12
Parabola sa Obasan Laban sa manga Namomoon
(Mt. 21:33–46; Lk. 20:9–19)
1 Pagkasimbag ni Jesus kanda, pinonan niyang magtottoro sadto manga tawo sa paagi sa usad na parabola, “Agko usad na lalaking nagtogrok sa obasan. Inaladan niya adi palibot sagkud ginibowan niya adi sa pusaan sa obas. Tinogrokan man niya adi sa usad na tore para sa tagabantay. Pagkagibo niya kadi ngamin, ipinagkatiwala niya adi sadto manga paratanum pangala nagpaiyan iya sa arayong logar. 2 Ko tiggiroan na, pinaiyan niya so usad niyang oripun sadto obasan tanganing ipakoko so kairasan niya. 3 Alagad ginodgod adi ko manga paratanum, binanug pangala pinagalin na uda basang dara. 4 Pangala nagpadara otro so kagsadiri ko tanuman sa usad pang oripun, amo man so ginibo, binanug man adi sa payo sagkud sinupug ko manga paratanum. 5 Nagpadara otro sa oripun so kagsadiri alagad ginuraan adi ko manga paratanum. Nagpadara pa iya sa dakul pang oripun alagad so iba binanug sagkud so iba kanda ginuraan. 6 Kaya usad na sana so pwede niyang ipadara, so solo sagkud nabubutan niyang igin na lalaki. Pangala sa katapostaposi, ipinadara niya so igin niya. Inisip niya na igagalang adi ko manga paratanum ta igin na mismo niya. 7 Alagad ko mabayad ko manga paratanum so igin ko kagsadiri, sinabi nira, ‘Omaabot a panawon na iya a magigin kagsadiri kading raga adi kaya mayna guranun ta iya tanganing mapakanatu a ngamin na ragang adi.’ 8 Kaya ginodgod nira so igin ko kagsadiri, binanug sagkud ginuraan pangala inapon so bangkay sadto lowas ko obasan.”
9 Pangala nag-onga si Jesus, “Ono sa silung ninyo a gigibowon ko kagsadiri ko tanuman? Paiiyan iya sadto tanuman, guguranun so manga paratanum pangala itatao sa iba so tanuman. 10 Ono diri pa ninyo adi nabasa sa Kasoratan?
‘A batong isinikwal ka manga paratogrok sa edepisyo amo ngowan a pinakaimportanting bato sa pondasyon.
11 Amo adi a ginibo ka Diyos kaya makangangalas para kanatu.a’ ”
12 Kaya pinorbaran na rakupun si Jesus ko manga namomoon na manga Judio ta nasalum nirang sira so pinopontirya ko parabola niya alagad nakatakot sira ko manga tawo kaya pinabayaan na sana nira si Jesus tapos naggalin na sira.
Patibong ko manga Pariseo manungud sa Bowis
(Mt. 22:15–22; Lk. 20:20–26)
13 Pangala pinaiyan ko manga Pariseo sagkud ko manga tagasonod ni Herodes so nagkapirang lalaki sadto ki Jesus tanganing anapan iya sa salang sasabiyun. 14 Pag-abot ka manga lalaking adi, nag-onga sira ki Jesus, “Maestro, isi namu na matood sana a manga sinasabi mo. Uda ika tawong kinatatakotan. Uda ika pinapaboran na tawo dawa onoman a istado sa boway. Kamatoranan sana a itinotottoro mo sa manga tawo manungud sa kabutan ka Diyos. Ngowan, sabiyun mo po kanamu kin oyon sa Layi ni Moises na magbayad kami sa bowis sa Emperadorb o diri?” 15 Alagad isi ni Jesus na nagsasagin-sagin sana sira kaya sinabi niya kanda, “Ngata ta pinoporbaran ninyo akong rakpun ka ongang an? Tawi ako sa usad na denaryong ibinabayad sa bowis ta baydun ko.” 16 Kaya tinawan nira iya sa usad na denaryo pangala inonga sira ni Jesus, “Ki isay na lalawgun sagkud ngaran a nakaokit san?” Sinnimbag sira, “Sa Emperador.” 17 Pangala sinabi ni Jesus, “Kin amo yan, itao sa Emperador a onoman na sa Emperador sagkud sa Diyos a onoman na sa Diyos.” Biyong nangalas so manga nag-oonga kanya ko marungug nira so simbag ni Jesus.
Ampangan ni Jesus sagkud ko manga Saduceo
(Mt. 22:23–33; Lk. 20:27–40)
18 Pangala agko innabot na manga Saduceo. Diri sira nagtotobod na maboboway otro a manga guraan kaya inonga nira si Jesus, 19 “Maestro, sinorat tabi ni Moises sa Layi para kanamu na kin an konong agom na lalaki magraan na uda igin kinakaipowan na agomon ko ngod niya so nabalo tanganing magka-agko igin para sadto ngod niyang nagraan. 20 Ngowan po, Maestro, agko po pitong magngod na lalaki. Nangagom po so gorang na ngod alagad nagraan na uda igin. 21 Pangala inagom ko pangarwang ngod so nabalo alagad nagraan man iyang uda igin. Arug man kadi nangyari ko pangatlong ngod, 22 sagkud ko ngamin na mag-ngod. Sa kaori-orii, nagraan man so balo. 23 Ngowan po, pag-abot ka alduw na maboway otro a manga guraan, si isay sadto magngongod na nagraan a magigin agom ko babayi ta ngamin kaya sira nagin agom niya ko naboboway pa?” 24 Alagad sinnimbag si Jesus, “Mala ninyo kasala! Uda basang kamo isi kin ono a itinotottoro ka Kasoratan sagkud kin gaomno kakapangyariyan a Diyos! 25 Tangani ninyong maisiyan, uda na aragoman pa ka alduw na bobowayun otro ka Diyos a manga guraan. Ngamin na bobowayun otro magigin arug sa anghel sadto langit. 26 Ngowan, manungud sa pagkaboway otro, ono diri ninyo nabasa sadto libro na isinorat ni Moises manungud ko mabayad niya so pagludab ko ababang klasing kawoy? Bukung sinabi ko Diyos ki Moises na,
‘Ako a Diyos na sinasamba ni Abraham, a Diyos na sinasamba ni Isaac sagkud a Diyos na sinasamba ni Jacobc?’
27 Intonsis, a Diyos bukung diyos sa guraan kindi sa boway.d Mala ninyo kasala!
Uda na Nagporbar pang Mag-onga ki Jesus
(Mt. 22:34–40; Lk. 10:25–28)
28 Pangala usad sa manga paratottoro so innabot mantang nagdidiskotir si Jesus sagkud so manga Saduceo kaya narungug niya ngamin. Ko mariparo niyang magayon so pagkasimbag ni Jesus ko kaongaan ko manga Saduceo, inonga man niya si Jesus, “Ari tabi a pinakaimportanting kamandaan?” 29 Sinnimbag si Jesus, “Amo adi a pinakaimportanteng kamandaan,
‘Irunggun mo Israel, a Kagorangnan tang Diyos uusad sanang Diyos.
30 Mabutan mo saigo a Kagorangnan mong Diyos ka bilog mong poso, bilog mong kalag, bilog mong isip sagkud bilog mong kusug.’ e
31 A pangarwang pinakaimportanting kamandaan amo na,
‘Mabutan mo a kapwa mo arug ka pagkabuut mo ka sadiri mo.’ f
Uda na iba pang pinakaimportanting kamandaan pwera kading darwang adi.”
32 Sinnimbag so lalaki, “Tama po, Maestro! Matood po na a Diyos usad sana, uda na iba pa. 33 Matood man na kinakaipowan na mabutan a Diyos ka bilog mong poso, bilog mong isip, sagkud intiro mong kusug sagkud mabutan a kapwa mo arug ka pagkabuut mo ka sadiri mo. Mas importante a darwang kamandaan na adi kisa sa ngamin na atang na bilog na sinosobsoban sagkud sakripisyo na itinatao ta sa Diyos.” 34 Ko mabayad ni Jesus na ararum so pagkaintindi ko paratottoro, sinabiyan niya adi, “Arani a paghahadi ka Diyos sa boway mo.” Kaya poon kadto uda na nagkusug buut pang magporbar na mag-onga ki Jesus.
Maogmang Nag-iirungug ki Jesus so manga TagaJerusalem
(Mt. 22:41–46; Lk. 20:41–44)
35 Mantang nagtotottoro si Jesus sadto Templo, nag-onga iya sadto manga tawo, “Ngata ta sinasabi ka manga paratottoro na a Cristo igin ni David? 36 Mismong si Hading David nagsabi sa pangongona ko Banal na Espirito, sabi niya,
‘Sinabi ko Kagorangnan sadto Kagorangnan ko, omula ika sadi too ko sagkud na mapasoko ko a manga kalaban mo.’ g
37 Ngowan, paono magigin igin ni David a Cristo kin si David mismo binaoy na ‘Kagorangnan ko’ a Cristo?” Nagkaoogma so malakadakul na nag-iirungug ki Jesus.
Patanid ni Jesus na Magmaan ka manga Paratottoro
(Mt. 23:1–36; Lk. 20:45–47)
38 Sinabi pa ni Jesus sadto pagtottoro niya, “Diri kamo magpaloko ka manga pangadal ka manga paratottoro. Gosto nirang mabayad ka manga tawo na pirming nakasopong sa maaba tanganing unaun na banal sagkud gosto nirang pirming ginagalangan ka manga tawo sa manga saudan. 39 Amo nira gosto pirming ulaan a manga ulaan na nasa onaan sa manga sinagoga sagkud manga pinakamaraay na ulaan sa ono man na okasyon. 40 Dinadaya nira a manga babaying balo. Sagin-sagin sana a pagpangadyi nira sa maaabang pangadyiun. A manga tawong arug nira amo makamamati sa grabing pagkastigo.”
Pag-atang ko Babaying Balo
(Lk. 21:1–4)
41 Pangala innula si Jesus sadto luug ko Templo, sadto arani ko butangan sa atang. Binabayad niya so manga nagtatao sa atang pangala namangno niya na kadakul na manga mayaman so nagtatao sa dakul na sintabo. 42 Alagad agko man iya nabayad na pobreng babaying balo na tinnao sana sa darwang sinsilyong pinakaababa a kantidad. 43 Pangala pinarapo niya so manga disipolo niya sabay sabi, “Sabiyun ko kaninyo na mas dakul a itinao ka pobreng balong an kisa ko ngamin na nagtao sa atang. 44 Ngamin na nagtao, itinao nira so diri na nira kaipowan alagad a balong an na nangangaipo saigo itinao so ngamin na pagsorosadiri niya.”