15
Si Jesus a Matood na Poon sa Obas
1 ?Ako sana a matood na poon sa obas, sagkud a kanakung Ama a paraataman. 2 Pinopotol niya a kada sanga na diri namomonga, sagkud tinatakrasan niya a kada sanga na namomonga tanganing orog pang mamonga. 3 Nalinggan na kamo holi ka manga oosipun na sinabi ko kaninyo. 4 Pomirmi kamo kanaku, sagkud ako pomipirmi man kaninyo. Diri namomonga a usad na sanga kin diri adi nakakabit sa poon. Arug man kan, diri kamo mimmonga kin diri kamo pomipirmi kanaku.
5 Ako sana a poon sa obas, sagkud kamo a kanakung manga sanga. A tawong pomirmi kanaku sagkud ako pomirmi kanya mimmonga sa dakul. Ta uda kamo magiginibo kin kamo soway kanaku. 6 A siisay man na diri pomirmi kanaku, arug iya sa sanga na inaapon sagkud nalalaya. A arug kan na manga sanga tinitipon sagkud inaapon sa kalayo sagkud sinosobsoban. 7 Kin pomirmi kamo kanaku, sagkud pomirmi kaninyo a manga oosipun ko, ayatun ninyo a onoman na gosto ninyo, ta itatao yan kaninyo. 8 Napamomorawayan a kanakung Ama kin namomonga kamo sa dakul, sagkud sa paaging adi napamamatoran na manga disipolo ko kamo.
9 Nabubutan ko kamo arug ka pagkabuut kanaku ka kanakung Ama, kaya pomirmi kamo sa pagkabuut ko. 10 Kin kinokoyog ninyo a kanakung manga togon, pomipirmi kamo sa pagkabuut ko, arug ka pagkoyog ko ka manga togon ka kanakung Ama sagkud pinnipirmi ako sa pagkabuut niya.
11 Sinasabi ko kaninyo a ngamin na bagay na adi tanganing makompleto a kaninyong kaogmaan arug ka kanakung kaogmaan. 12 A kamandaan ko amo adi: Magkabinutan kamo sa kada usad arug ka pagkabuut ko kaninyo. 13 Uda pagkabuut na omoorog pa kisa ka pagkabuut ka usad na tawong itinao a kanyang boway para sa amigo niya. 14 Manga amigo ko kamo kin ginigibo ninyo a manga kamandaan ko. 15 Diri ko na kamo ibibilang na manga mamandaan, holi ta diri isi ka mamandaan a ginigibo ka among niya. Imbes, ibibilang ko kamong manga amigo, holi ta sinabi ko na kaninyo a ngamin na narungug ko sa kanakung Ama. 16 Bukung kamo a pinnili kanaku, ako a pinnili sagkud nagmanda kaninyo na omagi sagkud mamonga sagkud magpadagos a kaninyong bonga, tanganing onoman na ayatun ninyo sa Ama sa ngaran ko, itatao niya kaninyo. 17 Amo adi a togon ko kaninyo: Magkabinutan kamo.?
A Pagkaungut ka diri Nagtotobod ki Jesus
18 ?Kin a kinaban nauungut kaninyo, kaipowan ninyong rumrumun na ona sirang naungut kanaku kisa kaninyo. 19 Kin kamo taga kinaban, mabubutan kamo ka kinaban ta kamo kaiba nira. Alagad pinili ko kamo galin sa kinaban, kaya buku na kamong taga kinaban, amo adi a rason kin ngata ta a kinaban nauungut kaninyo. 20 Rumrumun ninyo so sinabi ko kaninyo, ?Uda mamandaan na mas dakulu kisa kanyang among.? Kin pinirsigir nira ako, pipirsigirun man nira kamo, kin kinoyog nira a manga sinabi ko kokoyogon man nira a manga sasabiyun ninyo. 21 Alagad a ngamin na adi gigibowon nira kaninyo holi kanaku, ta diri nira bistado a nagmanda kanaku. 22 Kin diri ako nag-iyan sadi sagkud nagtottoro kanda, kintana diri sira nagkasala. Alagad ngowan uda na sira sarawtan sa kasalan nira. 23 A siisay man na nauungut kanaku, nauungut man sa kanakung Ama. 24 Kin diri ko kintana ginibo kanda a manga bagay na diri pa nagiginibo ka kiisay man, uda kintana sira kasalan. Alagad nabayad na nira a manga ginibo ko sagkud naungut pa nanggayud na sira kanaku sagkud sa kanakung Ama. 25 Alagad nangyari adi tanganing maotob so nasosorat sa kandang Layi, ?Naungut sira kanaku na uda man rason.?