Gibo 8

¹ Sadto man si Saulo na nag-oyon ko kagranan niya.

Pinadipisilan so Paratobod sagkud Nagkasowaysoway

Ko alduw na adto pinonan ng padipisilan so manga paratobod sadto Jerusalem, kaya pwera ko manga apostol nagkasowaysoway sira, sadto manga banwaan ko Judea sagkud Samaria. ² Ilinubung man si Esteban ko manga tawo na agko pagkatakot sa Diyos sagkud ipinagmundu nira sa maraay so kanyang pagkagraan. ³ Alagad pinnoon naman si Saulo na rautun so simbaan. Inniyan iya sa kada baluy, sagkud ginodgod niya so manga paratobod, lalaki o babayi sagkud ipinapriso.

Si Felipe sadto Samaria

⁴ So manga paratobod na nagkasowaysoway, padagos na nangadal ko Maraay na Bareta sari man sira makaabot. ⁵ Si Felipe inniyan sa usad na syodad ko Samaria, sagkud itinottoro sadto manga tawo a manungud ki Cristo. ⁶ Ko marungug ko manga tawo si Felipe sagkud nabayad so manga makangangalas niyang gibo, inirungug nira sa maraay so sinasabi niya. ⁷ So manga maraut na espirito nagkakagrat na linnowas sadto manga tawong sinaniban, sagkud dakul man na manga paralitiko sagkud manga pilay so naraay. ⁸ Kaya nagkaagko dakulung kaogmaan sa syodad na adto.

Si Simon na Salamangkero

⁹ Sa syodad na adto agko usad na lalaki na a ngaran Simon, iya usad na salamangkero sagkud uban na niyang napabilib so manga tawo sadto Samaria. Ipinamamareta niya na usad iyang makapangyariyan, ¹⁰ sagkud so ngamin na tawo, mayaman man o pobre, inirungug iya sagkud sinnabi, ?A lalaking adi amo a kapangyariyan ka Diyos na binabaoy na Dakulung Kapangyariyan.? ¹¹ Sinnonod sira kanya ta nagngangalas sira sa uban ng panawon niya sa pagsalamangka. ¹² Alagad ko tomobod sira ki Felipe mantang ipinagtotottoro a Maraay na Bareta manungud ka kahadian ka Diyos sagkud ki Jesu Cristo, nagpabunyag sira, manga lalaki sagkud babayi. ¹³ Pati si Simon nagtobod sagkud pagkatapos mabunyagan pirmi na iyang nag-iiba ki Felipe. Ta nagngalas iya ko manga dakulung tanda sagkud ngangalasan na nabayad niya.

¹⁴ Ko mabaretaan ko manga apostol sadto Jerusalem na inako ko manga Samaritano a oosipun ka Diyos, ipinadara nira si Pedro sagkud si Juan kanda. ¹⁵ Pag-abot nira sadto, ipinangadyi nira so manga Samaritano tanganing maako man nira a Espirito Santo, ¹⁶ ta a Espirito Santo diri pa man binnababa sa kiisay kanda, nabunyagan pa sana sira sa ngaran ka Kagorangnan na si Jesus. ¹⁷ Pangala irinuta ni Pedro sagkud ni Juan so kamut nira kanda, sagkud naako nira a Espirito Santo.

¹⁸ Ko mabayad ni Simon a Espirito na itinao sa paagi ko pagruta sa payo ko manga kamut ko apostol, tinangroan niya sa sintabo si Pedro sagkud si Juan ¹⁹ sagkud sinnabi, ?Tawan ninyo ako sa kapangyariyan na an tanganing a siisay man na rutaan ko ka kamut ko, omako man ka Espirito Santo.?

²⁰ Sinnimbag si Pedro, ?Mapaaamak ika kaiba ka sintabo mo, ta iniisip mo na mababakal mo a regalo ka Diyos! ²¹ Uda ika parte o poder sa ministeryong adi, ta a poso mo bukung angay sa atobangan ka Diyos ²² Magsulsul ika ka kasalan mo sagkud mangadyi ika sa Kagorangnan. Tibaad patawarun ika niya sa maraut na kamawutan ka kanimong poso. ²³ Ta nababayad ko na naoori ika saigo sagkud oripun ka kasalan.?

²⁴ Kaya sinnimbag si Simon, ?Ipangadyi ninyo ako sa Kagorangnan tanganing uda mangyari kanaku sadto manga sinabi mo.?

²⁵ Pagkatapos nirang magpaayag sagkud mag-osip ko oosipun ka Kagorangnan, si Pedro sagkud si Juan binnalik na sadto Jerusalem, sagkud nangadal ko Maraay na Bareta sa manlainlain na baryo ko Samaria na inagyan nira.

Si Felipe sagkud so Opisyal na TagaEtiopia

²⁶ Pangala, so anghel ka Kagorangnan sinnabi ki Felipe, ?Pomaiyan ika sa timog, sa aagyan ka kalangtadan paiyan sadto Gaza, galin sa Jerusalem.? ²⁷ Kaya inniyan iya. Sa aagyan agko iya nasabat na lalaking tagaEtiopia. Usad iyang importanteng opisyal na namamaala ko ngamin na kayamanan ko reyna ko Etiopia. Inniyan iya sadto Jerusalem sagkud nagsamba sa Diyos. ²⁸ Sagkud ko paoli na iya, nakalonad iya sa karwahe sagkud binabasa so libro ni Propeta Isaias. ²⁹ Sinabi ko Espirito Santo ki Felipe, ?Romani ika sagkud sabayan mo a karwaheng adto.?

³⁰ Kaya padalagan na inniyan si Felipe sadto karwahe sagkud narungug niya so lalaki na nagbabasa ko libro ni Propeta Isaias, ?Naiintindiyan mo kin ono a binabasa mo?? onga ni Felipe.

³¹ Sinnimbag so lalaki, ?Paono ko adi maiintindiyan, pwera na sana kin agko magpaintindi kadi kanaku?? Kaya inimbitaran niya si Felipe na lomonad sadto karwahe sagkud omula sadto kaabay niya.

³² Amo adi a parte ko Kasoratan na binabasa niya,

?Arug iya sa usad na karnero na dinara sa bonoan,

sagkud bilang usad na kordero na uda ribok sa atobangan ka paratosar,

diri iya nagngabil sa ono pa man.

³³ Sinupug iya sagkud diri tinawan sa hostisya.

Ta uda siisay man na makapag-osip manungud ko kanyang erensiya.

Ta a kanyang boway pinura sadi kinaban.?

³⁴ So lalaki innonga ki Felipe, ?Sabiyun mo kanaku, siisay a sinasabi sadi ko propeta, manungud ko sadiri niya o sa ibang tawo?? ³⁵ Kaya si Felipe pinnoon ng mag-isplikar sa parteng adi ka Kasoratan sagkud sinabi niya kanya a Maraay na Bareta manungud ki Jesus.

³⁶ Nagpadagos sira sa pagbyayi sagkud nakaabot sira sadto logar na agko tobig, sagkud sinnabi so lalaki, ?Silngi, agko tobig sadi. Ono pa nakauulang tanganing mabunyagan ako?? ³⁷ Sinnabi si Felipe, ?Kin nagtotobod ika sa bilog mong poso, sigi.? Sinnimbag iya, ?Nagtotobod ako na si Jesu Cristo amo a Igin ka Diyos.? ³⁸ Pinapondo niya so karwahe, sagkud linnosbog sirang darwa sadto tobig pagkatapos binunyagan iya ni Felipe. ³⁹ Pag-awas nira sadto tobig, a Espirito ka Kagorangan kinoko si Felipe, sagkud diri na iya nabayad otro ko eunoko. Alagad nagpadagos iya sa pagbyayi na malang-ogma. ⁴⁰ Namangno na sana ni Felipe na sadto na iya Azoto, sagkud sa pag-agi niya sadto bilog na banwaan ipinangadal niya a Maraay na Bareta anggan sa makaabot iya sadto Cesarea.