4
Si Jesus sagkud so Samaritana
1 Ngowan, nabaretaan ko manga Pariseo na mas dakul na a manga tagasonod ni Jesus sagkud dakul na a nabunyagan niya kisa ki Juan. 2 Dawa ngani buku man na si Jesus so nagbubunyag kindi so manga disipolo niya. 3 Ko maisiyan ni Jesus na nabaretaan adi ko manga Pariseo, ginnalin iya sa Judea sagkud binnalik sa Galilea. 4 Kinakaipowan iyang omagi sa Samaria.
5 Kaya nakaabot sira sa banwaan ko Samaria na binabaoy na Sicar, arani adi sadto bokid ni Jacob na itinao sa igin niyang si Jose. 6 Isadto so bobon ni Jacob. Holi ta modtong tungtung na kadto napagal na si Jesus sa pagparabaklay, kaya innula iya sadto gilid ko bobon, tanganing magpaingalo.
7 Agko usad na babaying Samaritanang innabot tanganing magsagub. Sinnabi si Jesus kanya, ?Pwede akong makiinom?? 8 (Uda sadto so manga disipolo niya ta binnabakal sa pagkaun sadto banwaan.)
9 Sinnimbag so Samaritana, ?Judio ika tapos ako Samaritana, ngata ta innaayat ika kanaku sa inomon??a
10 Sinnimbag si Jesus, ?Kin isi mo sana kin ono a regalo na itinatao ka Diyos, sagkud kin siisay ading innaayat kanimo sa inomon, ika a omaayat kanya sagkud tatawan man ika niya sa tobig na nagtatao sa boway.?
11 Sinnimbag so babayi, ?Maestro, malangrarum ka bobon na adi, sagkud uda ika pantabo. Sari ika komokoko sa tobig na nagtatao sa boway? 12 Ono ika mas orog pa kisa kanamung ginikanan na si Jacob, na amo kagtao ka bobon na adi? Iya sagkud so manga igin niya pati so manga ayup nira, sadi nag-inom kadtong panawon.?
13 Sinnimbag si Jesus, ?A ngamin na inninom ka tobig na adi mapapaa otro, 14 alagad a siisay man na ominom ka tobig na itatao ko, diri na mapapaa. Holi ta a tobig na itatao ko magigin arug sa usad na bokal sa poso niya na nagtatao sa boway na uda kasagkuran.?
15 Kaya sinnabi so babayi, ?Maestro, tawan mo po ako ka tobig na sinasabi ninyo tanganing diri na ako mapaa sagkud bomalik pa sadi tangani sanang somagub.?
16 Sinnimbag si Jesus kanya, ?Omoli ika sagkud ipag-iba mo sadi a agom mo.?
17 ?Uda po ako agom.? Simbag niya.
Sinnabi si Jesus kanya, ?Tama a sabi mong uda ika agom, 18 ta lima a nagin agom mo sagkud a kinakaiba mo ngowan buku mong matood na agom. Kaya matood a sinasabi mo.?
19 Sinnimbag so babayi, ?Maestro, sa silung ko usad ikang propeta. 20 A kanamung manga ginikanan nagsamba sa Diyos sa bokid na adi, alagad sinasabi ninyo na sa Jerusalem sana kaipowan na sambawun a Diyos.?
21 Sinnabi si Jesus kanya, ?Maniwala ika kanaku nana, omaabot a panawon na diri na kamo migsamba sa Ama sa bokid na adi o sa Jerusalem. 22 A sinasamba ninyong manga Samaritano diri ninyo bisto. Alagad bistado namung manga Judio a sinasamba namu, ta sa paagi namu ililigtas ka Diyos a manga tawo. 23 Alagad a panawon omaabot, sagkud isadi na ngani, ko ipaayag ka Espirito Santo a kamatoranan ka Diyos, sagkud amo a nagtabang sa manga tawo na magsamba sa Ama sa dawa saring logar. 24 A Diyos Espirito, sagkud sa paagi sana ka kapangyariyan ka kanyang Espirito a tawo pwedeng makapagsamba kanya kin talagang siisay iya.?
25 Sinnabi so babayi, ?Isi ko pong omaabot a Mesias na binabaoy man na Cristo. Sagkud pag-abot niya, iisplikar niya kanamu a ngamin na bagay.?
26 Sinnabi si Jesus kanya, ?Akong kaosip mo a sinasabi mo.?
27 Kadto man innabot so manga disipolo sagkud nabigla sira ko maabotan nirang nakikipag-osip iya sa usad na babayi. Alagad ni usad kanda uda nag-onga sadto babayi kin ono kaipowan, sagkud diri man sira nag-onga ki Jesus kin ngata ta nakikipag-osip iya sadto babayi.
28 Pangala binayaan ko babayi so bangga, binnalik sadto banwaan sagkud sinabi sadto manga tawo. 29 ?Mosna kamo, baydun ninyo so lalaki na nagsabi kanaku ka ngamin na ginigibo ko. Baka iya na a Cristo.? 30 Kaya linnowas sira sadto banwaan tanganing iyanan si Jesus.
31 Mantang so manga disipolo man, nakikimaerak ki Jesus na magkaun na.
32 Alagad sinnimbag si Jesus, ?Agko ako pagkaun na diri ninyo isi.?
33 Kaya nag-inongaan so manga disipolo, ?Agko gayud nagdara kanya sa pagkaun??
34 Sinnabi si Jesus kanda, ?A pagkaun ko amo a paggibo ka kabutan ka nagmanda kanaku sagkud taposon a manga ipinagigibo niya kanaku. 35 Bukung sinasabi ninyong, ?Upat na bolan na sana aniyan na?? Alagad sinasabi ko kaninyo, silngan ninyo a manga tawong nag-aabot, kin baga sa oma inog na manga paruy sagkud anda ng aniyun. 36 A nag-aani nag-aako sa tangran sagkud nagtitipon ka bonga para sa boway na uda kasagkuran. Kaya pareyong namumuya a nagtatanun sagkud nag-aani. 37 Kaya matood a kasabiyan, ?Iba a tinnanum sagkud iba man a innaani.? 38 Iminamanda ko kamo tanganing aniyun a buku ninyong tanum. Iba a nagpagal, sagkud kamo a mig-ani ko pinagpagalan nira.?
Dakul so Nagtobod na manga Samaritano
39 Dakul na manga Samaritano sa banwaan na adto so nagtobod ki Jesus holi ko sinabi ko babayi na isi ni Jesus so ngamin niyang ginibo. 40 Kaya pagrapo ko manga Samaritano ki Jesus, nakimaerak sira na omistar ngona iya sadto kanda. Sagkud innistar iya sadto sa darwang alduw.
41 Dakul pa so nagtobod holi ko manga sinabi niya. 42 Sinnabi sira sadto babayi, ?Nagtotobod na kami ngowan kanya bukung holi ko sinabi mo, kindi kami mismo a nakarungug kanya. Sagkud isi namung iya na talaga a Paraligtas ka kinaban.?
Pinaraay ni Jesus so Igin ko Opisyal
43 Pagkaagi sa darwang alduw, ginnalin na si Jesus sagkud napaiyan sa Galilea. 44 Ta si Jesus man sana a sinnabi na a usad na propeta diri igagalang sa sadiri niyang banwaan. 45 Pag-abot niya sa Galilea, maraay so pag-ako kanya ko manga taga sadto ta nabayad nira so ngamin niyang ginibo sadto Jerusalem ko Piyesta sa Paskowa, ta isadto man sira.
46 Pangala binnisita iya otro sadto Cana, na sakup ka Galilea, kin sari niya ginibong alak so tobig. Sadto man Capernaum agko nag-iilang na igin sa usad na namomoon. 47 Ko mabaretaan niyang innabot na si Jesus sadto Galilea galin sa Judea, iniyanan niya si Jesus sagkud pinakiosipan na parayun so igin niyang nag-iingagdan na.
48 Sinnabi si Jesus kanya, ?Anggan na diri kamo nakababayad sa manga milagro sagkud ngangalasan diri kamo migtobod kanaku.?
49 Sinnabi man so opisyal, ?Maestro, omiba na po kamo kanaku bago pa magraan so igin ko.?
50 Sinnimbag si Jesus kanya, ?Pwede na ikang omoli ta so igin mo maraay na.?
Naniwala so opisyal sa sinabi ni Jesus, kaya napaoli na iya. 51 Mantang nasa raran pa sana iya, sinabat na iya ko manga mamandaan niya sagkud ibinaretang maraay na so igin niya. 52 Kaya inonga niya kin onong oras naraay so igin niya, sagkud sinnimbag sira, ?Sapon po na mig-ala ona sa apon uda na iya kalintora.?
53 Narumruman ko opisyal na ko oras na adto sinnabi kanya si Jesus, ?Maraay na so igin mo.? Kaya iya sagkud so interong pamilya niya nagtobod ki Jesus.
54 Amo adi a pangarwang milagrong ginibo ni Jesus pag-iyan niya sadto Galilea galin sa Judea.