5
Pinaraay ni Jesus so Usad na Lalaki sadto Betesda
1 Pagkatapos kadi, inniyan si Jesus sadto Jerusalem tanganing makiiba sa usad na piyesta ko manga Judio. 2 Sa syodad na adi, arani sadto Trangkaan ka manga Karnero agko rigosan na kin baoyon sa ngangabilun na Hebreo Betesda.a Sa palibot kadi agko limang asotiya, 3-4 kin sari nakabatang so ngamin na nag-iilang, manga bota, manga pilay, sagkud manga paralitiko.b 5 Agko sadto usad na lalaking trenta e yotsong taon ng agko ilang. 6 Nabayad iya ni Jesus na nakabatang sadto sagkud naisiyan niyang mauban na ading agko ilang. Kaya inonga iya ni Jesus, ?Gosto mong maraay?? 7 Sinnimbag so agko ilang, ?Gosto ko po kintana, Maestro, alagad uda man nagtatabang kanaku sa paglosbog kin linilimog na a tobig. Paiyan pa sana ako agko na ibang naoona kanaku.? 8 Kaya sinnabi si Jesus kanya, ?Bomowat ika! Alsawun mo a batangan mo sagkud omagi ika.? 9 Kadto tolos naraay so lalaki, inalsa so batangan niya sagkud innagi.
Nangyari adi ko Alduw ka Pagpapaingalo. 10 Kaya sinnabi so manga Judio sadto lalaking naraay, ? Bukung Alduw ka Pagpapaingalo ngowan? Kontra sa Layi na alsawun mo a batangan mo.?
11 Alagad sinnimbag iya, ?So lalaking nagparaay kanaku amo sinnabing alsawun ko a batangan ko sagkud omagi.?
12 Kaya inonga iya nira, ?Siisay a lalaking an na sinnabi kanimong alsawun mo a batangan mo sagkud omagi??
13 Alagad diri nabisto ko lalaki kin siisay so nagparaay kanya, holi ta diri niya narisa so paggalin ni Jesus sa kadaklan ko tawo.
14 Pagkangumunngumun, nabayad iya ni Jesus sadto luug ko templo sagkud sinnabi, ?Bayda, maraay na ika ngowan. Diri na ika magkasala ta baka mas grabi pa a mangyari kanimo.? 15 Ginnalin so lalaki sagkud sinabi sadto manga Judio na si Jesus so nagparaay kanya. 16 Kaya poon kadto, pinonan ng pirsigirun si Jesus ko manga namomoon ko manga Judio, ta nagparaay iya ko Alduw ka Pagpapaingalo. 17 Alagad sinnabi si Jesus kanda, ?Padagos na naggigibo a kanakung Ama, kaya padagos man ako sa paggibo.? 18 Holi sa sinabing adi ni Jesus, orog pang minawut ko manga namomoon ko manga Judio na guranun iya. Ta diri sana niya binalgar so layi manungud sa Alduw ka Pagpapaingalo, kindi binaoy pa niyang sadiring Ama a Diyos, sagkud ipinapantay niya a sadiri niya sa Diyos.
A Kapangyariyan ka Igin
19 Kaya sinnabi si Jesus kanda, ?Sinasabi ko kaninyo a kamatoranan, akong Igin sa Diyos uda magiginibo sa sadiri ko sana. Imbes, ginigibo ko sana a nababayad kong ginigibo ka kanakung Ama. Kaya kin ono ginigibo ka Ama amo man a ginigibo ko bilang Igin. 20 Nabubutan ka Ama a Igin kaya ipinababayad niya sa Igin a ngamin na ginigibo niya. Sagkud orog pa ka manga bagay na adi a manga gibong ipababayad niya kanaku, tanganing mangalas kamo. 21 Binoboway otro ka Ama a manga guraan, arug man kan, tinatawan sa boway ka Igin a siisay man na gosto niyang tawan. 22 Bukung a Ama a mig-osgar ka tawo kindi ako na Igin niya, ta itinao niya kanaku a ngamin na kapangyariyan na omosgar, 23 tanganing a ngamin magsamba kanaku arug ka pagsamba nira sa Ama. Kaya ngani, a siisay man na diri magsamba kanaku, diri man nagsasamba sa Ama na nagmanda kanaku.?
24 Sinasabi ko kaninyo a kamatoranan, ?A siisay man na kinnokoyog ka manga oosipun ko sagkud nagtotobod ka nagmanda kanaku agko boway na uda kasagkuran. Diri na iya oosgaran ta ilinipat na iya sa boway galin sa kagranan. 25 Sinasabi ko kaninyo a kamatoranan, ?Omaabot a panawon, sagkud innabot na ngani na marurungug ka manga guraan a boses ka Igin ka Diyos sagkud a omako ka oosipun niya maboboway. 26 Agko kapangyariyan a Ama na magtao sa boway. Arug man kan, ako na Igin niya agko kapangyariyan na magtao sa boway ta itinao na niya a kapangyariyan na adi kanaku. 27 Itinao man niya kanaku a kapangyariyan na mag-osgar ta ako a Igin sa Tawo.? ?
28 Diri kamo mangalas manungud kadi, ta omaabot a panawon na marurungug ka ngamin na guraan a boses niya, 29 sagkud migbangon sira galin sa lulubngan nira. Sagkud so manga ginnibo sa maraay tatawan sa boway na uda kasagkuran, sagkud so manga naggibo sa maraut maboboway otro tanganing padosaan.
A manga Nagpapamatood ki Jesus
30 ?Uda ako magiginibo sa sadiri ko sana. Nag-oosgar ngani ako, alagad a pag-osgar ko oyon sana sa sinasabi ka kanakung Ama. Kaya a pag-osgar ko tama ta bukung a sadiri kong kabutan a sinosonod ko kindi a kabutan ka nagmanda kanaku.
31 Kin ako sana a magpapamatood manungud ka sadiri ko, diri kamo mimmatood ka sinasabi ko. 32 Alagad agko usad na nagpamatood manungud kanaku, sagkud isi ko na matood a sinasabi niya.
33 Magin si Juan na Parabunyag nagpamatood manungud kanaku, sagkud sinabi niya kaninyo a kamatoranan ko magmanda kamo sa nagkapirang tawo tanganing ongaun iya. 34 Sinambit ko a manungud ki Juan, bukung holi sa kaipowan ko a patonay ka usad na tawo, kindi tanganing magtobod kamo kanaku sagkud maligtas. 35 Si Juan arug sa usad na solo na nagluludab sagkud nagliliwanag, sagkud dawa sa gatikot na panawon nag-ogma kamo sa manga inisplikar niya kaninyo.
36 Alagad agko nagpapamatood kanaku na mas orog pa ki Juan. Adi uda iba kindi a manga gibong itinao kanaku ka Ama tanganing gibowon. Amo adi a nagpapamatood na a Ama a nagmanda kanaku. 37 Sagkud a Amang nagmanda kanaku a nagpapamatood man manungud kanaku. Dawa kono diri ninyo narungug a boses niya o nabayad a itsora niya, 38 sagkud diri ninyo inako a oosipun niya holi ta diri kamo nagtobod kanaku na iminanda niya. 39 Pinag-aadalan ninyo saigo a Kasoratan sa pag-una na sa paagi kadi mapapakaninyo a boway na uda kasagkuran. A Kasoratan mismo a nagpapamatood manungud kanaku, 40 alagad abu ninyong romapo kanaku tanganing magkaagko kamo ka boway na uda kasagkuran.
41 Diri ko kinakaipowan a pag-omaw ka manga tawo. 42 Bistado ko kamo sagkud isi kong uda sa poso ninyo a pagkabuut sa Diyos. 43 Inniyan ako sadi, ta tinawan ako sa kapangyariyan ka kanakung Ama, alagad abu ninyo akong akoon. Alagad kin agko usad na omabot na nagngangabil sa sadiri nirang kapangyariyan, inaako ninyo iya. 44 Paono kamo makatotobod kanaku, kin a pag-omaw sana ka kada usad a mawut ninyo, sagkud bukung a pag-omaw na galin sa uusad na Diyos? 45 Diri ninyo pag-isipun na ako a omaakosar kaninyo sa atobangan ka Ama. Si Moises na linalaoman ninyong migtabang kaninyo a mismong mig-akosar kaninyo. 46 Kin talagang naniniwala kamo ki Moises, minniwala man kamo kanaku, ta si Moises mismo nagsorat manungud kanaku. 47 Alagad kin diri kamo naniniwala sa manga sinorat niya, paono kamo minniwala sa manga sinasabi ko??