3
Manga Pagsadol sagkud Patanid
1 Parumrumun ninyo a manga kangoran na magpasakup sa manga namomoon sa banwaan sagkud magkoyog sira sa manga otoridad, sagkud magin andam na gomibo ka ono man na maraay, 2 pagsabiyan mo sira na diri magngabil sa maraut sa kiisay man, likayan a pakikipagkasogot, magin mabuut sagkud magpabayad sa kapakombabaan sa ngamin na tawo.
3 Ta bago kita nakatobod manga patal man kita, diri nagsosonod sa Diyos, nadaya sagkud oripun ka ngamin na klasi sa karatan sagkud kaogmaan sadi kinaban. Namomoway kitang pono sa malisya sagkud maiibgun, ikinauungut sagkud nauungut sa kada usad.
4 Alagad ko a kanatung Diyos na Paraligtas ipinabayad so kanyang karayan sagkud pagkabuut kanatu, 5 ilinigtas niya kita, bukung holi sa manga maraay na bagay na naginibo ta, kindi sa pagkaerak niya. Sa paagi ko kapangyariyan ka Espirito Santo inogasan niya kita sagkud nagin rason tanganing kita maipangigin otro sagkud magkaagko bagong boway. 6 Sa paagi ni Jesu-Cristo na kanatung Paraligtas itinao kanatung ambonda ka Diyos a Espirito Santo, 7 holi ka kanyang biyaya kita nagin matanos tanganing maako ta a boway na uda kasagkuran na ipinanoga ka Diyos kanatu. 8 Amo adi a matood na kasabiyan. Gosto kong tawan mo sa importansiya a manga bagay na adi, tanganing so manga nagtotobod sa Diyos mag-ingoang gomibo sa maraay, ta a manga bagay na adi maraay sagkud pakinabang sa ngamin na tawo.
9 Alagad diri mo pagtawan sa panawon a manga uda datang pakikipagdiskotir, manga pagsogid ko manga ginikanan, manga pagparapakikasogot manungud ka Layi ni Moises, ta a manga bagay na adi uda kamutangan. 10 A tawo na nagigin rason ka pagkabanga-banga holi ka sala niyang itinotottoro pataniran mo sa darwang beses. Pagkatapos kan, kin diri ika niya irunggun, alinun mo na iya sa katiriponan. 11 Ta isi mo na a tawong an raut a pag-iisip sagkud makasalan, a sadiri niyang kasalan nagpapabayad na maraut iya sa atobangan ka Diyos.
Oring Togon ni Pablo ki Tito
12 Paiiyanun ko si Artemas o si Tiquico kanimo. Pag-abot san ingowaun mo na makaiyan ika kanaku sadi Nicapolis, ta sadi na ako migpalipas sa tag-agnuw. 13 Gibowon mo a ngamin mong magiginibo na tabangan a abogadong si Zenas sagkud si Apolos sa kandang pagbyayi sagkud mangnowon mo kin agko sira ka ngamin na kinakaipowan nira. 14 A kanatung manga kangoran kaipowan na makatuud na mag-ingoa sa paggibo sa maraay, tanganing makatabang sa pang-oroalduw na pangangaipo, sagkud diri mamoway na uda pakinabang.
15 Kada usad kanamu sadi nangongomosta kaninyo. Ikomosta mo man kami sa ngamin na nabubuut kanamu.
Mapakaninyo logod ngamin a bendisyon ka Diyos.