10
A Parabola manungud ka Paraataman sagkud Karnero
1 Nag-osip pa si Jesus sa paagi sa parabola, ?Sinasabi ko kaninyo a kamatoranan, a linnuluug sa lauman ka manga karnero na diri innaagi sa tamang pwertaan, sagkud ginnogono sa alad, mataban sagkud bandido. 2 Alagad a linnuluug sa pwertaan ka lauman amo yan a matood na paraataman ka manga karnero. 3 Pinapaluug iya ka bantay sa pwertaan, sagkud bistado ka manga karnero a boses niya. Binabaoy niya a manga karnero sa kanyakanyang ngaran, sagkud ilinolowas sa lauman. 4 Kin mailowas na niya a manga karnero, maoona iya kanda sagkud sinnosonod man a manga karnero ta bistado nira a boses niya. 5 Diri sira nagsosonod sa iba, imbes, padalagan sirang nagrarayo sa tawong an, holi ta diri man nira bistado a boses niya.?
6 Sinabi ni Jesus kanda a parabolang adi, alagad diri nira maintindiyan kin ono a buut niyang sabiyun.
Si Jesus a Maraay na Paraataman
7 Kaya sinnabi otro si Jesus, ?Sinasabi ko kaninyo a kamatoranan, ako sana a pwertaan na inaagyan ka manga karnero. 8 Agko manga paratottorong naona kanaku na arug sa manga mataban sagkud bandido. Alagad diri sira inirungug ka manga karnero ko. 9 Ako sana a pwertaan. A siisay man na linnuug sa paagi ko maliligtas. Magigin arug iya ka karnero na libreng nakaluluug sagkud nakalolowas sa lauman, sagkud makatotorak sa sabsabun. 10 Ta inniyan sadi kinaban a mataban tanganing manaban, gomuraan sagkud manraut. Alagad inniyan ako sadi tanganing magkaagko kamo boway, boway na ambonda sagkud kompleto.?
11 ?Ako sana a maraay na paraataman. Sagkud a maraay na paraataman andang iatang a boway niya para sa manga karnero. 12 Buku iyang arug ka manga tawong tinatangranan tanganing magbantay ka manga karnero. Holi ta bukung kanya a manga karnero, binabayaan niya a manga adi pag nakababayad iya sa manga rungaw na innaabot. Kaya tinataban kadi a manga karnero sagkud pinagsosowaysoway. 13 Dinnudulag iya, kwasang pinagtatangranan sana iya, sagkud uda pagmakulug sadto manga karnero.?
14-15 ?Ako sana a maraay na paraataman. Kin paono akong nabibisto ka kanakung Ama sagkud kin paono ko iyang nabibisto arug man kan a pagkabisto ko sa kanakung manga karnero sagkud a pagkabisto nira kanaku. Sagkud iinatang ko a kanakung boway para kanda. 16 Agko pa ako ibang karnero na uda sa lauman na adi. Kaya kinakaipowan ko man sirang koon. Iirunggun nira a boses ko, sagkud a ngamin na manga nag-iirungug kanaku magigin usad na kawan na sana na agko usad na paraataman. 17 Nabubutan ako ka Ama, ta iinatang ko a boway ko para kanda, pagkatapos kadi maboboway ako otro. 18 Uda makakokoko ka kanakung boway. Itinao ko adi sa sadiri kong kabutan. Agko ako kapangyariyan na itao adi, sagkud agko man ako kapangyariyan na koon adi otro. Amo adi a iminanda kanaku ka kanakung Ama na kaipowan kong gibowon.?
19 Holi sa sinabing adi ni Jesus nagkaagko na naman pagkabangabanga so manga Judio. 20 Dakul kanda sinnabi, ?Sinasaniban iya sa demonyo sagkud nakakapay na. Ngata ta nag-iirungug kamo kanya??
21 Alagad so iba sinnabi kanya, ?Diri makangangabil sa arug kan a sinasaniban sa demonyo. Makapagpaboklat raw ka bota a demonyo??
Pinorbaran na Rakupun si Jesus ko manga Namomoon na Judio
22 Tag-agnuw na kadto ko omabot so pagsilibrar ko Piyesta sa Pagdidikar ka Templo sadto Jerusalem. 23 Sagkud nag-aagi si Jesus sa parte ko Templo na kin baoyon Asotiya ni Solomon. 24 Pinalibotan iya ko manga Judio sagkud sinnabi, ?Anggan kono mo itatago kanamu kin siisay ika talaga? Kin ika na talaga a Cristo sabiyun mo na kanamu sa ayagan.?
25 Sinnimbag si Jesus kanda, ?Sinabi ko na kaninyo, alagad abu ninyong maniwala kanaku. A ginigibo kong manga milagro sa ngaran ka kanakung Ama amo nagpapatonay manungud kanaku. 26 Alagad diri kamo naniniwala kanaku, ta buku ko kamong manga karnero. 27 Nag-iirungug kanaku a manga karnero ko. Bistado ko sira sagkud sinnosonod sira kanaku. 28 Tinawan ko sira sa boway na uda kasagkuran, sagkud kono man diri sira mapapaamak, sagkud uda siisay man na makaaaguw kanda kanaku. 29 Itinao sira kanaku ka kanakung Ama na mas orog na makapangyariyan sa ngamin. Uda makaaaguw kanda sa kamut ka kanakung Ama. 30 Ako sagkud a Ama usad sana.?
31 Ko marungug adi ko manga namomoon kanda, pinnorot sira otro sa bato tanganing batowon iya. 32 Alagad sinnabi si Jesus kanda, ?Ipinabayad ko kaninyo a dakul na manga mararaay na bagay na ipinagigibo kanaku ka Ama. Ari sa manga adi a rason ta gosto ninyo akong batowon??
33 Sinnimbag so manga Judio, ?Diri namu ika babatowon holi ka maraay mong gibo, kindi sa pagbasangbasang mo sa Diyos. Holi ta sinasabi mong ika Diyos alagad tawo man sana ika.?
34 Sinnimbag si Jesus, ?Bukung nasosorat sa Layi ninyo na sinabi ka Diyos, ?Manga diyos kamo?? 35 Manga diyos a baoy ka Layi sa manga pinagkatiwalaan ka oosipun ka Diyos, sagkud diri pwedeng balewalaun a sinasabi ka Kasoratan. 36 Ako a pinili sagkud iminanda ka Ama, paono ninyo ngowan masasabi na pigbabasangbasang ko a Diyos holi sa sinabi kong ako a Igin ka Diyos? 37 Kin diri ko ginibo a manga ipinagigibo ka kanakung Ama, diri kamo magtobod kanaku. 38 Alagad kin ginigibo ko adi, dawa abu ninyong maniwala kanaku, paniwalaan ninyo a manga ginigibo ko. Tanganing maintindiyan ninyo na a Ama sadi kanaku sagkud ako isan Ama.? 39 Pinorbaran nirang rakupun otro si Jesus, alagad nakadulag iya.
40 Binnalik otro si Jesus sadto loyo ko salog sa Jordan, sa logar na pinagbunyagan kadto ni Juan, sagkud innistar iya sadto. 41 Dakul na tawo so inniyan kanya. Sinnabi sira, ?Uda ginibong milagro si Juan, alagad ngamin na sinabi niya manungud sa tawong adi matood.? 42 Sagkud dakul sa logar na adto so nagtobod ki Jesus.