Sorat ni Pablo ki
Filemon
1
1-3 Para kanimo Filemon, na kanamung nabubutan na amigo sagkud kaiba sa pangangadal ka Maraay na Bareta,
ki Apia na kanatung ngod na babayi, ki Arquipo na pareyo tang soldadosa sagkud sa manga paratobod na nagtitipon siton baluy mo.
Mapakaninyo logod a biyaya sagkud a katoninungan na galin sa Diyos na kanatung Ama sagkud ki Cristo Jesus na Kagorangnan.
Akong si Pablo na nagsorat kadi nakapriso holi sa pagtobod ki Cristo Jesus, sagkud nangongomosta kaninyo kaiba si Timoteo na kanatung ngod sa pagtobod.
A Pag-omaw ki Filemon
4 Pirmi akong nagpapasalamat sa kanakung Diyos, kin nangangadyi ako para kanimo. 5 Ta nabaretaan ko a manungud ka kanimong pagtobod ki Jesus na Kagorangnan sagkud a pagkabuut na ipinababayad mo sa ngamin na banal. 6 Ipinapangadyi ko na galin sa kanimong pagtobod mas orog pa ikang magin matinabang, nganing maintindiyan sagkud mamatian mo a ngamin na mararaay na bagay na agko kita ki Cristo. 7 Ngod ko, a kanimong pagkabuut amo a nagtao kanaku sa dakulung kamuy'an, sagkud nagpakusug ka kanakung poso, ta ika a nagpaogma ka poso ka manga banal.
Pakiosip ni Pablo Para ki Onesimo
8 Bilang usad na apostol ni Cristo, makusug a buut ko na mandaan ika kin ono a kaipowan mong gibowon, 9 alagad sa ngaran ka pagkabuut, nakikiosip ako kanimo. Akong si Pablo na gorang na sagkud ngowan nakapriso holi ki Jesu Cristo. 10 Nakikiosip ako kanimo na patawarun mo a nagin igin ko sa pagtobod sadi prisowan na si Onesimo. 11 Dati diri mo iya napapakinabangan, alagad ngowan nakakatabang na iya kanatung darwa.
12 Pinababalik ko iya kanimo, na bagana man sana dara niya a kanakung poso. 13 Gosto ko kintanang magtiner iya sadi na kaiba ko, tanganing imbes na ika, iya a magsirbi kanaku mantang nakapriso ako holi ka Maraay na Bareta. 14 Alagad abu kong gibowon a ono man na bagay na uda ika pirmiso, nganing ono man na tabang a gibowon mo, kaipowan na gibowon mo na agko maogmang poso bukung dara sa sapiritan. 15 Sigoro nasoway iya kanimo sa gatikot na panawon, nganing sa pagbwelta niya makaiba mo na iya sa ngamin na alduw, 16 buku na sanang usad na oripun kindi usad na nabubutan na ngod. Nabubutan ko iya, alagad mas orog mo pa iyang mabutan buku sanang bilang usad na oripun kindi usad na ngod sa Kagorangnan.
17 Kaya kin inaako mo ako bilang usad na karugup sa pagsirbi sa Kagorangnan, akoon mo man iya arug ka pag-ako mo kanaku. 18 Kin iya nakagibo kanimo sa kasalan o nakaotang sa ono man na bagay, kanaku mo singilun. 19 Akong si Pablo, na nagsorat kadi a migbayad kanimo. Diri na kintana kaipowan pang sabiyun na otang mo kanaku a kanimong boway. 20 Nakikiosip ako kanimo, ngod ko, sa ngaran ka Kagorangnan onrawun mo a kanakung pakiosip, tawan mo sa kamuy-an a poso ko bilang ngod ki Cristo. 21 Nagtotobod ako na gigibowon mo a ipinapakiosip ko kanimo kaya nagsorat ako, sagkud isi ko na mas orog pa kan a gigibowon mo.
22 Sagkud usad pa kan, mag-anda ika sa usad na kwarto para kanaku, ta ako naglalaom na gigibowon ka Diyos a inaayat ninyo kanya sa pagpapangadyi na ako makabwelta kaninyo.
Oltimong Oosipun
23 Nangongomosta man kaninyo ngamin si Epafras na kaiba ko sa prisowan, 24 si Marcos, Aristarco, Demas, sagkud si Lukas, na manga kaiba ko sa pangangadal.
25 Mapakaninyo logod a bendisyon ka Kagorangnan na si Jesu Cristo.