Tito 1

Tito

^1-4 Para kanimo Tito na matood kong igin ta pareyo a tinotobod ta:

Mapakanimo logod a biyaya sagkud katoninungan ka Diyos Ama sagkud ni Jesu-Cristo na kanatung Paraligtas. Akong si Pablo, na oripun ka Diyos sagkud apostol ni Jesu-Cristo, nangongomosta kanimo.

Pinili ako sagkud iminanda tanganing tabangan na magpadagos na komusug a pagtobod ka manga tawong pinili ka Diyos, sagkud maintindiyan nira sa maraay a manga katottoroan manungud ka banal na pamomoway, sigon sa paglaom na magkaagko ka boway na uda kasagkuran. A Diyos na diri magbobotig, nanoga kanatu ka boway na an bago pa lalangun a kinaban, sagkud innabot na ngowan a tamang panawon na ipinaayag niya yan sa manga tawo sa paagi ka Maraay na Bareta. A Maraay na Baretang adi ipinagkatiwala kanaku, sagkud amo man a itinotototoro ko sa kamandaan ka Diyos na kanatung Paraligtas.

So Trabawo ni Tito sadto Creta

⁵ A rason kin ngata ta itinagak ko ika sa Creta tanganing osayun mo a manga bagay na diri pa naoosay, sagkud pomili ika sa manga mimmoon sa manga kangoran sa kada banwaan sigon sadto sinabi ko kanimo. ⁶ A mimmoon kaipowan uda katatsaran, usad sana a agom, a kanyang manga igin tattaong komoyog kanya, bukung parapakikasogot sagkud kusung. ⁷ Ta a namomoon kaipowan uda manga katuyawan bilang pinagkatiwalaan ka trabawo ka Diyos, bukung mapagpalangkaw, bukung mauungtun, bukung boratsiro, bukung parapakikasogot sagkud pakikwarta. ⁸ Kindi kaipowan bokas a baluy para sa kapwa, usad na mabubutun sa karayan, tattaong magpugul ka sadiri, maka-Diyos sagkud disiplinado. ⁹ Kaipowan tattaong manindugan ka kamatoranan na tinotobod niya, tanganing mapakusug niya a iba ka maraay niyang katottoroan sagkud maitama a siisay man na nagkokontra kan.

¹⁰ Ta malakadakul ka nagrerebelde sa tamang katottoroan, sagkud padagos na nag-oosip sa uda kamutangan sagkud pandadaya, lalo na so galin sa manga Judio na nagin Cristiyano. ¹¹ Kaipowan mo sirang papondowun ta rinaraut nira a manga pamilyang nagtotobod ki Cristo, sa paagi ka manga salang katottoroan ta uda sira karapatan na magtottoro. A katoyowan nira makasusupug, ta gosto sana nirang magkakwarta. ¹² Usad sa manga propeta nira sinnabi: ?A manga taga Creta talagang botigun, manga ogakun na angap sagkud arug ka manga layas na ayup.? ¹³ A patotoong adi matood. Kaya, maisug mo sirang pagsabiyan, tanganing komusug a pagtobod nira, ¹⁴ sagkud diri kamo mag-irungug ka manga gibo-gibong istorya ka manga Judio sagkud ka manga kamandaan ka tawo na galin sa manga diri innaako ka kamatoranan. ¹⁵ Para sa tawo na agko malinig na poso, a ngamin malinig. Alagad a tawo na maati a isip sagkud diri nagtotobod ki Cristo, uda malinig kanda ta a kandang poso sagkud isip, maati. ¹⁶ Nagsasabi sira na bistado nira a Diyos, alagad sa manga ginigibo nira ipinababayad na diri talaga nira iya bisto. Malangraraut, kusung sagkud diri ginnigibo sa onoman na maraay.