Marcos 13

Pagkarugma ko Templo sagkud manga Tanda ka Kataposan

(Mt. 24:1-14; Lk. 21:5-19)

¹ Pagkalowas nira ni Jesus sadto Templo, sinabi ko usad na disipolo ni Jesus, “Bayda ngani Maestro, lang gayon ka manga edepisyo sagkud malakadaddakulu ka manga batong ginamit!” ² Alagad sinnimbag si Jesus, “Nababayad ninyo na lang gayon ka manga edepisyong an ngani? Sabiyan ko kamo na marurugma an, uda matutudang batong magkaloknong, ngamin na edepisyong an rurugmaun.”

³ Pangala ko sadto na sira si Jesus Kolod Olibo sagkud mantang nakaula si Jesus na nakaatobang sadto Templo, pailum iyang inonga nira ni Pedro, Santiago, Juan sagkud Andres. ⁴ Sabi nira, “Pwede tabing sabiyun mo kanamu kin kono adi mingyari? Ono tabi a magigin tanda na adi madali nang mangyari?” ⁵ Sinnimbag si Jesus, “Magmaan kamo na uda kaninyo makaloko. ⁶ Dakul a omaabot na gomgamit ka ngaran ko, sasabiyun nirang sira a Cristo kaya dakul kana maloloko. ⁷ Diri kamo makatakot dawa kin makabareta man kamo sa giyera sa ibang logar o dawa pa kamo mismo a makarungug sa giyera ta kinakaipowan ading mangyari alagad buku pa yan a kataposan. ⁸ Miglabanlaban pa a manga nasyon sagkud manga kahadian sadi raga. Migkaagko pa linog sa manlainlain na logar pangala migkaagko grabing tag-alup alagad poon pa sana yan ka manga kadipisilan arug ka mabrus na nagbabatyag. ⁹ Magin alirto kamo ta ipaparakup sagkud itatao kamo sa manga awtoridad. Pasasakitan kamo sa manga sinagoga. Iaatobang kamo holi ka pagtobod ninyo kanaku sa manga hadi sagkud manga alangkaw na namomoon tanganing magin testigo ko kamo kanda. ¹⁰ Alagad bago a kataposan, kinakaipowan na maipangadal a Maray na Bareta sa ngamin na lahi. ¹¹ Pag rinakup kamo sagkud dinara sa osgado, diri kamo maandal kin ono sasabiyun ninyo. Ka oras na an itatao kaninyo a kaipowan ninyong sabiyun kaya buku kaninyo miggalin a manga sasabiyun ninyo kindi sa Banal na Espirito. ¹² Usad pang mingyari, migtrinaydoran a manga magngongod anggan sa magginuranan. Tatraydoran man ka manga kag-igin a manga igin nira alagad migribildi a manga igin tomang sa manga kag-igin anggan sa guranun nira adi. ¹³ Kadakul ka mauungut kaninyo dail ka pagtobod ninyo kanaku alagad kin makatius kamo anggan sa kataposan, ililigtas kamo ka Diyos.

Makagorogirabong Pagbasangbasang ka Templo

(Mt. 24:15–28; Lk. 21:20–24)

¹⁴ Omaabot a panawon na mababayad ninyo a ‘Makagorogirabong Pagbasangbasang’ ka Templo na kin sari diri dapat adi mangyari. (Intindiun a buut sabiyun kadi ka nagbabasa.) Ka oras na an, siisay man na nasa Judea kinakaipowan domulag na paiyan sa manga kabokidan. ¹⁵ Siisay man nasa ibabuw ka atup diri na magbaba sa baluy tangani sanang agko koon. ¹⁶ Kin agko nagtratrabawo sa oma o tanuman diri na magbalik pa sa baluy tanganing magkoko sa pang-alikbuy. ¹⁷ Ka manga alduw na an malang erak ka manga babaying mabrus sagkud nagpapasoso ta madidipisilan sirang domulag. ¹⁸ Ipangadyi ninyong diri an mangyari sa tag-agnuwan. ¹⁹ A mingyaring adi amo a magigin pinakagrabing kasakitan na mamatian ka tawo poon ko lalangun ka Diyos a kinaban sagkud diri na maootro sagkud pa man. ²⁰ Kin pauubanun ka Diyos a kasakitan na an baka ngamin magraan kaya paaatlukutun niya a panawon ka kasakitan para ka manga nagtotobod kanya. ²¹ Kin agko magsabi kaninyo ka panawon na an, “Isadi si Cristo!” o kaya “Isadto si Cristo!” diri kamo magtobod ²² ta ka manga panawon na an agko manga migsagin-sagin na sira a Cristo sagkud manga propeta. Gomigibo man sira sa manga ngangalasan sagkud manga milagro tanganing lokowon a manga tawo sagkud kin pwede sana pati a manga nagtotobod kanaku. ²³ Kaya sinasabi ko adi kaninyo ngowan pa sana tanganing magin priparado kamo.

Pag-abot ni Cristo

(Mt. 24:29–31; Lk. 21:25–28)

²⁴ Ka panawon na an, pagkatapos ka kasakitan,

migngitngit a alduw sagkud mauudaan sa liwanag a bolan,

²⁵ maoolog man sagkud mauudaan sa liwanag a manga bitoon

pangala mayuyugyug a ngamin na kapangyariyan sa langit.

²⁶ Pangala mababayad ka manga tawo a Igin sa Tawo na migtonga sa bitnga ka panganoron. Pono iya sa kapangyariyan sagkud kamorawayan. ²⁷ Pagkatapos, mamandaan niya so manga anghel na tiponon so manga pinili niya sagkud tinnobod kanya galin sa manlainlain na logar ka kinaban sagkud sa kalangitan.

Leksyon na Naturan sadto Kawoy na Igos

(Mt. 24:32–35; Lk. 21:29–33)

²⁸ Ngowan rumrumun ninyo so buut sabiyun ko parabola manungud ko kawoy na igos na pag a sanga tinotob'an na sa dawon, isi na ninyong arani na a tag-init. ²⁹ Kaya pag nabayad ninyo na nangyayari na adi ngamin, isi na ninyo na omaabot na a sinasabi ko. ³⁰ Sabiyun ko kaninyo na buku pang guraan a ngamin na manga tawo ngowan na panawon bago adi mangyari. ³¹ Mauuda a langit sagkud raga alagad diri mauuda a manga sinabi ko.

Uda ni Usad na Nakakaisi ka Pag-abot ni Cristo

(Mt. 24:36–44)

³² Uda nakakaisi ka alduw o ka oras na an dawa pa manga anghel sagkud dawa pa a Igin ka Diyos. Si Amang Diyos sana a nakakaisi kan. ³³ Kaya magin alirto kamo sagkud mag-andam ta diri ninyo isi kin kono a oras na an. ³⁴ A pagbalik ka Cristo paryo sa usad na lalaking nag-iyan sa arayong logar. Itinagak niya so ngamin niyang pagsorosadiri sadto poder ko manga katabang niya. Minandan niya sira kin ono gigibowon ko kada usad sagkud tinogon a bantay sa trangkaan na magin alirto. ³⁵ Kaya magin alirto kamo ta diri ninyo isi kin kono aabot a Cristo pareyo ko kagsadiri ko baluy. Baka gab-ing omabot o kaya baka lawud o kaya baka mararamragun o kaya baka ramrag na. ³⁶ Baka bigla iyang omabot, maabotan kamong torog. ³⁷ Basta a togon ko kaninyo, itinotogon ko sa ngamin, magin alirto kamo!”