Isirayeel yab kaa pílifì isaŋki
3
1 Mbusu kɔ́ pɔɔgaati tiŋki,kitiŋ kin kɔ́ tijɔkɔndi
ki wɔ́b́ binibee.
2 Kàa pílifì ti-Dindaan nyɔkɔ,
kaa fōō u-saŋkii,
kaa dū ki-mákal ki páaǹ ki-Dindaan pu,
kaa sútì ki pìl̄ ki-Nimbɔtiu.
3 Ki-yidambi bí kii gbikintib bin sūǹee ní.
Ki-bɔsoonliibi bí kii agbiŋgbil
ŋin cá kukpɔŋu kujooua,
ama ní kutaa nì ku-wuntilee,
ŋaa ti cáá tiba kí ŋmɔ́ee ní.
4 Ki-bɔnaatiliibi kaa bí tiban,
bi sá binib bin kíiĺ bi-jutiibee.
Ki-saraaŋaliibi kɔ́ǹ tin bí circiree tijɔkɔndi,
ní kaa fātìi tɔ́ mara.
5 Nì míǹ kɔkɔee, ti-Dindaan bí kitiŋin,
waa ŋáań tin kaa bí deedeeyee.
Kutaafaau kamaayee, u sòoǹ tibɔti,
ntaafaabɔmbɔmee, u ŋáań tin ŋān̄ee.
Ama nì míǹ kɔkɔee, binikpitib
pée gbíntìi tūǹ atuŋkpiti kaa cáá icoo.
6 Ti-Dindaan bí yii:
«M kúntì atimbun ki wīī ŋi-guŋkpaaŋŋi
ki yāntì ŋi-saŋyi kūń ubɔ kaa ti dì.
M bíil̀ ŋi-tiŋki,
uniseen kaa ti kóò ki-ni.
7 M lī m-ban yii:
<Kɔŋkɔnnee kitiŋ nee nib làá nīn tɔ́-mi,
bi làá fōō m-bɔkpaafikaati.
Maa làá ti ŋá kii m nín bí yii m làá ŋá-kì puee,
kaa làá ti kúntí-kì.>
Ama ní ki-nib yáb́
ki túń atuŋkpiti.
8 An puee ti-Dindaan nín lī puee sɔ̀.
Ní cīitímaan-mi!
Ní cīití ŋwiin ŋun m làá dāan̄ kí kɔ̄kɔl̀-nee.
Di sá yii m lēē ki síiǹ yii m làá kóoǹ
anibul nì abee kí kpāfì
ní kí kpáatí m-ŋuul kí sìtī ŋi-pu.
M-ŋuul ŋmiŋuee làá wà kí céetí kitiŋ kɔkɔ.»
Unimbɔti kpántì u-nibul bimbim
9 «Tiŋman, m làá ŋá m-nibul
nyunculiŋ circir,
ní bí ŋmā kí nīn yíì
man bi-Dindaan yindi,
ní kí kpāfì ubaanti kí nīn tūǹ m-tundi.
10 Bin jáaḿ-mi ki yàl̄
ki bíń Eetiiyoopii mɔɔgbandee
làá dāá cáań-mi saraabi.»
Isirayeel yab bin kíǹee
11 «Ŋwiin gbantee, m-nibul,
icoo kaa làá ti cúú-si
atuŋkpiti ŋin kɔkɔ a ŋá-mee pu.
Di sá yii ŋyunti gbantee, m làá dāá nyāntí ni-kansikin
timɔn dambi nì bin yòontí bi-ba yilpuee.
Niinee, a làá dāá gbèen̄ kí taa ti yòon̄ a-ba yilpu
m-circir jool pu.
12 M làá dāá kíń binib bin sīntiǹ bi-ba taapuee
nì bisoodambi a-ni.
Bi làá dāá nyàab̀ ḿ wúń bi-pu.
13 Isirayeel yab bin làá dāá kíńee
kaa ti làá dāá ŋá ikpiti,
kaa ti làá dāá mɔ̄ntì inyimɔn,
kaa ti làá dāá kīil̀ bi-jutiibi.
Bi làá dāá kpàà bi-waŋkuti nì ŋgbansɔŋfi
kí ŋùŋfì ní ubɔ dāa kpá kí fàaǹ-bi.»
Bi làá fàtīí mā Jeerusaleem tiŋki
14 Siiyɔn tiŋki, nín̄ kūuntí nì dipɔɔpindi,
Isirayeel yab, nín̄ fàal̀maan.
Jeerusaleem, nín̄ fàal̀ nì a-pɔbil kɔkɔ!
15 Ti-Dindaan kākatì ditafadaaldi
din bàà dàn̄ a-puee ki wāatì-si,
u kākatì a-nannanliibi ki wāatì-si.
Ti-Dindaan Isirayeel bɔtiu bí a-cee.
Aa ti máaǹ kí fàŋkì mbusu ubɔ.
16 Ŋwiin gbantee, bi làá dāá tùkù Jeerusaleem yii:
«Siiyɔn tiŋki, taa fàŋkì,
a-wunti ń taa yɔ̀tī.
17 Di sá yii ti-Dindaan a-Nimbɔtiu bí a-cee,
úǹ di sá ubaatandaan un tìì-si dijajilee.
A-pu ní u bí dipɔɔpindin,
ní u-neendi tìì-si dimaŋfapɔndi,
u fàal̀ ní ki bí dipɔɔpindin a-pu,
18 kii jiŋaal wiiŋŋuee.»
Ti-Dindaan bí yii:
«Jeerusaleem, m làá dāá kàkatī nnaabu kí wàatī-si,
án nín làá ŋá pu icoo ń taa ti cúú-see.
19 Ŋyunti gbantee, m làá dāá dáaĺ
bin kɔkɔ sāaǹ-nee tafal.
M làá dāá fīī apibil ŋin dúlifée,
kí kóoǹ ŋin wáŋkèe kí kpāfì.
M làá dāá tīī-ni tinyool
ní ni-yindi ń gbìtī ntimu mun kɔkɔ poon
bi nìn kɔ́ǹ-ni icooyee.
20 Ŋyunti gbantee, m làá dāá gíiǹní-ni.
Án dāa sá ŋyunti ŋun ní m làá dāá kóoǹ-ni kí kpāfèe.
M làá dāá tīī-ni tinyool
ní ni-yindi ń dāá gbìtī ilaan kɔkɔ
anibul ŋin kɔkɔ bí kitiŋ puee kansikin.
Di sá yii ni-nimbilaaliyin
ní m làá dāá gíiǹní-ni diŋuŋfilin.»
Man ni-Dindaan di lī míǹ.