22
Innoyon si Judas na Traydoron si Jesus
(Mt. 26:1-5; Mk. 14:1-2; Jn. 11:45-53)
1 Arani na so Pista sa Tinapay na uda Lebadora, na binabaoy na Paskowa, 2 sagkud so namomoon ko padi sagkud so manga paratottoro sa layi nag-aanap sa maray na paagi kin paono guguranun si Jesus, ta nakatatakot sira sadto manga tawo.
Nakipagkasondo si Judas sadto manga Kasogot ni Jesus
(Mt. 26:14-16; Mc. 14:10-11)
3 Pangala linnuug si Satanas ki Judas na binabaoy na Iscariote, usad sadto doseng apostol. 4 Sagkud si Judas nag-iyan sadto namomoon ko manga padi sagkud sadto manga namomoon ko manga gwardiya sadto templo sagkud pinag-osipan kin paono niya tatraydoron si Jesus. 5 Naogma sira sagkud nagkaoyon na tawan iya sa sintabo. 6 Nagosto si Judas, sagkud nag-anap sa paagi tanganing iparakup si Jesus na di naiisiyan ko manga tawo.
Pag-aanda sa Panggab'iyan sa Paskowa
(Mt. 26:17-25; Mk. 14:12-21; Jn. 13:21-30)
7 Innabot so Pista sa Tinapay na uda Lebadora, alduw ko pagbono ko karnero para sa Paskowa. 8 Minandaan ni Jesus si Pedro sagkud Juan na a sabi, “Agi na kamo sagkud ianda ninyo a panggab'iyan sa Paskowa na kakaunun ta.”
9 “Sari mo po gosto ianda namu an?” onga nira. 10 Nagsimbag iya, “Sa pagluug ninyo sadto syodad, agko lalaki na agko doro-darang usad na banggang tobig. Somonod kamo sa baluy na luluugan niya, 11 sagkud sabiyun ninyo sadto kagsadiri ko baluy, ‘Ipinaoonga po ni Maestro kin saring kwarto iya migkaun ka Panggab'iyan sa Paskowa, kaiba ko kanyang manga disipolo’ . 12 Ipababayad niya kaninyo a usad na dakulung kwarto sa itaas na nakaanda na so manga gamit. Sadto ninyo ianda so kakaunun ta sa Paskowa.”
13 Nag-iyan sira sagkud nabayad nira so ngamin na sinabi kanda ni Jesus. Inanda nira so Panggab'iyan sa Paskowa.
A Banal na Panggab'iyan ko Kagorangnan
(Mt. 26:26-30; Mk. 14:22-26; 1 Cor. 11:23-25)
14 Ko omabot na so oras, nag-ula na si Jesus sagkud so manga Apostol sadto atobangan ko lamesa. 15 Sagkud sinabi niya kanda, “Uban ko nang minamawut na makaiba ko kamo sadi Panggab'iyan sa Paskowa bago ako magsakit. 16 Ta sinasabi ko kaninyo, ‘Diri na ako migkaun kadi otro anggan na mangyari adi sa kahadian ka Diyos’ .” 17 Pagkatapos kinoko niya so kopa sagkud nagpasalamat sagkud nagsabi, “Koon ninyo adi sagkud baakbabaakun. 18 Ta sinasabi ko kaninyo, ‘Diri ako mig-inom otro ka taguk sa obas anggan na omabot a kahadian ka Diyos’ .” 19 Sagkud kinoko niya so tinapay, nagpasalamat sagkud pinagbaak-baak sagkud itinao kanda sagkud nagsabi, “Amo di a awak ko na itinatao para kaninyo; gibowon ninyo adi sa pagrumrum kanaku.”
20 Sa pareyong paagi, pagkatapos ko panggab'iyan kinoko niya so kopa, sagkud sinnabi, “A kopanga adi amo a bagong tipan ka kanakung rogo na paboboloson ko para kaninyo.
21 Alagad a kamut ka tawong nagtraydor kanaku kaibaan ko ngowan sadi lamesa. 22 A Igin sa Tawo migraan arug ka sinasabi sa Kasoratan, alagad erak man ka tawong adto na nagtraydor kanya!” 23 Nagpoon na sirang mag-orongaan kin siisay kanda so miggibo kadi.
A Pagdiskotir manungud kin Siisay a Pinakadakulu
24 Nagdiskotir so manga parasonod kin siisay kanda bibistowun na pinakadakulu. 25 Sagkud si Jesus sinnabi kanda, “A manga hadi ka kinaban na adi itinataas ka kandang nasasakupan, sagkud a manga agko kapangyariyan nagpapabaoy na paramangno nira. 26 Alagad kamo bukung arug nira. Ta a pinakadakulu kaninyo dapat maging arug sa pinakaigin, sagkud a usad na namomoon kaipowan na magin arug sa tagasirbi. 27 Ta siisay a pinakadakulu, a usad na nakaula sa lamesa o a usad na nagsisirbi? Bukung so usad na nag-uula sa atobangan ko lamesa? Alagad ako kaibaiba ninyo bilang usad na tagasirbi.
28 Kamo a pirming nakakaiba ko sa manga kadipisilan. 29 Kin paonong pinagtatagamaan ako ka Ama sa kahadian, tinatagamaan ko man kamo sa logar sadto; 30 tanganing magkaun kamo sagkud mag- inom na kasabay ko sa kahadian ko, sagkud mig-ula kamo sa manga trono, para osgaran so doseng tribo sa Israel.”
Sinabi ni Jesus so Pagnigar ni Simon Pedro
(Mt. 26:31-35; Mk. 14:27-31; Jn. 13:36-38)
31 Simon! Simon! mag-irungug ika ta inaayat ni Satanas na porbaran kamo arug sa arina. 32 Alagad ipinapangadyi ko ika, Simon, na a pagtobod mo diri mauda. Sagkud sa pagbalik mo kanaku, pakusugun mo a kanimong manga ngod.
33 Sinnimbag si Pedro, “Kagorangnan, anda akong omiba kanimo sa prisowan sagkud sa kagranan!”
34 Nagsimbag si Jesus, “Sinasabi ko kanimo, Pedro, bago magtottoraok a manok ngowan, tolong beses mong didiyaran na bistado mo ko.”
35 Pagkatapos, nag-onga si Jesus kanda, “Ko imanda ko kamo na uda darang pitaka, bag o sandalyas nagkolang raw kamo?”
“Diri basang,” simbag nira. 36 Nagsabi iya kanda, “Alagad ngowan kin agko kamo pitaka, daraa ninyo, amo man a bag; sagkud kin uda kamo sondang ipabakal ninyo a kaninyong manga bado sagkud bomakal sa usad.” 37 Ta nasosorat, “Kaipowan na mangyari kanaku so sinasabi sa Kasoratan, ‘Ibinilang iya sa manga kriminal’ . Amo, a ngamin na nasorat manungud kanaku nangyayari na.”
38 Sinnabi so manga disipolo, “Kagorangnan, agko po kami sadi darwang sondang.”
“Tama na yan,” simbag niya.
Nangadyi si Jesus sadto Bokid ka manga Olibo
(Mt. 26:36-46; Mc. 14:32-42)
39 Arug ko nakaogalian na niya nag-iyan iya sadto Bokid ka manga Olibo, sagkud so manga disipolo niya sinnonod kanya. 40 Pag-abot sadto logar, sinnabi iya kanda, “Mangadyi kamo tanganing di kamo maolog sa sogot.” 41 Nagrayo iya kanda arug sa usad na apon sa bato so distansiya, sagkud tinniklod iya sagkud nangadyi. 42 “Ama, kin kagostowan mo po alinun mo kanaku a kopang adi, alagad bukung a kagostowan ko, kindi a kagostowan mo amo mangyari.” 43 Usad na anghel galin sa langit so nagpabayad kanya tanganing pakusugun iya. 44 Sa dakulung kamunduan nangadyi iya sa maigut, sagkud so kanyang bag'ut bagana rogong nagtotoro sadto raga.
45 Ko iya tapos nang mangadyi, binnalik iya sadto manga disipolo niya na naabotan niyang torog sa sobrang kamunduan. 46 “Ngata kamo ta natotorog?” onga niya kanda. “Bowat kamo sagkud mangadyi tanganing diri kamo maolog sa sogot.”
Rinakup si Jesus
(Mt. 26:47-56; Mk. 14:43-50; Jn. 18:3-11)
47 Mantang iya nagngangabil innabot so kadakul na tawo, na pinangongonaan ni Judas, na usad ko Dose. Rinapo niya si Jesus sagkud inarukan, 48 alagad inonga iya ni Jesus, “Judas, tinatraydor mo a Igin sa Tawo sa paagi ka pag-aruk mo?”
49 Ko mabayad adto ko manga parasonod ni Jesus kin ono so nangyayari, sinnabi sira, “Kagorangnan, tigbasun na namu?” 50 Sagkud so usad kanda tinigbas so mamandaan ko pinakanamomoon ko manga padi sagkud napalong so toong talinga.
51 Alagad sinnimbag si Jesus, “Tama na!” Sagkud rinut’an niya so talinga ko lalaki sagkud pinaraay.
52 Pangala sinabi ni Jesus sadto namomoon ko manga padi, namomoon ko manga bantay, sagkud sadto manga gorang sa banwaan na nag-iyan tanganing rakupun iya, “Kaipowan pa raw na mag-iyan kamo sadi na agko darang sondang sagkud manga pamokpok na bagana baga usad akong kriminal? 53 Oroalduw kaiba ninyo ako sadto templo, alagad diri ninyo ako pigrakup. Alagad oras adi ninyo sagkud a kapangyariyan ka kangitngitan a mingngorog.”
Diniyaran ni Pedro si Jesus
(Mt. 26:57-58, 69-75; Mk. 14:53-54, 66-72; Jn. 18:12-18, 25-27)
54 Rinakup nira si Jesus sagkud dinara sadto baluy ko pinakanamomoon ko manga padi, nagsonod si Pedro sa arayo. 55 Ko naamak na so damag sadto bitnga ko patyo, sagkud nag-ula sira ngamin, nakiula man si Perdo na kaibaan nira. 56 Agko usad na mamandaan na babayi na nakabayad kanya, pinagparatiurungan iya sagkud nagsabi, “A lalaking adi kaiba ni Jesus!” 57 Alagad pinagdiyaran niya adto. “Diri ko iya bisto!” sabi niya. 58 Diri nag-uban usad na lalaki so nakabayad kanya sagkud sinnabi, “Usad man ika kanda!”
“Buku ako!” simbag ni Pedro.
59 Pagkaagi sa usad na oras, agko usad na lalaki na nagpirit, “Sigorado a lalaking adi kaiba niya, ta galin man iya sa Galilea!”
60 Sinnimbag si Pedro, “Diri ko isi kin ono a pinagsasabi mo!”
Nagngangabil pa iya biglang nagtottoraok so manok. 61 Naglilili so Kagorangnan sagkud tiniurungan si Pedro. Kaya narumruman ni Pedro so sinabi kanya ko Kagorangnan, “Bago magtottoraok a manok ngowan, didiyaran mo ko sa tolong beses.” 62 Naglowas iyang nalululduk sa biyo sagkud nagbobora.
Inampak si Jesus ko Bantay
(Mt. 26:67-68; Mk. 14:65)
63 So lalaking nagbabantay ki Jesus pinonan nayyang ampakun sagkud toyatoyaun. 64 Tinawban nira so mata ni Jesus sagkud inonga, “Tukri raw! Siisay a innampak kanimo?” 65 Sagkud kadakul pa nirang sinabing manga pang-iinsolto kanya.
Si Jesus sa Atobangan ni Pilato sagkud Herodes
(Mt. 26:59-66; Mk. 14:55-64; Jn. 18:19-24)
66 Kinaramragan, so manga kagogorangan, sagkud so manga namomoon ko manga padi sagkud so manga paratottoro sa layi nagtipontipon, sagkud iinatobang kanda si Jesus. 67 Sagkud sinabi nira, “Kin ika a Cristo, sabiyun mo kanamu.”
Sinnimbag si Jesus, “Kin sabiyun ko kaninyo, diri kamo migtobod kanaku, 68 sagkud kin ongaun ko kamo, diri man kamo somisimbag. 69 Alagad poon ngowan, a Igin sa Tawo mig-ula sa toong parte ka makapangyariyan na Diyos.” 70 Nag-onga sira ngamin, “Ika a Igin sa Diyos?”
Sinnimbag iya, “Tama kamo sa pagsabi ninyong ako.”
71 Kaya sinnabi sira, “Ngata ta kaipowan pa sa kadakul na testigo? Kita na mismo a nakarungug galin sa sadiri niyang nganga.”