11
So Pagkagraan ni Lazaro
1 Agko usad na lalaki na nag-iilang na a ngaran Lazaro. Nakaistar iya sa Betania kaiba ko ngod niya na si Maria sagkud si Marta. 2 A Mariang adi amo so binnobo sa paamot sadto tiil ni Jesus sagkud nagponas ko bowok niya. So ngod niyang si Lazaro nag-iilang. 3 Kaya so magngod nagpaabot sa mensayi ki Jesus, ?Kagorangnan, so nabubutan mong amigo nag-iilang.?
4 Ko marungug adi ni Jesus, sinnabi iya, ?Diri iya migraan sa ilang niya. Nangyari adi tanganing mapamorawayan a Diyos, sagkud sa paagi kadi mapamorawayan man a Igin sa Diyos.?
5 Nabubutan ni Jesus so magngongod na Marta, Maria sagkud Lazaro. 6 Alagad ko mabaretaan niyang nag-iilang si Lazaro nagtiner pa iya sa darwang alduw sadto dinagosan niya. 7 Pagkatapos sinabi niya sadto manga parasonod niya, ?Bomalik na kita sadto Judea.?
8 Alagad sinnimbag so manga disipolo, ?Maestro, bukung diri pa nauuban na gosto ikang batowon ko manga Judio? Ngata ika ta bomabalik sadto??
9 Sinnabi si Jesus kanda, ?Bukung agko doseng oras a maggapon? Kaya a manga innaagi sa kaliwanggan diri nasosongkog, ta nababayad nira a liwanag ka kinaban na adi. 10 Alagad a nag-aagi sa gab'i nadadapla, holi ta uda kanda a solo.? 11 Pagkatapos niyang sabiyun adi, sinnabi pa iya kanda, ?A amigo tang si Lazaro natotorog. Omiiyan ako sadto tanganing gisungun iya.?
12 Sinnimbag so manga disipolo, ?Kin natotorog sana iya, Kagorangnan, mararaay pa iya.?
13 Pag-una ko manga disipolo natotorog sana si Lazaro, alagad so buut sabiyun ni Jesus guraan na si Lazaro. 14 Kaya deretsowan na sinabi ni Jesus kanda, ?Guraan na si Lazaro. 15 Alagad nagpapasalamat ako na uda ako sadto holi ta a gigibowon kong milagro para kaninyo, tanganing magtobod kamo kanaku. Mosna, iyanan ta na iya.?
16 Si Tomas na binabaoy na Kambal sinnabi sadto kapareyo niya disipolo, ?Omiba kita kanya, tanganing magraan kitang kaiba niya.?
Si Jesus a Pagkaboway Otro
17 Pag-abot ni Jesus sadto, naisiyan niyang upat na alduw ng ilinubung si Lazaro. 18 Agko tolong kilometro a rayo ka Betania sa Jerusalem, 19 kaya dakul na manga Judio so binnisita ko magngod na Marta sagkud Maria tanganing rangawun sira sa pagkagraan ko ngod nira.
20 Ko marungug ni Marta na omaabot si Jesus, sinabat niya adi, alagad natagak si Maria sadto baluy. 21 Sinnabi si Marta ki Jesus, ?Kin sadi kintana ika, Kagorangnan, diri kintana nagraan so ngod ko! 22 Alagad dawa ngowan isi ko na itatao kanimo ka Diyos a onoman na ayatun mo kanya.?
23 Sinnabi si Jesus kanya, ?Maboboway otro so ngod mo.?
24 Sinnimbag si Marta, ?Isi ko po na maboboway iya otro sa oring alduw.?
25 Sinnabi si Jesus kanya, ?Ako sana a pagkaboway otro sagkud a boway. A siisay man na magtobod kanaku maboboway, dawa sira nagraan na. 26 A siisay man na naboboway sagkud nagtotobod kanaku diri migraan kono pa man. Naniniwala ika ka sinasabi ko??
27 Sinnimbag si Marta, ?Amo po, Kagorangnan, nagtotobod po ako na ika a Cristo, a Igin sa Diyos, na pinag-uulat na omiiyan sadi kinaban.?
Tinnangis si Jesus
28 Pagkasabi niya kadi, innoli na iya. Binaoy niya si Maria sagkud ining-ingan, ?Innabot a Maestro sagkud inaanap ika.? 29 Ko marungug adi ni Maria, tinnindug iya sagkud dalidaling iniyanan si Jesus. 30 (Diri pa si Jesus nakaluluug sa Betania. Sadto pa nanggayud iya sinabatan kanya ni Marta.) 31 Ko mabayad ko manga Judiong nakikidomamay na tinnindug si Maria sagkud dalidaling linnowas, sinondan nira iya sa pag-unang mig-iyan sadto linubngan tanganing sadto manangis.
32 Pag-abot ni Maria sadto ki Jesus, tinniklod iya sadto atobangan niya sagkud sinnabi, ?Kin sadi kintana ika, Kagorangnan, diri kintana nagraan so ngod ko!?
33 Ko mabayad ni Jesus si Maria na nagtatangis, sagkud so manga kaiba niyang Judio na nagtatangis man, natanyug saigo so poso niya. 34 Kaya inonga sira ni Jesus, ?Sari ninyo iya ilinubung??
Sinnimbag sira, ?Mayang po, Kagorangnan, sagkud baydun ninyo.?
35 Tinnangis si Jesus. 36 Kaya sinnabi so manga tawo, ?Baydun ninyo kin gaomno niya kanabubutan si Lazaro.?
37 Alagad nagkapira kanda sinnabi, ?Bukung tinawan niya sa pagsilung so lalaking bota? Ngata ta diri niya napugulan so kagranan ni Lazaro??
Binoway Otro si Lazaro
38 Natanyug otro so poso ni Jesus, kaya inniyan iya sadto pinaglubungan ki Lazaro. Usad ading kweba na ginukpan sa usad na dakulung bato. 39 ?Alinun ninyo a bato,? sabi ni Jesus.
Sinnimbag si Marta na ngod ko guraan, ?Mabata na po a parong kiton, Kagorangnan, ta upat na alduw na po iyang nakalubung!?
40 Sinnabi si Jesus kanya, ?Bukung sinabiyan ko ika na kin magtobod ika, mababayad mo a kamorawayan ka Diyos?? 41 Pangala, inalin nira so bato. Tinnangad si Jesus sa langit sagkud sinnabi, ?Nagpapasalamat ako kanimo, Ama, ta inirungug mo ako. 42 Isi ko na iniirungug mo po ako pirmi, sagkud sinasabi ko adi para sa kapakanan ka manga nasa palibot ko tanganing maniwala sirang ika a nagmanda kanaku.? 43 Pagkasabi niya kadi, kinnagrat iya, ?Lazaro, lomowas ika!? 44 Linnowas si Lazaro, so kamut niya sagkud paa napupuruputan pa ko manga telang lino, sagkud napopotos sa panyo so lalawgun niya. Sinabi ni Jesus kanda, ?Alinun ninyo a manga nakapuruput kanya sagkud paagiyun.?
So Plano Kontra ki Jesus
(Mt. 26:1-5; Mk.14:1-2; Lk. 22:1-2)
45 Dakul sadto manga tawong binnisita kanda ki Maria so nagtobod ko mabayad so ginibo ni Jesus. 46 Alagad agko man nagkapira kanda so inniyan sadto manga Pariseo sagkud ibinareta so ginibo ni Jesus. 47 Kaya ipinabaoy ko manga namomoon ko manga padi sagkud ko manga Pariseo so ngamin na miyembro ko Sanedrin na Konseho ko manga Judio. Sagkud ko magkatipon na sira, sinnabi sira, ?Ono gigibowon ta? Dakul ng milagro a ginigibo ka tawong adi. 48 Kin pababayaan ta sana iya, a ngamin na tawo miniwala kanya. Kin mangyari yan, lolosobon kita ka manga soldados na Romano sagkud rurumpagun nira a templo sagkud a kanatung nasyon.?
49 Alagad usad kanda, si Caifas, pinakanamomoon na padi ko taon na adto sinnabi, ?Uda kamo pagkaisi! 50 Diri ninyo naiintindiyan na mas makararaay para kaninyo na magraan a usad na tawo para sa banwaan kisa a bilog na nasyon?? 51 Alagad diri iya nagngabil para sa sadiri niyang kabutan, kindi, bilang iya a pinakanamomoon na padi ko taon na adto, ipinaayag niya na si Jesus kaipowan na magraan para sa manga Judio, 52 sagkud buku sanang para kanda, kindi para sa manga igin ka Diyos na nagkasowaysoway, tanganing tiponon sira sagkud pagkausadun.
53 Poon kadto, plinano na nirang guranun si Jesus. 54 Kaya buku ng ayagan na nagpabayad si Jesus sa manga Judio. Imbes, nag-iyan iya sa logar na arani sadto kalangtadan, sa usad na banwaan na kin baoyon Efraim. Sagkud innistar iya sadto kaiba so manga disipolo.
55 Arani na kadto so Piyesta ka Paskowa, sagkud dakul na manga tawo na galin sa manlainlain na banwaan so inniyan sadto Jerusalem tanganing gibowon so ritwal sa paglilinig bago magpiyesta. 56 Inaanap nira si Jesus, sagkud nag-inongaan sira sadto templo, ?Ono sa pag-una ninyo? Omiiyan raw iya sadi ka piyesta?? 57 So manga namomoon ko manga padi sagkud manga Pariseo nagtao na sa kamandaan na kin siisay a nakaiisi kin sari si Jesus isombong kanda tanganing maiparakup nira.