6
Pinakaun ni Jesus so Singko Mil Katawo
(Mt. 14:13-21; Mk. 6:30-44; Lk. 9:10-17)
1 Pagkatapos kadi, linnoyo si Jesus sadto Ranuw ko Galilea, na binabaoy man na Ranuw ka Tiberias. 2 Sinondan iya ko malakadakul na tawo, holi ta nabayad nira so manga milagrong ginibo niya sa pagpaparaay sadto manga nag-iilang. 3 Tinnokad si Jesus sagkud so manga disipolo niya sa usad na kolod sagkud nag-ula. 4 Arani na kadto so Piyesta sa Paskowa.
5 Nangalagkalag si Jesus sagkud nabayad niya so maladakul na tawong innaabot, pangala inonga niya si Felipe, ?Sari kita makababakal sa pagkaun tanganing makakaun a manga tawong adi?? 6 (Sinabi niya adi tanganing porbaran si Felipe, ta isi na niya kin ono gigibowon.) 7 Sinnimbag si Felipe, ?Dawa tabi dosentos na denaryonga tinapay a bakalun ta kolang pa tanganing pakaunun sira dawa tiggagatikot.?
8 Sinabi man ko usad sa manga disipolo niyang si Andres na ngod ni Simon Pedro, 9 ?Agko sadi usad na igin na lalaki na agko daradarang limang tinapay sagkud darwang isura. Alagad gaomno sana adi sa malakadakul na tawo??
10 Sinnabi si Jesus, ?Paulaun ninyo a manga tawo.? Innula man so manga tawo holi ta madoot sa logar na adto. So bilang ko manga lalaki sana singko mil. 11 Kinoko ni Jesus so tinapay sagkud nagpasalamat sa Diyos. Pangala ipinanao sadto manga tawong nakaula, amo man ginibo niya sadto isura, sagkud nabosog so ngamin.
12 Ko makakaun na sira, sinabi ni Jesus sadto manga disipolo niya, ?Tiponon ninyo a ngamin na natudang pagkaun tanganing uda masayang.? 13 Kaya tinipon man nira so ngamin na natuda. Sagkud galin sadto limang tinapay na ipinakaun sadto manga tawo nakatipon pa sira sa doseng tiklis.
14 Ko mabayad ko manga tawo so milagrong ginibo ni Jesus, sinnabi sira, ?Matood na amo na adi a Propetang omaabot sadi kinaban!? 15 Isi ni Jesus na plano ko manga tawo na piritun iyang magin hadi nira. Kaya ginnalin iya sadto sagkud solong nag-iyan otro sadto bokid.
Nag-agi si Jesus sadto Ibabuw ko Tobig
(Mt. 14:22-33; Mk. 6:45-52)
16 Ko miggagab-i na, nag-iyan so manga disipolo ni Jesus sadto gilid ko ranuw. 17 Mangitngit na sagkud diri pa nag-aabot si Jesus. Kaya linnonad na sana sira sa bangka sagkud nagsakuy paiyan sa Capernaum. 18 Sagkud mantang nagsasakuy sira, nagpoon ng magkusug so angin sagkud so alun dinnakulu. 19 Ko makasagwan sira sa manga lima o unum na kilometro, nabayad nira si Jesus na nag-aagi sadto ibabuw ko tobig parapo sadto bangka, kaya nakatakot sira saigo. 20 Alagad sinnabi si Jesus kanda, ?Diri kamo makatakot. Ako adi!? 21 Kaya maogma nirang pinalonad si Jesus sadto bangka, sagkud nakaabot tolos so bangka sadto logar na paiiyanan nira.
Inanap ko manga Tawo si Jesus
22 Sonod na alduw so manga tawong natagak sadto pangpang ko ranuw naisiyan na agko sana usad na bangka sadto. Isi nirang bukung kaiba si Jesus ko manga disipolo ko maglonad sadto bangka holi ta sira sana so naggalin. 23 Agko nagkapirang bangka na galin sa Tiberias na rinnoong sadto logar na arani sadto pinagkaunan ko manga tawo pagkatapos na magpasalamat a Kagorangnan. 24 Ko mamangno ko manga tawo na uda sadto si Jesus, sagkud so kanyang manga disipolo, linnonad sira sadto bangka sagkud nag-iyan sa Capernaum tanganing anapun si Jesus.
Si Jesus a Tinapay ka Boway
25 Ko mabayad na ko manga tawo si Jesus sadto loyo ko ranuw, inonga nira iya, ?Rabbi, kono pa po ika sadi??
26 Sinnimbag si Jesus kanda, ?Sa kamatoranan sinasabiyan ko kamo, inaanap ninyo ako bukung holi sadto manga milagrong nabayad ninyong ginibo ko, kindi ta nakakaun kamo ko tinapay sagkud nabosog. 27 Diri kamo magpagal para sa pagkaun na nalulupa, kindi para sa pagkaun na diri nalulupa sagkud nakapagtatao sa boway na uda kasagkuran. Akong Igin sa Tawo a migtao kaninyo ka pagkaun na adi, ta ako a tinawan ka Diyos Ama sa kapangyariyan na magtao kadi.?
28 Kaya inonga ko manga tawo si Jesus, ?Ono po a kaipowan namung gibowon tanganing magibo namu a kabutan ka Diyos??
29 Sinnimbag si Jesus, ?Amo adi a ipinagigibo ka Diyos kaninyo, magtobod kamo kanaku na iminanda niya.?
30 Sinnimbag sira, ?Onong milagro a maipababayad mo kanamu tanganing magtobod kami kanimo? Ono po a gigibowon mo?? 31 ?So manga ginikanan ta nagkaun sa manna sadto kalangtadan, arug ka sinasabi sa kasoratan, ?Tinawan niya sira sa pagkaun na galin sa langit.? ?
32 Sinnabi si Jesus kanda, ?Sinasabi ko kaninyo a kamatoranan, bukung si Moises a nagtao kaninyo sa tinapay na galin sadto langit, kindi a kanakung Ama. Sagkud iya man a nagtatao kaninyo sa matood na pagkaun galin sadto langit.
33 Ta a pagkaun na itinatao ka Diyos uda iba kindi a nagbaba galin sa langit sagkud nagtatao sa boway sa manga tawo sa kinaban.? 34 Sinabi ko manga tawo, ?Maestro, pirmi mo po kaming tawan ka pagkaun na an.?
35 Sinnabi si Jesus kanda, ?Ako a pagkaun na nagtatao sa boway. A siisay man na romapo kanaku diri na mig-alup kono pa man, sagkud a magtobod kanaku diri na mapapaa kono pa man.
36 Alagad sinabi ko na kaninyo nabayad na ninyo ako alagad diri kamo naniwala. 37 A ngamin na tawong itinatao kanaku ka Ama romarapo kanaku, sagkud kono man diri ko isisikwal a manga rinnarapo kanaku. 38 Ta binnaba ako galin sa langit, bukung gibowon ko a sadiri kong kabutan kindi a kabutan ka nagmanda kanaku. 39 Sagkud amo adi so kabutan ka nagmanda kanaku: na diri ko pagpabayaan na agko mauda dawa usad sadto itinao niya kanaku, imbes bowayun ko sira otro sa oring alduw. 40 Ta a kabutan ka kanakung Ama amo adi, na a ngamin na binnibisto sagkud nagtobod sa Igin magkaagko ka boway na uda kasagkuran, sagkud bobowayun ko sira otro sa oring alduw.?
41 Nagngorobngorob so manga Judio holi sa sinabi ni Jesus na iya a pagkaun na galin sa langit. 42 Kaya sinnabi sira, ?Bukung si Jesus an na igin ni Jose? Ngata ta sinasabi niyang binnaba iya galin sa langit, samantalang bistado ta a manga kag-igin niya??
43 Kaya sinnabi si Jesus kanda, ?Diri kamo magparangorobngorob. 44 Uda makararapo kanaku, pwera na sana kin irapo iya kanaku ka kanakung Ama na nagmanda kanaku. Sagkud sa manga romarapo kanaku, bobowayun ko otro sa oring alduw. 45 Oyon sa manga isinorat ko manga propeta, ?Totottoroan sira ngamin ka Diyos.? Kaya a ngamin na nag-iirungug sa Ama sagkud nakatutuud kanya romarapo kanaku. 46 Uda pa nakabayad sa Ama pwera ka usad na galin sa Diyos; iya sana a nakabayad ka Ama.
47 Sinasabi ko kaninyo a kamatoranan, a naniniwala kanaku agko ka boway na uda kasagkuran. 48 Ta ako a pagkaun na nagtataong boway. 49 A manga ginikanan ninyo nagkaun sa manna ko sadto sira kalangtadan, alagad nagraan man sira ngamin. 50 Taadi a tinapay na binnaba galin sa langit, sagkud a siisay man na komaun kadi, diri migraan. 51 Ako sana a boway na pagkaun na binnaba galin sa langit. Kin magkaun kamo ka pagkaun na adi, maboboway kamo anggan pa man. A pagkaun na itinatao ko amo a kanakung awak, na itatao ko tanganing maboway a manga tawo sa kinaban.?
52 Nagdiskotir so manga Judiong nag-iirungug ki Jesus sagkud sinnabi sira, ?Paono maitatao ka tawong adi a awak niya tanganing kaunun ta??
53 Kaya sinnabi si Jesus kanda, ?Sinasabi ko kaninyo a kamatoranan: kin diri kamo magkaun ka awak ka Igin sa Tawo sagkud ominom ka rogo niya, diri kamo migkaagko ka boway na uda kasagkuran. 54 Alagad a magkaun ka awak ko sagkud ominom ka rogo ko agko ka boway na uda kasagkuran, sagkud bobowayun ko otro sa oring alduw. 55 Ta a awak ko a matood na pagkaun, sagkud a rogo ko a matood na inomon. 56 A magkaun ka awak ko sagkud ominom ka rogo ko, migpadagos kanaku, sagkud ako man migpadagos kanya. 57 Isinobol ako ka Ama na pinaggagalinan ka boway, sagkud naboboway ako holi kanya. Amo man, a siisay na magkaun kanaku maboboway holi kanaku. 58 Ako sana a pagkaun galin sa langit. Buku ading arug ko pagkaun na kinaun ko manga ginikanan ninyo, ta nagraan pa nanggayud na sira dawa nagkaun sira kadto. Alagad a siisay man na magkaun ka pagkaun na adi maboboway anggan pa man.? 59 A manga bagay na adi sinabi ni Jesus ko iya nagtottoro sadto sinagoga sa Capernaum.
A manga Oosipun na Nagtatao sa Boway na Uda Kasagkuran
60 Ko marungug adi ko manga disipolo niya, dakul kanda so sinnabi, ?Malanggubat ka itinotottoro niya. Siisay a makaaako kadi?? 61 Dawa uda nagsabi kanya, isi ni Jesus na nagngongorobngorob so manga disipolo niya holi ko itinotottoro niya. Kaya sinabi niya kanda, ?Diri ninyo maako a manga sinasabi ko? 62 Paono pa kaya kin mabayad ninyong akong Igin sa Tawo na binnalik sa dati niyang logar kadto? 63 A Espirito Santo a nagtatao sa boway, diri adi magigibo ka tawo. A manga ipinag-oosip ko kaninyo, galin sa Espirito sagkud nakapagtatao sa boway. 64 Alagad a iba kaninyo diri nagtotobod.? Sinabi adi ni Jesus holi ta isi niya poon pa sa kapinonan kin siisay a manga diri nagtotobod sagkud kin siisay a migtraydor kanya. 65 Irinogang pa niya, ?Amo adi a rason kaya sinabi ko kaninyong uda makararapo kanaku pwera na sana kin buutun ka Ama.?
66 Poon kadto, dakul sa manga disipolo niya so ginnalin sagkud diri na nagsonod kanya.
67 Kaya inonga ni Jesus so dose, ?Gosto man ninyong gomalin??
68 Sinnimbag si Simon Pedro, ?Kagorangnan, kiisay man kami mig-iyan? Isiton kanimo a manga oosipun na nagtatao sa boway na uda kasagkuran. 69 Nagtotobod kami kanimo sagkud isi namu na ika a Banal na galin sa Diyos.?