Gibo 7

So Diskorso ni Esteban

¹ Inonga si Esteban ko pinakanamomoon ko manga padi, ?Matood a manga sombong na adi??

² Sinnimbag si Esteban, ?Manga ngod sagkud manga kag-igin ko, irungga ninyo ako! A Diyos ka kamorawayan nagpabayad ko kanatung ginikanan na si Abraham ko isadto pa iya Mesopotamia, bago iya innistar sadto Haran. ³ Sinabiyan iya ko Diyos, ?Bayaan mo a kanimong banwaan sagkud manga erensiya saka omiyan ika sadto banwaan na ipababayad ko kanimo.? ⁴ Kaya ginnalin si Abraham sa banwaan ko manga Caldeo sagkud innistar sa Haran. Pagkagraan ko kag-igin niyang lalaki, pinalipat iya ko Diyos sa logar na adi, na iniistaran ninyo ngowan. ⁵ Diri iya tinawan sa kairasan sa banwaan na adi, dawa gatikot. Alagad nanoga a Diyos na itatao adi kanya sagkud sa manga kaeerensiyaan niya dawa ko panawon na adto uda pa iya igin. ⁶ Nangosip a Diyos kanya sa arug kading paagi, ?A kanimong kaeerensiyaan mig-istar sa ibang nasyon na buku nirang sadiri. Ooripunun sira sadto sagkud padidipisilan sa luug sa kwarentang taon. ⁷ Alagad padodosaan ko a manga tawong pinagsirbiyan nira bilang oripun, pagkatapos gomagalin sira sa nasyon na an saka somasamba kanaku sa logar na adi.? ⁸ Pangala iminanda ka Diyos ki Abraham a pagtori bilang tanda ko kasondoan nira. Kaya tinori ni Abraham si Isaac sa ikawalong alduw poon sa pagkamundag, amo man ginibo ni Isaac sa igin niyang si Jacob. Ginibo man adto ni Jacob sadto doseng patriarka.

⁹ Nangimon so ibang patriarka ki Jose, kaya ipinabakal nira si Jose sa manga tagaEhipto. Alagad diri iya pinabayaan ka Diyos ¹⁰ sagkud tinabangan iya ko ngamin niyang kasakitan. Tinawan iya ka Diyos sa pabor sagkud kadonongan ko omatobang iya ki Faraon, hadi ko Ehipto, kaya ginibo iyang gobernador ko Ehipto sagkud sadto ngamin niyang nasasakupan.

¹¹ Pangala nagkaagko tag-alup sa bilog na Ehipto sagkud sa Canaan, na nagdara sa grabing pagsakit sagkud a kanatung ginikanan uda makoan sa pagkaun. ¹² Ko maisiyan ni Jacob na agko trigo sa Ehipto, minandaan niyang pomaiyan sadto so kanatung manga ginikanan. ¹³ So pangarwa nirang pag-iyan, nagpabisto si Jose sadto manga ngod niya, kaya naisiyan ko Faraon so manungud ko pamilya ni Jose. ¹⁴ Ipinakoko ni Jose so kag-igin niyang si Jacob sagkud so ngamin niyang pamilya, na sitenta e singko katawo ngamin. ¹⁵ Kaya inniyan si Jacob sadto Ehipto, sagkud sadto na iya nagraan sagkud so kanatung manga ginikanan. ¹⁶ So kandang manga awak dinara sa Shekim, sagkud ilinubung sa lulubngan na binakal ni Abraham sa manga igin ni Hamor.

¹⁷ Ko madali ng mangyari so panoga ka Diyos ki Abraham, malana kadakul ko manga Israelita sadto Ehipto. ¹⁸ Anggan sa nagkaagko bagong hadi sadto Ehipto sagkud buku niyang bistado si Jose. ¹⁹ Pinadipisilan ka hading adi so kanatung manga ginakanan sagkud pinagbutan sira na iapon so manga bagong ipangigin tanganing magraan. ²⁰ Ko panawon na adto namundag si Moises, sagkud buku iyang arug sa ordinaryong igin. Sa luug sa tolong bolan inataman iya sadto baluy nira. ²¹ Ko iapon iya, inampon iya ko igin na raraga ko Faraon sagkud inasikaso na bagana sadiri niyang igin. ²² Tinottoroan iya ko ngamin na kadonongan ko manga tagaEhipto, nagin makapangyariyan iya sa pagngangabil sagkud paggibo.

²³ Ko kwarenta anyos na si Moises, naisipan niyang iyanan so manga kapareyo niyang manga Israelita. ²⁴ Nabayad niyang inaaprusan ko usad na Egipcio so usad kanda, kaya sinorog niya so Israelita sagkud ginuraan so Egipcio bilang pagbalus. ²⁵ Pag-una ni Moises maiintindiyan iya ko kapareyo niyang Israelita na iya ginamit ka Diyos sa pagligtas kanda, alagad diri nira adto naintindiyan. ²⁶ Sonod na alduw, nakabayad iya sa darwang Israelita na nagkakasogot. Iningoa niya na osayun sira, kaya sinnabi iya, ?Manga ngod, ngata ta nagkakasogot kamo?? ²⁷ Alagad idinodoyong iya ko lalaking nangangaprus sagkud sinnabi, ?Siisay man a binnutang kanimo na mamoon sagkud omosgar kanamu? ²⁸ Gosto mo man akong guranun arug ko Egipcio na ginuraan mo sapon?? ²⁹ Ko marungug adto ni Moises, dinnulag iya sagkud inniyan sa Madian, kin sari sadto na iya innistar sagkud nangagom sagkud nagkaagko iya darwang igin na lalaki.

³⁰ ?Pagkaagi sa kwarentang taon, nagpabayad ki Moises so usad na anghel sa paagi sa usad na nagluludab na ababang kawoy, sadto kalangtadan na arani sa Bokid ko Sinai. ³¹ Ko mabayad niya adi napangalas iya. Kaya ko nagrani iya tanganing silngan saigo, narungug niya so boses ko Kagorangnan, ³² ?Ako a Diyos ka kanimong ginikanan, a Diyos ni Abraham, ni Isaac sagkud ni Jacob.? Nangubugkubug sa katakotan si Moises, sagkud diri iya makasilung.

³³ Pangala sinabiyan iya ko Kagorangnan, ?Alinun mo a kanimong sandalyas, ta banal a logar na natitindugan mo. ³⁴ Nabayad ko a kadipisilan ka kanakung banwaan sa Ehipto, narungug ko a manga inadrangay nira kaya napaiyan ako sadi tanganing iligtas sira. Mayang na, ta mamandaan ta ikang bomalik sa Ehipto.?

³⁵ Iya a Moises na isinikwal ko manga Israelita ko sabiyun nira, ?Siisay a binnutang kanimo na mamoon sagkud omosgar kanamu?? Alagad iya a ipinadara ka Diyos tanganing mamoon sagkud lomigtas kanda, sa tabang ko anghel na nagpabayad kanya sadto nagluludab na ababang kawoy. ³⁶ Inalin niya sira sa kadipisilan sa paagi sa manga milagro sagkud manga ngangalasan na ginibo niya sadto Ehipto, sa Polang Dagat sagkud sadto kalangtadan sa luug sa kwarentang taon. ³⁷ Iya man a Moises na sinnabi sa manga Israelita, ?A Diyos migpadara sa usad na propeta galin kaninyo, arug ko pagkamanda niya kanaku.? ³⁸ Sadto iya katiriponan ko manga Israelita sadto kalangtadan, kaiba ko anghel na nag-osip kanya sagkud ko kanatung manga ginikanan sadto Bokid ko Sinai, iya a innako ka oosipun na nagtatao sa boway galin sa Diyos tanganing itao man kanatu.

³⁹ Alagad abu iyang koyogon ko manga ginikanan ta. Kindi, isinikwal iya nira sagkud minawut na bomalik sadto Ehipto. ⁴⁰ Sinabiyan nira si Aaron, ?Igibo mo kami sa manga diyos na mingngona kanamu, ta diri namu isi kin ono na nangyari sa Moises na adi na kinnoko kanamu sa Ehipto!? ⁴¹ Amo adto so panawon na ginnibo sira sa diyosdiyosan na pormang baka. Dinadaraan nira adi sa manga atang sagkud nagpiyesta sira sa pag-omaw ko ginibo nira. ⁴² Holi kadi, binayaan sira ko Diyos sagkud pinabayaan na somamba sa manga diyosdiyosan. Arug ka nasosorat sa libro ko manga propeta,

?Banwaan na Israel, bukung ako a tinawan ninyo sa atang

sa luug sa kwarentang taon sadto kalangtadan.

⁴³ Daradara ninyo so tolda ni Moloc

sagkud a bitoon ka diyosdiyosan ninyong si Refan,

manga diyosdiyosan na ginibo ninyo tanganing pagsambawun.

Kaya iaapon ko kamo sadto pa loyo ka Babilonia? .

⁴⁴ A Tolda sa Pagpapatotoo kaiba ka kanatung manga ginikanan ko sadto pa sira kalangtadan. Ginibo a Toldang adi sa pagbuut ka Diyos ki Moises, pareyo ko aarugan na ipinabayad kanya. ⁴⁵ Minana adto ko kanatung manga ginikanan, sagkud dinara sa raga na kinoko nira sa manga tawong ipinadaug ka Diyos sa pangongona ni Josue. Nagtiner adi sadto anggan sa panawon ni David, ⁴⁶ na namuy'an ka Diyos sagkud nagpatuud na tomotogrok sa baluy para sa Diyos ni Jacob. ⁴⁷ Alagad si Solomon na so nagpatindug ko baluy para sa Diyos.

⁴⁸ Alagad a Kaoroalangkawing Diyos diri nag-iistar sa baluy na ginibo sa tawo. Arug ko sinabi ko propeta:

⁴⁹ A langit amo a kanakung trono, sabi ka Kagorangnan,

sagkud a kinaban amo a kanakung tongtongan.

Onong klaseng baluy a itotogrok ninyo para kanaku?

O sari a logar na pigpaingaloan ko?

⁵⁰ Bukung ako a ginnibo ka ngamin na adi?

⁵¹ Ka manga kusung ninyo! Diri pa nagbabago a kaninyong poso sagkud abu ninyong irunggun a kamatoranan! Kin ono so ginibo ko manga ginikanan ninyo, amo man a ginigibo ninyo: pirmi kamong nagkokontra sa Espirito Santo! ⁵² Agko raw basang dawa usad na propeta na diri pinadipisilan ka manga ginikanan ninyo? Ginuraan nira so manga nagpapaayag manungud ka pig-abot ka Usad na Matanos. Ngowan trinaydor sagkud ipinaguraan ninyo iya. ⁵³ Kamo a nangag-ako ko layi sa Diyos na itinao kaninyo ko manga anghel alagad diri ninyo adto kinoyog.?

So Pagbato ki Esteban

⁵⁴ Ko marungug adi ko manga kaiba sa Konseho, naungut sira saigo sagkud nagragut so manga ngipun nira sa kaungutan ki Esteban. ⁵⁵ Alagad si Esteban, na pospos sa Espirito Santo, tinnangad sadto langit sagkud nabayad niya so nakasosolang liwanag sa palibot ko Diyos, sagkud si Jesus na nagtitindug sa too ko Diyos. ⁵⁶ Pangala sinnabi, ?Silngi ninyo, nabayad kong binnokas a kalangitan, sagkud a Igin sa Tawo nagtitindug sa too ka Diyos!?

⁵⁷ Tinawban nira so kandang manga talinga, nangagkagrat sagkud runganrungan nirang dinagusu si Esteban, ⁵⁸ sagkud ginodgod palowas sadto banwaan sagkud pinagparabaribad sa bato. Inokas ko manga testigo so manga pang-ibabuw nirang bado sagkud itinagak sadto usad na solterong a ngaran Saulo. ⁵⁹ Mantang pinagbabaribad na si Esteban, nangadyi iya sa arug kadi, ?Kagorangnan na si Jesus, akoa a kanakung espirito.? ⁶⁰ Tinniklod iya sagkud kinnagrat sa makusug, ?Kagorangnan, diri mo sira pagsingilun ka kasalan na adi!? Pagkangabil niya kadi nagraan na iya.