11
Pagluug nira ni Jesus sadto Jerusalem
(Mt. 21:1–11; Lk. 19:28–40; Jn. 12:12–19)
1 Ko pairatung na sira si Jesus sagkud so manga disipolo kaiba so dakul na tawo sadto Jerusalem, pinnondo sira sadto gilid ko bokid na a ngaran ‘Bokid ko manga Olibo’ . Arani adi sadto baryo ko Betfage sagkud Betania. Pangala, pinaona ni Jesus so darwang disipolo 2 sagkud minandaan sira, “Maona na kamo sadto sonod na baryo. Pagkaluug ninyo sadto, agko kamo mababayad na nakaguud na asno na diri pa basang nalolonadan. Obadun ninyo adi pangala darawun ninyo sadi. 3 Kin agko kaninyo omonga kin ngata ta inoobad ninyo, sabiyun ninyo, ‘Kaipowan adi ka kagsadiri alagad ibabalik man sana nganud.’ ” 4 Kaya napaiyan man so darwang disipolo. Nabayad nira so asno na nakaguud sa pwertaan ko usad na baluy arani sa tinampo. Ko inoobad na nira adi, 5 inonga sira ko nagkapirang tawong arani sadto, “Ngata ta inoobad ninyo a asno?” 6 Isinimbag ko darwa so itinogon ni Jesus kaya tinogotan sira. 7 Pangala dinara na ko darwa so asno sadto ki Jesus. Inapinan nira adi ko pang-alikbuy nira pangala innula sadi si Jesus. 8 Pangala ko nagluluug na si Jesus sadto Jerusalem, binuklad ko manga tawo so manga pang-alikbuy nira sadto tinampo. So iba, nagkoko sa madawon na sanga sadto tanuman pagkatapos amo ibinutang sadto aagyan ni Jesus.a 9 Pangala nangagkakagratan so manga tawong naoona sagkud nakasosonod ki Jesus,
“Omawun a Diyos! Paladan ana nag-aabot sa ngaran ka Kagorangnan!
10 Paladan a omaabot na kahadian ko ginikanan tang si David. Omawun a Diyos sa kalangitan!”
11 Pagka-abot ni Jesus sadto kasintrowan ko Jerusalem, linnuug iya sadto Templo pangala minangno so manga bagay sadto alagad ko mamangno niyang ginnagab'i na, binnalik iya kaiba so dose sadto logar ko Betania.
Kawoy na uda Bonga sagkud Templo na uda Sirbi
(Mt. 21:12-19; Lk. 19:45–48; Jn. 2:13–22)
12 Kinaudmaan, paggalin nira sadto Betania, nakamati sa pag-alup si Jesus. 13 Pangala agko iya natan'aw na kawoy na a ngaran igos. Malang dawun kadi. Kaya iniyanan niya adi tanganing baydun kin agko bonga alagad uda iya nabayad ta buku pa kayang tigbongaan kadi. 14 Kaya sinabi ni Jesus sadto kawoy, “Magpoon ngowan, uda na makakakaun ka bonga mo.” Narungug adi ko manga disipolo niya.
15 Pag-abot ni Jesus kaiba so manga disipolo sadto Jerusalem, linnuug iya sadto Templo. Pangala powersaan niyang pinagalin so manga nagtitinda sagkud so manga namamakal. Binalintong niya so manga lamesa ko manga parabalyo sa sintabob sagkud so manga bangko ko paratinda sa manga kalapating pang-atang. 16 Ibinawal ni Jesus na uda magdara sa kin onoono na sana sadto luug ko Templo. 17 Pangala sinabi niya sadto manga tawo, “Sinasabi sa Kasoratan na,
‘A istaran ko kaipowan na magin logar sa pagsamba para sa ngamin na nasyon.’
Alagad ginibo ninyo ading ‘kota sa manga mataban’ !”
18 Nabaretaan ko manga namomoon na padi sagkud ko manga paratottoro so sinabi ni Jesus kaya poon kadto nag-anap sira sa paagi kin paono maipaguguraan si Jesus ta nakatatakot sira ta naoogma kaya so manga tawo ko tottoro niya. 19 Pangala ko gab'ing adto naggalin sira si Jesus sagkud so manga disipolo sadto syodad ko Jerusalem.
Naturan na Leksyon Sadto Kawoy na Igos
(Mt. 21:20–22)
20 Pagkaramrag, mantang sira nag-aagi pabalik sadto Jerusalem, namangno ko manga disipolo so nalabosan nirang kawoy na igos na interong laya pati gamot. 21 Pangala narumruman ni Pedro so sinabi ni Jesus sadto kawoy kaya sinabi niya ki Jesus, “Maestro, bayda! Laya na so kawoy na isinompa mo.” 22 Sinnimbag si Jesus, “Magtobod kamo sa Diyos! 23 Sinisigoro ko kaninyo, siisay man magmanda ka kolod na adi na maiyan sa bitnga ka dagat na bilog na nagtotobod, mingyari yan. 24 Kaya tandaan ninyo na onoman na ayatun ninyo sa pagpangadyi sagkud magtobod na mapapakaninyo, mapapakaninyo talaga yan. 25-26 Alagad kin nangangadyi kamo na isi ninyong agko kamo raut sa buut sa iba, patawarun ninyo a tawong an tanganing patawarun man kamo ka manga pagkakasala ninyo ka kaninyong Diyos Ama na nasa langit.”
Atobangan na Pagkontra ko manga Namomoon ki Jesus
(Mt. 21:23–27; Lk. 20:1–8)
27 Pangala nag-iyan otro sira si Jesus kaiba so manga disipolo sadto Jerusalem. Mantang nag-aagi si Jesus sadto natad ko Templo, rinnapo kanya so manga namomoon na padi, so manga paratottoro sagkud so iba pang manga namomoon na manga Judio. 28 Pangala inonga iya, “Ono a kaput mong poder ta pinalayas mo so manga nagtitinda sagkud namam akal sadto luug ko Templo? Sisay kanimo nagtao ka poder na an?” 29 Sinnimbag si Jesus, “Agko ako usad na kaongaan kaninyo. Kin masimbag ninyo, sasabiyun ko kaninyo kin onong poder agko ako kin ngata ta ginibo ko adto. 30 Sari paggalin so poder ni Juan na magbunyag? Ono galin adto sa Diyos o sa tawo?” 31 Pangala sirasira nag-orosipan kin ono isisimbag. Sabi ko iba, “Kin sasabiyun tang galin sa Diyos so poder ni Juan, oongaun kita otro kan ni Jesus sa arug kadi, ‘Arug palan kan, ngata ta diri kamo nagtobod ki Juan?’ ” 32 Diri man nira masabi na galin sa tawo so poder ni Juan ta takot sira sadto manga tawo ta nagtotobod sira na si Juan usad na propeta. 33 Kaya sinabi nira ki Jesus, “Diri namu isi.” Sinnimbag si Jesus, “Diri ko man sasabiyun kaninyo kin siisay nagtao kanaku sa poder kin ngata ta ginigibo ko a manga bagay na adi.”