9
So Pagkabaoy ki Saulo
1 Mantang, grabi so pagmawut ni Saulo na maguraan so manga disipolo ka Kagorangnan. Inniyan iya sadto pinakanamomoon ko manga padi 2 sagkud innayat sa sorat para sa manga sinagoga sadto Damasco, tanganing kin iya makasompong sa manga paratobod sa Kagorangnan, magin lalaki man o babayi, madara niya sa Jerusalem tanganing ipriso. 3 Ko madali ng makaabot si Saulo sadto Damasco, biglang nagkaagko liwanag galin sa langit na sinnilaw sa palibot niya. 4 Naolog iya sadto raga sagkud nakarungug sa boses na nag-osip, ?Saulo, Saulo, ngata mo ako ta pinadidipisilan??
5 ?Siisay po ika, Kagorangnan?? onga ni Saulo.
Sinnimbag iya, ?Ako si Jesus, na pinagparapadipisilan mo. 6 Ngowan tomindug ika sagkud omiyan sadto syodad, sagkud sasabiyun kanimo sadto kin ono a gigibowon mo.?
7 Namungnan so manga kaiba ni Saulo, nakarungug sira sa boses alagad uda sira mabayad na siisay man. 8 Tinnindug si Saulo, kindi ko boklatun so manga mata niya uda iya mabayad. Kaya kinabit iya ko kaiba niya paiyan sadto Damasco. 9 Sa luug sa tolong alduw bota iya, sagkud diri nagkaun o nag-inom sa ono pa man.
10 Sadto Damasco agko usad na disipolo na a ngaran Ananias. Binaoy iya ko Kagorangnan sa paagi ko kapaayagan na ipinabayad kanya ka Diyos sagkud sinnabi, ?Ananias!?
?Ono po an, Kagorangnan?? simbag niya.
11 Sinabiyan iya ko Kagorangnan, ?Pomaiyan ika sa baluy ni Judas sa Kalying Tolid sagkud ipag-onga mo a usad na lalaking galin sa Tarso na a ngaran Saulo, nangangadyi iya ngowan. 12 Sagkud ipinabayad kanya ka Diyos na linnuug a usad na lalaki na a ngaran Ananias sagkud irinuta so kamut kanya tanganing makabayad iya otro.?
13 ?Kagorangnan,? simbag ni Ananias, ?kadakul kong narungug na sombong manungud ka lalaking adi sagkud manungud ka manga ginibong maraut kadi sa manga banal sa Jerusalem. 14 Inniyan iya sadi na agko kapangyariyan na galin sa manga namomoon ko manga padi tanganing rakupun a ngamin na nagbabaoy sa kanimong ngaran.?
15 Alagad sinabiyan ko Kagorangnan si Ananias, ?Agi na! A lalaking adi pinili kong magin instromento na magdara ka ngaran ko sa bukung manga Judio, sa kandang manga hadi sagkud sa ngamin na tawo sa Israel. 16 Ipababayad ko kanya kin gaomno a titiusun niya alang-alang ka kanakung ngaran.?
17 Kaya si Ananias inniyan sadto baluy sagkud linnuug. Sagkud irinuta niya so kamut ki Saulo, sabi niya, ?Ngod na Saulo, a Kagorangnan na si Jesus, na nagpabayad kanimo sadto aagyan ko paiyan ika sadi, minandaan ako tanganing makabayad ika otro sagkud mapospos sa Espirito Santo.? 18 Kadto tolos, agko bagana koskos sa isura na naolog galin sa mata ni Saulo, sagkud nakabayad na iya otro. Binnowat iya sagkud nagpabunyag. 19 Pagkatapos niyang magkaun binnalik so kusug niya.
Si Saulo sadto Damasco sagkud sadto Jerusalem
Nagkapirang alduw man na nag-ibaiba si Saulo sadto manga disipolo sadto Damasco. 20 Sagkud pinnoon iya tolos na mangadal sadto manga sinagoga na si Jesus a Igin sa Diyos. 21 So ngamin na nakarungug kanya nangalas sagkud innonga, ?Bukung amo yan so lalaking nagpapadipisil sadto Jerusalem ko ngamin na nagbabaoy ka ngaran ni Jesus? Bukung inniyan iya sadi tanganing rakupun sagkud darawun sira sa namomoon ko manga padi?? 22 Alagad lalong tinnibay sagkud kinnusug so pangangadal ni Saulo, sagkud naribaraw so manga Judiong nakaistar sa Damasco ko maigut na pagpatonay niya na si Jesus amo a Cristo.
23 Pagkaagi sa dakul na alduw, so manga Judio nagkauusad na guranun si Saulo, 24 alagad naisiyan ni Saulo so plano nira. Alduw gab'ing inaabangan nira iya sadto trangkaan ko syodad tanganing guranun. 25 Alagad usad na gab'i, kinoko iya ko manga parasonod niya sagkud ilinuug sa tiklis sagkud itinonton sadto loyo ko alad.
26 Pag-abot niya sadto Jerusalem, iningoa niyang makaiba sa manga disipolo, alagad ngamin sira nakatakot kanya, diri sira nagtotobod na usad na iyang disipolo. 27 Kaya kinoko iya ni Bernabe sagkud dinara sadto manga disipolo. Sinabi niya kanda kin paono nagpabayad a Kagorangnan ki Saulo sagkud nakipag-osip mantang iya nasa aagyan, sagkud kin paono iya uda katakoting nangadal sa ngaran ni Jesus. 28 Kaya si Saulo nagin kaibaiba na nira sagkud libreng nalibot so Jerusalem, uda takot na nangadal sa ngaran ka Kagorangnan. 29 Nakipag-osip man iya sagkud nakipagdiskotir sa manga Griegong Judio, kaya gosto nira iyang guranun. 30 Sagkud ko maisiyan adto ko manga kangoran, dinara iya nira sadto Cesarea saka pinaiyan sa Tarso.
31 Kaya so simbaan sadto bilog na Judea, Galilea sagkud Samaria nagkaagko katoninungan. Lalo adtong tinnibay, sagkud sa tabang ka Espirito Santo rinnogang so bilang nira, sagkud namoway na agko pagkatakot sa Diyos.
Si Aneas sagkud si Dorcas
32 Nagbyayi si Pedro sa manlainlain na logar, tanganing bisitawun so manga paratobod sa Lida. 33 Nakatorak iya sadto sa lalaking a ngaran Aneas, usad na paralitiko sagkud walong taon ng diri nakababangon. 34 ?Aneas,? sabi kanya ni Pedro, ?Paoomayan ika ni Jesus. Bomowat ika sagkud osayun a batangan mo.? Kadto tolos binnowat si Aneas. 35 So ngamin na nakaistar sa Lida sagkud Saron nabayad iya sagkud nanombalik sira sa Kagorangnan.
36 Sa Jope agko man disipolong a ngaran Tabita,a pirmi iyang ginnigibo sa karayan sagkud tinnatabang sa manga pobre. 37 Ko manga oras na adto nag-ilang iya sagkud nagraan, so awak niya rinigos sagkud ibinutang sadto kwarto sa itaas. 38 A Lida arani sa Jope, kaya ko marungug ko manga disipolo na si Pedro isadto Lida, nagmanda sira sa darwa katawo na makimaerak kanya, ?Pakiiyan man tolos sadi kanamu!?
39 Kaya si Pedro inniba kanda, sagkud pag-abot niya tinnaas iya sadto kwarto. So ngamin na balo rinnapo sagkud pinalibotan iya, na nagtatangis sagkud ipinabayad kanya so kandang pang-alikbuy sagkud ibang manga bado na tinayi ni Tabita ko kaibaiba pa nira.
40 Pinalowas sira ngamin ni Pedro sadto kwarto, pangala tinniklod iya sagkud nangadyi. Innatobang iya sadto guraan, saka sinnabi, ?Tabita, bomangon ika!? Binoklat niya so mata sagkud innula ko mabayad si Pedro. 41 Kinaptan ni Pedro so kamut niya saka tinabangan na tomindug. Pangala binaoy niya so manga paratobod sagkud so manga balo saka ipinabayad iyang boway. 42 Naisiyan adto sadto bilog na Jope, sagkud kadakul na tawong nagtobod sa Kagorangnan. 43 Innistar pa si Pedro sa Jope sa uban na panawon, sadto baluy ni Simon na parabulad sa anit.