20
Pagdorodarwa sa Kapangyariyan ni Jesus
(Mt. 21:23-27; Mk. 11:27-33)
1 Usad na alduw mantang nagtotottoro si Jesus sadto luug ko templo sagkud nangangadal manungud sa Maraay na Bareta, rinnapo kanya so manga namoon ko manga padi sagkud manga paratottoro sa layi kaiba so manga namomoon sa manga banwaan. 2 “Sabiyun mo raw kanamu kin ono a kapangyariyan mong gomibo ka manga bagay na arug kadi?” sabi nira. “Siisay a nagtao kanimo sa kapangyariyan na adi?”
3 Sinnimbag iya, “Oongaun ko man kamo; sabiyun ninyo kanaku: 4 A pagbunyag ni Juan galin sa Diyos o sa tawo?”
5 Kaya nag-osip-osip sira sagkud sinnabi, “Kin sabiyun tang, ‘Galin sa Diyos,’ mig-onga iya, ‘Ngata ta diri kamo tinnobod kanya?’ 6 Kindi kin sabiyun tang, ‘Galin sa tawo, babatowun kita ka manga tawo; ta nagtotobod sirang si Juan usad na propeta’ . ”
7 Kaya sinnimbag sira, “Diri namu isi kin sari an paggalin.”
8 Sinnabi si Jesus, “Diri ko man sasabiyun kaninyo kin ono a kapangyariyan kong gomibo ka manga bagay na adi.”
A Parabola Obasan sagkud manga Tomatawo
(Mt. 21:33-46; Mk. 12:1-12)
9 Innatobang iya sadto manga tawo sagkud sinabi so parabolang adi, “Agko usad na tawong nagtanum sadto kanyang patanuman sa obas, sagkud ipinaasikaso niya adto sa manga tomatawo ta napaiyan iya sa arayong logar sa uban na panawon. 10 Ko oras na sa paggosi, pinaiyan niya so usad na mandaan tanganing koon so kaparteyan niya. Kinding pinagsosontok iya ko manga tomatawo sagkud pinaoling uda dordara. 11 Minnanda iya oli sa usad, kinding pinagsosontok man, sinupug sagkud pinaoling uda dordara. 12 Nagmanda pananggayud iya sa pangatlo, kinding inaprusan nira adto sagkud inapon palowas.
13 Kaya sinabi ko kagsadiri ko patanuman sa obas, ‘Ono gigibowon ko? Maraay pang paiyanun ko sadto a igin kong nabubutan; ta tibaad irespeto nira iya’ .
14 Kindi ko mabayad iya ko manga tomatawo, nangag-osip-osip sira, ‘Amo adi so migmana’ , sabi nira, ‘Guranun ta iya tanganing maiyan kanatu a mamanawun niya’ ! 15 Kaya iinapon iya sadto lowas ko patanuman saka ginuraan.”
Ono kaya a gigibowon kanda ko kagsadiri ko patanuman? 16 Paiiyan iya sagkud guguranun so manga tomatawo sagkud itatao so patanuman sa iba. Ko marungug adto ko manga tawo, sinnabi sira, “Diri man logod mangyari!”
17 Sinilngan sira ni Jesus sa deretso sagkud inonga, “Kin arug kan ono a kaologan ka nasasabing adi sa Kasoratan,
‘So batong inabuan ko manga paratogrok
amo nagin pondasyon na bato’ .
18 A siisay man na maolog sa ibabuw ka batong adi, migkabaribari; sagkud a maologan kadi migkabangabanga.”
19 So manga paratottoro sa layi sagkud so manga namomoon ko manga padi nag-aanap sa paaging marakup iya tolos, ta isi nirang sinasabi ni Jesus so parabolang adto kontra kanda. Kinding nakatatakot sira ko manga tawo.
A Pagbayad sa Bowis ki Cesar
20 Kaya nag-uulat sira sa tamang panawon, nagpadara sira sa migmanman, na migsaginsagin na sinsiro. Naglalaom sirang makararakup ki Jesus sa oosipun tanganing gamitun kontra kanya sa atobangan ko gobernador. 21 Kaya so paramanman inonga iya, “Maestro, isi namung nag-oosip sagkud nagtotottoro ika sa tama, uda ika pinapaorog itinotottoro mo sa paagi ka Diyos a kamatoran. 22 Tama raw an na magbayad kita sa bowis ki Cesar a o buku?”
23 Isi niya so maraut nirang katoyowan kaya sinabi niya kanda, 24 “Pabayad raw sa sintabo. Kiisay na ritrato sagkud ngaran a nakasorat sadi?”
25 “Ki Cesar,” simbag nira.
Sinabi niya kanda, “Kaya itao ki Cesar a para ki Cesar, sagkud sa Diyos a para sa Diyos.”
26 Uda basang kanya narakup na oosipun sadto pigsasabi niya sa atobangan ko pobliko. Sagkud nangalas sira ko simbag niya, kaya diri sira nakapolaw.
A manga Kaongaan manungud sa Pagkaboway Otro
(Mt. 22:23-33; Mk. 12:18-27)
27 Agko nagkapirang Saduceo, na nagsasabing uda pagkaboway otro, na rinnapo ki Jesus ta nag-onga. 28 “Maestro,” sabi nira, “Si Moises nagsorat para kanamu na kin a usad na lalaki magraan sagkud mabayaan so agom na babayi na uda igin, so ngod niyang lalaki pingngagomon a balo tanganing magkaigin sira para ko ngod na nagraan. 29 Agko pitong magngongod na lalaki. So gorang na igin nangagom sagkud nagraan na uda igin. 30 So pangarwa amo man, 31 pangala so pangtolo pinakasalan man so balo, pareyo so manga nangyari anggan sa ikapito, nagraan na uda igin. 32 Sa katapostaposi so babayi nagraan man. 33 Ngowan, sa pagkaboway otro siisay kanda a bibistowon niyang agom mantang so pito ngamin iya pinakasalan?” 34 Sinnimbag si Jesus, “Sa panawon ngowan a manga tawo nangangagom sagkud nagpapakasal. 35 Alagad a siisay man na angay na bowayun sa pagkaboway otro diri na mingngagom o migpaagom, 36 sagkud diri na sira migraan; ta magigin arug sira ka manga anghel. Sira manga igin sa Diyos, ta naboway sira otro. 37 Dawa si Moises ipinababayad na a manga guraan bobowayun, a Kagorangnan binabaoy niyang ‘Diyos ni Abraham, Diyos ni Isaac, sagkud Diyos ni Jacob’ . 38 Buku iyang Diyos ka manga guraan, kinding ka manga boway, san kanya boway a ngamin.”
39 So ibang manga paratottoro sa layi sinnimbag, “Maraay so simbag mo Maestro!” 40 Kaya uda na basang nagporbar na mag-onga kanya.
Ki Isay na Igin si Cristo?
41 Pangala sinnabi si Jesus kanda, “Paonong masasabing a Cristo igin ni David? 42 Si David mismo a nagsabi sa libro ka manga Salmo,
‘So Kagorangnan nagsabi sadto Kagorangnan ko:
Omula ika sadi too ko
43 anggan na gibowon kong
tongtongan ka manga tiil mo a manga kasogot mo’ .
44 Si David binaoy iyang Kagorangnan; paono iya magigin igin ni David?”
45 Mantang so manga tawo nag-iirungug, si Jesus sinnabi sadto manga disipolo. 46 “Magmaan kamo sa manga paratottoro sa layi. Gosto nirang mag-agi palibot na nakasopong sa maabang bado sagkud tawan sa galang sa manga sasaran sagkud magkaagko maraay na ulaan sa sinagoga sagkud kabisera sa manga okasyon. 47 Inoobos nira a manga sadiri ka manga balo sagkud nagsasaginsagin na nangangadyi sa maaba. Mas magubat a kapadosaan na itatao kanda.”