3
Tinottoroan ni Jesus si Nicodemo manungud ka Pagkapangigin Otro
1 Agko usad na lalaki na a ngaran Nicodemo. Usad iya sa manga namomoon ka manga Judio sagkud kaiba sa gropo ka manga Pariseo. 2 Usad na gab'i, inniyan iya ki Jesus sagkud sinnabi, ?Rabbi, isi namung usad ikang paratottoro na ipinadara ka Diyos, ta uda siisay man na makagigibo ka manga milagrong ginibo mo, pwera na sana kin isan kanya a Diyos.?
3 Sinnimbag si Jesus, ?Sinasabi ko kanimo a kamatoranan, pwera na sana kin ipangigin otro a usad na tawo diri niya mamatian a paghahadi ka Diyos.?
4 Nag-onga si Nicodemo, ?Paono maipangingigin otro a usad na tawo kin iya gorang na? Sigoradong diri na man iya pwedeng bomalik otro sa boros ka kanyang ina tanganing ipangigin otro.?
5 Sinnimbag si Jesus, ?Sinasabi ko kanimo a kamatoranan, ?Uda siisay man na makamamati ka paghahadi ka Diyos kin diri iya ipangigin sa paagi sa tobig sagkud Espirito Santo.? 6 Ta a ipinangigin sa paagi sa tawo, tawo. Alagad kin a tawo ipangigin otro sa Espirito ka Diyos, magigin iyang igin sa Diyos. 7 Diri ika mangalas ka sinasabi ko kanimo, ?Kamo ngamin kaipowan na ipangigin otro.? 8 Innooyop a angin dawa sari kadi gosto. Narurungug mo a sagobsob kadi, alagad diri mo isi kin sari iya galin o sari paiyan. Arug man kan a ipinangigin sa paagi sa Espirito Santo.?
9 Nag-onga si Nicodemo, ?Paono po an mingyari??
10 Sinnimbag si Jesus, ?Usad ikang bistadong paratottoro sa Israel, alagad diri mo naiintindiyan adi?? 11 Sinasabi ko kanimo a kamatoranan, sinasabi namu a naiisiyan namu, sagkud pinamamatoranan namu a nabayad namu, alagad diri ninyo adi inako. 12 Kin diri kamo naniniwala sa manga sinasabi ko manungud ka manga bagay sadi kinaban, paono pa kaya kamo miniwala sa manga sasabiyun ko manungud ka manga bagay sa langit? 13 Uda siisay man na tinnaas sadto langit pwera kanaku na Igin sa Tawo, na binnaba galin sa langit.
14 Kin paonong itinaas ni Moises so tansong sawa sadto kalangtadan, arug man kan, akong Igin sa Tawo kaipowan na itaas, 15 tanganing a siisay man na magtobod kanaku magkaagko ka boway na uda kasagkuran.
16 ?Ta arug na sana kan a pagkabuut ka Diyos sa ngamin na tawo sadi kinaban, kaya itinao niya a solosolo niyang igin, tanganing a siisay man na magtobod kanya diri magraana, kindi magkaagko ka boway na uda kasagkuran. 17 Ta diri ipinadara ka Diyos a Igin niya sa kinaban tanganing osgaran a manga tawo, kindi tanganing iligtas sa paagi niya. 18 A nagtotobod kanya diri maoosgaran, alagad a diri nagtotobod kanya naosgaran na, holi ta diri iya nagtobod sa nagsosolong Igin ka Diyos. 19 Arug kadi a pag-osgar ka Diyos: inniyan sadi kinaban a solo, alagad mas nabutan pa ka manga tawo a kangitngitan kisa liwanag, holi ta a kandang manga ginigibo mararaut. 20 A tawong naggigibo ka maraut abu sa liwanag sagkud abu niyang romapo sa liwanag, holi ta abu niyang maayag a manga gibo niya. 21 Alagad a namomoway sa kamatoranan, rinnarapo sa liwanag, tanganing maiayag na a manga ginigibo niya pagsonod sa Diyos.?
A Pagpapamatood ni Juan na Parabunyag manungud ki Jesus
22 Pagkatapos kadi, inniyan si Jesus sagkud so manga disipolo niya sadto Judea. Tinniner sira sadto sa gatikot na panawon sagkud nagbunyag sa manga tawo. 23 Nagbubunyag man kadto si Juan sadto Enon, arani sadto Salim holi ta dakul so tobig sadto. Nag-iiyan kanya so dakul na tawo tanganing magpabunyag. 24 (Diri pa kadto napipriso si Juan.) 25 Pangala agko nakadiskosyon na Judio so manga disipolo ni Juan manungud ka ritwal sa paglilinig. 26 Kaya inniyan sira ki Juan sagkud sinabi nira, ?Rabbi, narurumruman pa po ninyo so lalaking nakaiba mo sadto loyo ko Salog Jordan na ipinabisto mo? Nagbubunyag man po iya sagkud inniiyan kanya a ngamin na tawo.?
27 Sinnimbag si Juan, ?Uda magiginibo a tawo kin diri itogot ka Diyos. 28 Kamo man sana a makapagpamatood ka sinabi kong, ?Bukung ako a Cristo, kindi iminanda sana akong maona kanya.? 29 A nobya para sa nobyo. A abay na nag-uulat ka nobyo grabi a kaogmaan pagkarungug ka boses ka nobyong innaabot. Kaya, kompleto na ngowan a kaogmaan ko. 30 Kinakaipowan na mas orog pa iyang mabisto, sagkud ako man magin sadit.?
Iya na Galin sa Langit
31 Iya na naggalin sa langit mas dakulu kisa ka ngamin. Iya na kaiba sa kinaban, taga kinaban sagkud nagngangabil manungud ka manga bagay sa kinaban, alagad iya na galin sa langit mas dakulu sa ngamin. 32 Ipinapaayag niya a nabayad sagkud narungug niya, alagad uda naniwala ka sinasabi niya. 33 Alagad a naniniwala ka manga paayag niya nagpapatonay na matood a manga sinasabi ka Diyos. 34 Si Jesus na iminanda ka Diyos a nagpaayag ka manga oosipun niya, ta diri masokol a Espirito Santo na itinao kanya ka Diyos. 35 Nabubutan ka Ama a Igin, sagkud itinao niya sadi a pamamaala ka ngamin na bagay. 36 A siisay man na magtobod sa Igin ka Diyos agko ka boway na uda kasagkuran, alagad a diri magkoyog kanya diri migkaagko ka tonay na boway. Sagkud a grabing kaungtan ka Diyos pirming isan kanya.