Tito 2

A Tamang Katottoroan

¹ Alagad ika Tito, kaipowan mong itottoro a tamang katottoroan. ² A manga nakagogorang na lalaki tottoroan mo na magin pasensiyoso, kagalang-galang, tattaong magdesisyon kin ono a tama, magin matibay sa pagtobod, pagkabuut sagkud pagkamatinius.

³ A manga nakagogorang na babayi tottoroan mo man na mamoway na agko kabanalan, bukung parapakaraut o paraborat kindi magtottoro sa karayan. ⁴ Nganing matottoroan man nira a manga hobin na babayi na mabutan a kandang manga agom sagkud manga igin, ⁵ tattaong magdesisyon kin ono a tama sagkud malinig a konsensiya, tattaong mangataman ka sadiring baluy, magin maraay, makinoyog-koyog sa kandang agom, tanganing uda siisay man na makapag-osip sa maraut kontra ka oosipun ka Diyos.

⁶ Pati man a manga kahobenisan na lalaki tottoroan mo na magdesisyon kin ono a tama. ⁷ Kaipowan na ika a magin arugan nira sa paggibo ka ngamin na karayan. Magin maigut sagkud maimbod ika ka manga itinotottoro mo, ⁸ sigoradowun mo na tama a itinotottoro mo tanganing mapasupug a manga nakikipagkasogot kanimo, tanganing uda sira masasabing maraut kontra kanatu.

⁹ A manga oripun tottoroan mong pomasakup sagkud komoyog sa kandang manga among sa ngamin na bagay, ingowaun na mapaogma nira sira sagkud diri magparasorosimbag, ¹⁰ diri mag-ikit, kindi kaipowan ipabayad nira na sira mapagkakatiwalaan tanganing sa ngamin nirang gibong maraay mapamorawayan a katottoroan manungud ka Diyos na kanatung Paraligtas.

¹¹ Ta a biyaya ka Diyos na nagdadara sa kaligtasan para sa ngamin na tawo, ipinaayag na. ¹² Sa paagi ka biyayang an, tinotottoroan niya kitang domiri ka manga gibong bukung maka-Diyos sagkud diri mabuut ka manga bagay sadi kinaban, sagkud mamoway na tattaong magpugul sa sadiri, magpakangmatanos, sagkud banal ngowan na manga panawon, ¹³ mantang kita nag-uulat ka paladan na alduw na linalaoman ta, a pag-abot ka kamorawayan ka kanatung Dakulung Diyos sagkud Paraligtas na si Jesu-Cristo. ¹⁴ Itinao niya so kanyang sadiri para kanatu tanganing iligtas kita sa ngamin na karatan sagkud magin malinig kita para kanya, tanganing magin angay na sadiring banwaan niya na maigut sa paggibo sa karayan.

¹⁵ Kaya, amo adi a manga bagay na kaipowan mong itottoro. Pakusugun sagkud pagsabiyan mo sira na agko kapangyariyan. Diri mo pagtogotan na pagbasang- basangun ika ka kiisay man.