21
So Atang ko Babaying Balo
(Mk. 12:41-44)
1 Nangalagkalag si Jesus, sagkud nabayad niya so manga mayayaman na nag-oolog ko kandang manga atang sadto bubutangan sadto luug ko templo. 2 Nabayad man niya so usad na pobreng balo na nag-olog man sa darwang kosing na sintabo. 3 “Sinasabi ko kaninyo, sabi niya, ‘A pobreng balong adi a nag-olog sa mas maalaga ki sa kanda ngamin’ . 4 Ngamin na tawong adi nagtao sa atang na sobra sana ko kayamanan nira, alagad iya sa kanyang pagkapobre itinao niya ngamin so ngamin niyang ikaboboway.”
Manga Sinyales sa Pagkarugma ka Templo
(Mt. 24:1-2; Mk. 13:1-2)
5 Nagkapira ko manga disipolo niya nag-oosip-osip manungud ka templo na nadedekorasyonan sa malanggagayon na bato sagkud manga atang na itinatao sa Diyos. Alagad sinnabi si Jesus, 6 “Sa manga nababayad ninyo sadi, a panawon mig-abot na uda matutuda ni usad na bato sa ibabuw ka usad na bato ta an ngamin marurugma.”
Manga Kadipisilan sagkud Kariribokan na Mig-abot
(Mt. 24:3-14; Mk. 13:3-13)
7 “Maestro”, onga nira, “Kono raw mingyari a manga bagay na adi? Sagkud ono po a magiging tanda na adi mingyari na?”
8 Sinnimbag iya, “Magbantay kamo, tanganing diri kamo madaya, ta kadakul ka mig-abot sa ngaran ko na migsabi, ‘Ako a Cristo’ sagkud, ‘A panawon arani na’ . Diri kamo magsonod kanda. 9 Kin makarungug kamo sa giyera sagkud paglalabanlaban, diri kamo masindakan; ta a manga bagay na adi kaipowan na mangyari ngona, alagad buku pa yan a kataposan.” 10 Pangala sinnabi pa iya kanda, “Miglaban a nasyon sa pareyong nasyon, sagkud a kahadian kontra sa kahadian; 11 migkaagko manga makukusug na linog, tag-alup sagkud manga peste sa manga manlainlain na logar, sagkud makatatakot na mingyari sagkud dakulung tanda galin sa langit.
12 Alagad bago adi mingyari ngamin, rarakupun sagkud pasasakitan kamo. Dadarawun kamo sa manga sinagoga sagkud prisowan, sagkud iaatobang kamo sa manga hadi sagkud gobernador, sa ngaran ko; 13 amo adi a panawon ninyo na maging testigo kanda. 14 Alagad ibutang ninyo a kaninyong manga kaisipan sagkud diri kamo maporisaw kin paono kamo somisimbag; 15 ta tatawan ko kamo ka manga sasabiyun ninyo sagkud kadonongan na maski a kaninyong manga kasogot diri kayang pugulan. 16 Tatraydoron kamo magin ka manga kag-igin ninyo, ngod na lalaki, manga erensiya sagkud manga amigo, sagkud ipaguguraan nira a iba kaninyo; 17 ngamin na tawo mauungut kaninyo holi kanaku. 18 Alagad ni usad na book sa payo ninyo diri mauuda. 19 Kin makatagal kamo, makokoko ninyo a boway na uda kasagkuran.”
Nagngabil si Jesus manungud sa Pagkarugma ka Jerusalem
(Mt. 24:15-21; Mk. 13:14-19)
20 Kin mabayad ninyo a Jerusalem na napapalibotan sa manga soldados, maiisiyan ninyo na arani na a pagkarugma niya. 21 Sagkud so ngamin na nasa Judea kaipowan nang magdulag paiyan sa bokid, sagkud so manga nasa syodad kaipowan nang maggalin, sagkud so manga sadto bokid di na magluug sa syodad, 22 ta amo adi a alduw ka pagpapadosa, tanganing mangyari so ngamin na nasosorat. 23 Erak man ko manga nangingidam sagkud so manga inang nagpapasoso sa alduw na an! Ta mig-abot a dakulung kadipisilan sadi kinaban sagkud a padosa ka Diyos sa banwaan na adi. 24 Migraan sira sa paagi sa sondang sagkud gigibowon na priso ka ngamin na nasyon. Sagkud a Jerusalem rurugmaun ka manga bukung Judio anggan sa mangyari a panawon nira.
A Pagbalik ka Igin sa Tawo
(Mt. 24:29-31; Mk. 13:24-27)
25 “Migkaagko manga tanda sa alduw, bolan sagkud bitoon. Sadi kinaban, a manga nasyon masisindakan sagkud malilibung ka manga ragungrung sagkud manga agung-ung ka manga dagat, 26 madidismayo a manga tawo sa kaandalan sagkud pagparaisip-isip kin ono a mig-abot sa bilog na kinaban, ta a kapangyariyan ka langit mayuyugyug. 27 Sa oras na an a Igin sa Tawo bomabalik sa usad na panganoron, na agko kapangyariyan sagkud dakulung kamorawayan. 28 Kin a manga bagay na adi magpoon ng mangyari, tomindug kamo sagkud tomangad, ta a kaninyong kaligtasan arani na.”
29 Sinabiyan niya sira sa usad na parabola, “Silngan ninyo a poon sa igos sagkud a ngamin na kawoy. 30 Kin a manga an nabayad ninyo na nagdadawon na, isi ninyo na arani na a tig-initan. 31 Pareyo man kan, kin nababayad ninyo a manga bagay na adi na nangyayari, isi ninyo na a kahadian ka Diyos arani na.
32 Sinasabi ko kaninyo a kamatoranan, ‘Mingyari a ngamin na adi bago magraan a henerasyon na adi. 33 A langit sagkud a kinaban mauuda, alagad a oosipun ko diri mauuda’ . ”
Magmaan Kamo
34 “Magmaan kamo na diri kamo matuud sa kaangapan, irinoman, sagkud sa manga kaporisawan sa boway, ta baka abotan kamo ka alduw na an na bukung andam 35 ta mig-abot an sa ngamin na tawo sa bilog na kinaban. 36 Kaya pirmi kamong magbantay, sagkud mangadyi sa ngamin na oras na magkaagko kamo kusug tanganing makaligtas kamo sa ngamin na mingyariyun, sagkud makaatobang kamo sa Igin sa Tawo.” 37 Oroalduw nagtotottoro si Jesus sadto templo sagkud pagkagab'i nag-iiyan iya sadto Bokid ka manga Olibo tanganing magpaingalo. 38 Malapakasaki so ngamin na tawo nag-iiyan sadto templo tanganing mag-irungug kanya.