́? Á iè wieni ɛ́ mí ɲɛùn mɛun kɛ́ á wóò fɛ́ hĩ́ vĩ̀inì à yá dí pehĩ̀ biè? À iè wieni ɛ́ temu wóò sie ɓɛ bì-laàsiè kɛ́ á yá ɲu peɓɛ̀ yɛmu?
8 Mì bí lieníkɛ ɛ̀ mì bie nɛ mu iè nìnbirìe bòo lɛ ɛ́ ɓɛ́ wóò wé mí-dòonún ɛ́ ń mɔ̀ ɛ́ dàa ɛ́ niǹ biehĩ́ ɛ̀ bie wɛ̀. Ɔ̀ Moyiizi làndɛ́ ɛ́ ɓiɛ̀ khɛ́ mú pe bɔ̀-cóoní mu.
9 Mù ɛ́ wɛ̃́ á Moyiizi làndɛ́ vɛ̃hṹ hũn nɛ:« À nàa lɛ ɛ́ hɔ̀ sìe hũn ɛ̀ vɛ̀ ɛ́ kɔ́ bí cɛ ɲunù wɛ̀. »a Ɛ́ bòo ɛ́ ɓɛ́ iè ɓɛ̀ nɛ̀mɛ̀ ɓɛ́-dòonún ɛ́ Dɔfĩn kuò ɛ́ hè bòo hũn?
10 Mù sũǹ yí képe bòo hũn ɛ́ hɔ́ pe Dɔfĩn ɛ́ dàa ɛ́ bie kɛ̀a mu? Ũun mù iè kèpe bòo hũn ɛ́ hĩ́ pe biehĩ́ mu ɛ́ dàa ɛ́ wɛ̃́. Á van-vɛ ɛ́ fɔ́ɓán à wóo vɛ̀ kɛ́ á dɔ́ mí tĩì nɛ mí ɓén mìí bòo, à lɛ ɛ́ hɔ̀ sìe ɛ̀ ɓán ɛ́ fɔ́ɓán à wóo ɓán kɛ́ á dɔ́ mí tĩì nɛ mí ɓén yí hɔ́ sì-biè.
11 Ɛ́ ké wo zù lè Dɔfĩn bienù mì tĩɛ̀ hũn. Ɛ́ bòo ɛ́ mí ɓen ɛ́ mì yírɛ́ sɛ̀nù dɔ̀ ɛ̀ lɛ́ kiè ɛ̀ wé àá ké ɲunù dínlɔ́ burɔsí ɛ̀ mì iè biè zĩ̀níkɛa ɛ́ wé ɛ̀ vɛ khie mí khiɛ̀?
12 Ɛ́ kɛ́ nìnbí-ɓuà ɛ́ ɓen ɲunù lɛ ɛ́ wóò ɓen fé mí núnú hũn bòo dɔ̀, ɛ̀ kèpe ɛ́ sũǹ hṹn yí dàa ɲunù lɛ wóo yí mí núnú hũn bòo ɛ́ pɔ ɓɛ?
Kɛ́ képe ɛ́ den yí wé mú pe sí wɛ̀. Ké ɛ́ den hɛ̃̀ kè hũn mù bòo mí-kùi hũn bòo lɛ ɛ́ wé ɛ̀ kè bí sí é Kirisa Ben-tĩnù wɛ̀.
13 Ɛ́ mí bìe yí dũ kɛ́ ɓɛ́ lɛ ɛ́ tɛ́ lé Dɔfĩn zũ-bɛhɔ́ hũn ɛ́ wóò yí ɓɛ́ dínlɔ́ pelè hũn? Ɛ̀ ɓɛ̀ lɛ ɛ́ te ɓɛ bì-làasiè ɛ́ wóò fũ̀a ɛ̀ wé àá lé mi-yiɛ́ ɛ̀ lɛ́ Dɔfĩn ɛ́ ɓiɛ̀ wóò yí ɓɛ́ hɔ́n ɓɛ̀ pe bì-làasiè lɛ fũ̀a hũn?
14 Ɛ́ sí ɓiɛ̀ iè mù pe ɛ́ Ɲunsɔ ɛ́ dàa bie nɛ ɓɛ lɛ ɛ́ lè Ben-tĩnù ɛ̀ buie ɛ́ ɓiɛ̀ sãawi ɛ̀ ɓɛ̀ yí ɓɛ́ ɲunú díe lè pe Ben-tĩnù mu buierɔ́ hũn.b
15 Kɛ́ mú pe bòo sí ɛ́ ń hṹn dɛ̀ ɛ́ wé mí-kùi, ɛ́ pemù dì-cóoní dɔ̀ ɛ́ den ɛ́ yí wé wɛ̀. Ɛ̀ mù lɛ ɛ́ nín wĩ́ kɛ̀a mu ɛ̀ lɛ́ miɛ ǹ ɛ́ lò yí bòo ɛ́ ń nɛ mi wé mú bòo mu ɛ̀ lɛ́ mi ǹ wɛ̀. Ɛ̀ ǹ tɛ hí ɛ́ bòo tṹ, kɛ́ ń den yá tɛ̀ ɛ́ nìnbírɔ ɛ́ leń mú pe bòo lɛ ɛ́ te le yèrè ɛ́ dé mi ǹ.
16 Ǹpe niǹ viì, ɛ̀ lè Ben-tĩnù lɛ ɛ́ nín buie ɛ́ yí te yèrè ɛ́ yá lɛ́ mi ǹ wɛ̀; iè mu lɛ hɔ́ iè tɔnlɔ́ lɛ ɛ́ ń fɔ́ɓán ɛ̀ ǹ tɛ́. Ɛ́ kɛ́ ń yí buie le pe Ben-tĩnù, ɛ́ nín yìi den ɛ́ mi mu.
17 Kɛ́ ńpe niǹte ǹ ɛ́ hṹn te hɔ tɔnlɔ́ mu ɛ́ munɛ , ɛ̀ ǹ hṹn fɔ́ɓán àá sàanín; kɛ́ mú lɛ ɛ́ hɔ́ iè tɔnlɔ́ lɛ ɛ́ ń fɔ́ɓán ɛ̀ tɛ́, ɛ́ mú wo iè hɔ̀ pe tɔnlɔ́ lɛ ɛ́ Dɔfĩn ɛ́ dɔ́ niǹ bàanì hũn ɛ́ nín tɛ́.
18 Ɛ́ niǹ sàanín ɛ́ wo iè hɔ̀ hɔ́sɔ? Niǹ sàanín iè mù lɛ ɛ̀ ǹ buie le Ben-tĩnù ɛ̀ lɛ́ ɓɛ́ nìnbirìe ǹ khã́máà; ɛ̀ ǹ buie le kɛ́ ń lò bí cɛ̀ bòo dɔ̀ lɛ á Ben-tĩnù buierɔ ɛ́ sãawi à yí wɛ̀.
19 Ɛ́ hɛ̀rí àá mú lɛ ɛ́ ńpe ɛ́ te niǹte ɓɛ̀ nìnbirìe ɓɛ́-kùi viì, ɛ́ ń den pɛ́ wɔ́ niǹte àá nìnbirìe ɓɛ́-kùi wɔnù bòo lɛ ɛ́ wé ɛ̀ ǹ vɛ́ ɓɛ́ nìnbí-kùi ɛ̀ dàá ɓen ɔ̀ Kirisa viì.
20 Ń ɓen wi àá ɓɛ Zuifuɓɛ, ɛ̀ ǹ wé kɛ̀a iè Zuifu bòo lɛ ɛ́ wé ɛ̀ ǹ yí ɓà ǹ ɛ̀ lɛ́ Kirisa ǹ. Ɛ̀ ǹ ɓen wi àá ɓɛ́ lɛ ɛ́ wi e Moyiizi làndɛ́ pànkɛ́ fìi hũn, ɛ̀ ǹ wé kɛ̀a bòo ɛ́ ń ɓiɛ̀ wi e Moyiizi làndɛ́ pànkɛ́ fìi hũn bòo lɛ ɛ́ wé ɛ̀ ǹ yí ɓà ǹ, kɛ́ ń lò den mí hɔ́ pe làndɛ́ mu pànkɛ́ fiì hũn wɛ̀.
21 Kɛ́ ń den ń ɓen wi àá ɓɛ́ lɛ ɛ́ yí dũ a Moyiizi làndɛ́, ɛ̀ ǹ wé kɛ̀a bòo ɛ́ ń ɓiɛ̀ yí dũ a Moyiizi làndɛ́ bòo lɛ ɛ́ wé ɛ̀ ǹ yí ɓà ǹ. Kɛ́ mú lò yí bòo ɛ́ ɓɛ́ nɛ ń yá hɔ̀ Dɔfĩn làndɛ́ ɛ̀ mɛ̀ndɛ̃ dɛ́! Ǹpe ɛ́ den wi e Kirisa làndɛ́ pànkɛ́ fìi hũn.
22 Ɛ̀ ǹ ɓen wi àá ɓɛ́ lɛ ɛ́ ɲɛùn cũ̀kṹ mí hɔ́ ńdɛsĩ̀nlɔ́ hũn, ɛ̀ ǹ wé kɛ̀a bòo ɛ́ ń ɓiɛ̀ cũ̀kṹ mí, bòo lɛ ɛ́ wé ɛ̀ ǹ yí ɓà ǹ. Ɛ́ ń wɔ́ niǹte àá mú bòo mí-kùi ɓɛ̀ nìnbirìe ɓɛ́-kùi bòo hũn bòo lɛ ɛ́ wé ɛ̀ mù wé kɛ̀a ńɓuò ɛ̀ ǹ hɛ̀ yí ɓɛ́ dɔ̀ ɛ̀ fuenínin.
23 Ɛ́ nín mù pe sí mí-kùi ɛ̀ wé lé Ben-tĩnù buierɔ́ yènsénín, bòo lɛ ɛ́ wé ɛ̀ ǹ ɓiɛ̀ yí niǹ hɔ́n mu bɔ̀-tente lɛ ɛ́ lé dàa hũn.
24 Mí lò wo dũ kɛ́ ɓɛ́ lɛ ɛ́ hɔ̀ ńzè pɛ̃́unkɛ ɓán khã̀a ɛ̀ zè hĩ̀ khã̀a zènléh khuiè hũn ɛ́ wóò zè ɓɛ́-kùi kɛ́ nìnbí-cóoní ɛ́ temu wóò yí lé sàanín. Ɛ́ mí zè sãaní bòo lɛ ɛ́ wé ɛ̀ mì yí lé sàanín mu.
25 Ɓɛ̀ khɛ̃̀-zèriè àá ɓɛ́ sɛ-sɛriè ɓɛ́-kùi ɛ́ ɓen ɛ́ ɓɛ́te ɛ̀ sɛ́sɛ́kɛ́ pɛ̃̀hṹ lɛ, ɛ̀ ɓɛ̀ wóò pĩ́ bòo cɛ̀rìɛɛ ɛ̀ tɛ́viɛní. Ɓɛ̀ wóò wé mú pe sí, bòo lɛ ɛ́ wé ɛ̀ ɓɛ̀ yí lé sàanín lɛ lò iè bòo lɛ ɛ́ yáà míi wɛ̀. Kɛ́ képe ɛ́ den mù wé lé sàanín lɛ ɛ́ kań yɔ́n fúu bòo hũn.
26 Ɛ́ sí iè mù pe ɛ́ ńpe dàa ɛ́ zè, kɛ́ mú lò yí bòo ɛ́ nín zè kũǹ wɛ̀. Ń dĩ̀ kɛ̀a ie ɓɛ sɛriè lɛ wóò núnkɛ ɓán núnkɛrɔ́ dɔ̀. Kɛ́ mú lò yí bòo ɛ́ ń kunkɛa niǹ níhĩ́ ɛ̀ ǹ wo ɛ́ núnkɛ kũǹ wɛ̀.
27 Ɛ́ ń den ɛ́ mù bɔ̀-hiebáa ɛ̀ zɛ̃́ní àá nìn sɛ̃́hṹ, ń hɛ̀ ɓɛ́ɓɛ́a lè ǹ ɛ́ ɲàakɛanin, bòo lɛ ɛ́ wé ɛ̀ ǹ bí khɛ́ lé ben-tĩnù ɛ̀ lɛ́ ɓɛ́ lɛ kɛ́ ǹ, ɛ̀ zɔn dɔ̀ ɛ̀ ǹ vɛ khe le sàanín wɛ̀.