19
Si Zaqueo sagkud si Jesus
1 Nagluug si Jesus sadto Jerico sagkud nag-agi sadto banwaan. 2 Agko sadto lalaki na a ngaran Zaqueo; iya amo namomoon ko manga parasingil sa bowis sagkud mayaman. 3 Gosto niyang mabayad kin siisay si Jesus alagad diri niya mabayad ta iya ababa sagkud kadakul ko manga tawo. 4 Kaya nagdalagan iya sadto onaan ko manga tawo sagkud naggono sa usad na kawoy na a ngaran sikomoro tanganing mabayad niya si Jesus paglabos sadto.
5 Pag-upud ni Jesus sadto kawoy, tinnangad iya sagkud nagsabi, “Zaqueo, baba siton dali. Ta sadto ko baluy ninyo migdagos ngowan.” 6 Dalidaling nagbaba si Zaqueo sagkud maogma niyang pinadagos si Jesus sadto baluy niya.
7 Ko mabayad adto ko ngamin na tawo nagngorob-ngorob sira, “A tawong adi nakikidagos sa baluy ka usad na ‘makasalan’ . ”
8 Alagad nagtindug si Zaqueo sagkud nagsabi ki Jesus, “Silngi, Kagorangnan! Itatao ko sa manga pobre a kabanga ka manga pagsorosadiri ko sagkud kin siisay man so nadaya ko makaupat kong beses na ibabalik kanda.”
9 Sinnabi si Jesus kanya, “Ngowan a kaligtasan nag-abot sa baluy na adi, ta a lalaking adi, igin man ni Abraham. 10 Ta a Igin sa Tawo nag-abot tanganing anapun sagkud iligtas a manga nauuda.”
A Parabola ko Sampolong Mina
(Mt. 25:14-30)
11 Mantang nag-iirungug ki Jesus so manga tawo, nag-istorya iya sa usad na parabola. Ta arani na iya sa Jerusalem, sagkud nag-uuna so manga tawo na madali nang mabayad a Kahadian ka Diyos. 12 Kaya sinabiyan niya sira, “Agko usad na tawo na galin sa iginagalang na pamilya na nag-iyan sa arayong logar, tanganing gibowon na hadi sagkud migbalik pagkatapos kadto. 13 Kaya binaoy niya so sampolo sa manga oripun niya sagkud tinawan sira sa sampolong minaa sagkud sinnabi, ‘Inigosyo ninyo a sintabong adi anggan akong mag-oli.’
14 Alagad malakaungut kanya ko manga kabanwaan niya, kaya ko pakagalin niya nagpadara sira sa mamandaan tanganing sabiyun, ‘Abu namung magin hadi a tawong an!’
15 Ginibo pa nanggayod na iyang hadi, anggan sa napaoli iya. Pangala, ipinabaoy niya so manga mamandaan na tinawan sa mina tanganing maisiyan kin gaomno so tinobo nira.
16 Rinnapo kanya so naona sagkud sinnabi, ‘Maestro, so mina ninyo tinnobo sa sampolo.’
17 ‘Tama a ginibo mo, maraay na mamandaan!’ sabi niya. ‘Ta napagkatiwalaan ika sa sadit na bagay, pimmalaan mo a sampolong syodad.’
18 So pangarwa man rinnapo sagkud sinnabi, ‘Maestro, so mina mo tinnobo man sa lima.’
19 Sinnimbag so kagorangnan niya, ‘Pimmalaan mo a limang syodad.’
20 Pangala so usad naman na mamandaan rinnapo sagkud sinnabi, ‘Maestro, taadi po so mina mo, pinotos ko po sa panyo sagkud itinago; 21 ta nakatakot po ako kanimo, ta mala mong sakit na tawo: kinokoko mo a bukung kanimo sagkud inaani mo a buku mong tanum.’
22 So kagorangnan niya sinnimbag, ‘Oosgaran ta ika oyon sadto sinabi mo, ikang maraut na mamandaan! Isi mo man na lakong sakit na tawo, na kinokoko ko a bukung kanaku, inaani ko a buku kong tanum? 23 Ngata ta diri mo ibinutang sa bangko so sintabo ko, tanganing pag-oli ko, agko ako makokokong porsyento?’
24 Pangala, sinabi niya ko manga nakatindug sadto, ‘Koon ninyo a minang an kanya sagkud itao sadto agko sampolong mina.’
25 ‘Maestro,’ sabi nira, ‘agko na po iya sampolo!’
26 Sinnimbag iya, ‘Sinasabi ko kaninyo na kin siisay a agko, tatawan pa, kinding so uda dawa so gatingay na isan kanya kokoon pa. 27 Alagad sadto manga kasogot ko na abu akong magin hadi, darawun sira sadi sagkud guranun sa atobangan ko’ ! ”
So Mapangganang Pagluug sa Jerusalem
( Mt. 21:1-11; Mk. 11:1-11; Jn. 12:12-19)
28 Pagkatapos ading sabiyun ni Jesus, innona iyang napaiyan sa Jerusalem. 29 Ko iya arani na sa Betfage sagkud Betania, sa bokid na kin baoyon Bokid ka manga Olibo, pinaona niya so darwang disipolo sagkud sinabi kanda. 30 “Omiyan kamo sa sonod na baryo, pagluug ninyo sadto, makababayad kamo sa bisirong asno, na da pa basang nakakakabayo; obadun ninyo sagkud darawun sadi. 31 Kin agko kaninyo mag-onga, ‘Ngata an ta inoobad ninyo’ ? sabiyun ninyo kanyang, ‘Kaipowan adi ka Kagorangnan’ . ”
32 Kaya innagi so manga minandaan sagkud natorakan mananggayud na nira, oyon sadto sinabi kanda. 33 Ko inoobad na nira so asno, so kagsadiri inonga sira, “Taono ta inoobad ninyo a asno?”
34 Sinnimbag sira, “Kaipowan adi ka Kagorangnan.”
35 Kaya dinara nira adto ki Jesus; ikinamadero nira sadto talodtod ko asno so pang-alikbuy nira sagkud pinakabayo si Jesus. 36 Mantang iya nangangabayo, so manga tawo man inaapinan ko kandang manga pang-alikbuy so aagyan niya.
37 Ko iya arani na sa logar na kin sari so aagyan pababa sa Bokid ka manga Olibo, so interong gropo ko manga disipolo maogmang nag-iiyakan na nag-oomaw sa Diyos ko ngamin na ngangalasan na nabayad nira,
38 sagkud nagsabi, “Paladan a hading innaabot sadi sa ngaran ka Kagorangnan!
Katoninungan sa langit sagkud kamorawayan sa kaitaasan!”
39 So nagkapirang Pariseo na kaiba ko kadaklan sinnabi ki Jesus, “Maestro, dawuya man raw a manga disipolo mo!”
40 Sinnimbag si Jesus, “Sinasabi ko kaninyo: Kin pomopondo sira a manga bato amo migkagrat!”
41 Ko arani na iya sa Jerusalem sagkud natatan'aw na so syodad, tinangisan niya adto, 42 sagkud sinnabi, “Kin naiisiyan mo sana sa alduw na adi sagkud kin ono a makatatao kanimo sa katoninungan! Alagad ilum adi ngowan sa pagsilung mo. 43 Ta omaabot a alduw na a manga kasogot mo migtogrok sa kampo kontra kanimo sagkud palilibotan ika sagkud gigipitun sa kada gilid, 44 popolboson ika nira pati manga igin mo ooboson na guguranun. Uda sira itatagak ni usad na bato na nakaloknong sa kapareyo bato, ta diri mo inintindi so pag-abot ka Diyos para iligtas ika.”
Si Jesus sadto Templo
( Mt. 21:12-17; Mk.11:15-19; Jn. 2:13-22)
45 Linnuug iya sadto templo sagkud pinnoon nang ipanobol so manga nagtitinda. 46 Sinabi niya kanda, “Nasosorat: a baluy ko babaoyon na baluy na pangadyian. Alagad ginigibo ninyong baang sa manga mataban.”