6
Pinagnigaran si Jesus ko manga Kabanwaan Niya
(Mt. 13:53–58; Lk. 4:16–30)
1 Pangala naggalin si Jesus sadto sagkud nagpaiyan iya sadto Nazaret, so banwaan na dinakul'an niya, kaiba so manga disipolo. 2 Pag-abot ko Alduw ka Pagpapaingalo, nagtottoro si Jesus sadto sinagoga. Nabigla so ngamin na nakarungug ko pagtottoro niya kaya nag-orongaan sira, “Paono nakakapagtottoro a lalaking an? Buku man galin sa Diyos a kapangyariyan sagkud kadonongan ka tawong an. 3 Ta amo man sana yan so karpentirong igin ni Maria. Saka bistado ta baga a manga ngod kan na sira si Santiago, Jose, Judas, sagkud Simon? Pagkatapos, tagasadi man sana baga kanatu a manga ngod niyang babayi.” Pangala naoyam so manga tawo kanya ta bistado iya nira. 4 Kaya nagngabil si Jesus, “Iginagalang a propeta ka ngamin pwera ka manga tawo sa sadiri niyang banwaan sagkud ka manga kapamilya.” 5 Kaya pwera ko naparaay niyang nagkapira sa paagi sa pagruun ko kamut niya, diri iya makagibo sa manga milagro sadto banwaan na adto ta diri kanya tinnobod so manga tawo. 6 Kaya dawa iya nagngalas ko kaudaan nira sa pagtobod kanya. Pangala, nag-iyan iya sadto manga kaabay na banwaan sagkud nagtottoro.
Isinobol ni Jesus na Mangadal so Dose
(Mt. 10:5–15; Lk. 9:1–6)
7 Pinarapo ni Jesus kanya so Dose sagkud mandorodarwang ipinadara sa manlainlain na logar tanganing mangadal. Tinawan niya sira sa kapangyariyan na magpalayas sa maraut na espirito. 8 Alagad tinogon niya sira bago gomalin. Sabi niya, “Diri kamo magdara sa onoman arug ka pagkaun, bag sagkud sintabo pwera sa sogkod. 9 Magsandalyas kamo alagad diri magdara sa sanglian. 10 Pomirmi kamo sa baluy na migpadagos kaninyo anggan na makagalin kamo sa logar na an. 11 Bayaan ninyo a logar na abung magpadagos kaninyo sagkud abung mag-irungug kaninyo. Ipagpag ninyo a talbo sa tiil ninyo bago kamo gomalin sa logar na an ta amo yan a tanda na oosgaran sira ka Diyos.” 12 Pagkasabi kadi ni Jesus, naggaralinan na so Dose paiyan sa manlainlain na logar. Ipinangadal nira sa manga tawo na kaipowan sirang magsulsul ka manga kasalan nira. 13 Nagpalayas man sira sa manga maraut na espirito sagkud nagparaay sa manga nag-iilang gamit so lanang pang-aplas.
Pagraan ni Juan na Parabunyag
(Mt. 14:1–12; Lk. 9:7–9)
14 Malana kaluyap ko bareta manungud ki Jesus kaya naisiyan ni Hading Herodes so manga bagay manungud kanya. Sinabi ngani ko nagkapira, ‘Si Jesus amo si Juan na Parabunyag na ipinaguraan ni Herodes alagad naboway otro kaya holi kadi nakakagibo iya ka manga milagro.’ 15 Sinabi man ko iba, ‘Si Jesus amo si propeta Elias na boway pang tinnaas sa langit.’ Agko pa nagsabi, ‘Si Jesus usad na propetang arug ko manga propeta ko onang panawon.’ 16 Kaya ko marungug ni Herodes a manga sabisabing adi, nagngabil iya, “Iya si Juan na pinapogotan ko. Naboway iya otro!” 17 Nasabi adi ni Herodes ta iya mismo so nagparakup sagkud nagpapriso ki Juan. Ginibo adi niya tanganing mapaogma si Herodias na agom niya na dating agom ko ngod niyang si Felipe. 18-19 Grabi kaya so raut sa buut ni Herodias ki Juan ko pagparasabiyun kadi ki Herodes na, “Bukung tama na agomon mo a agom ka ngod mo man sana.” Sa sobrang kaungtan ngani ni Herodias, gosto niyang ipaguraan si Juan alagad diri niya magibogibo 20 ta takot kayang ipaguraan ni Herodes si Juan ta isi niyang maraay sagkud banal na tawo adi kaya diri niya adi ipinaguraan. Dawa ngani nariribok so konsensiya niya ko manga tottoro ni Juan, naoogma pa nanggayud iyang mag-irungug kadi.
21 Pangala nagkaagko oportonidad si Herodias na ipaguraan si Juan. Nangyari adi ko isilibrar ni Herodes so komplianyo niya. Ko alduw na adto inimbitaran niya so manga opisyal sadto nasasakupan niya, so manga opisyal na soldados sagkud so manga bistadong tawo sa Galilea. 22 Pangala nagkaoogma so manga bisita sagkud si Herodes ko bomayli so igin na raraga ni Herodias sadto atobangan nira. Sa sobrang kaogmaan, sinabi ni Hading Herodes sadto raraga, “Itatao ko kanimo ono man ayatun mo kanaku.” 23 Pangala nanompa pa talaga si Herodes, “Sabiyun mo sana kin ono gosto mo ta itatao ko kanimo, dawa pa a kabanga ka kahadian ko.” 24 Pagkatapos linnowas so raraga paiyan sadto kag-igin niya na si Herodias sabay onga, “Ono po aayatun ko?” Sinnimbag si Herodias, “Ayatun mo a payo ni Juan na Parabunyag.” 25 Pangala, dalidaling binnalik so raraga sadto ki Hading Herodes sabay sabi, “Gosto ko pong itao mo kanaku a payo ni Juan na Parabunyag na nakabutang sa bandiyado, ngowan tolos.” 26 Namundu saigo si Herodes ko marungug niya so inaayat ko raraga, alagad ta nanompa iya sadto raraga na narungug ko ngamin na bisita, diri iya makanigar. 27 Kaya nagmanda tolos iya sa gwardya na pogotan sa payo si Juan. Kaya iniyanan ko gwardya si Juan sadto prisowan pagkatapos pinogotan. 28 Pangala ibinutang niya sa bandiyado so payo ni Juan sagkud itinao sadto raraga pangala itinao man kadi sadto ki Herodias. 29 Kaya ko maisiyan ko manga disipolo ni Juan na guraan na iya, kinoko nira so bangkay niya pagkatapos ilinubung sa kwebang lubungan.
Pinakaun ni Jesus so Singko Mil Katawo
(Mt. 14:13–21; Lk. 9:10–17; Jn. 6:1–14)
30 Pagbalik ko manga minandaan na mangadal sadto ki Jesus, ibinareta nira so ngamin na ginibo nira sagkud itinottoro. 31 Pangala sinabi ni Jesus kanda, “Omiyan kita sa logar na uda tawo tanganing makapaingalo kita dawa gatikot na oras sana.” Sinabi adi ni Jesus ta diri naiinaan so manga tawo sadto logar na namumutangan nira ta dawa ngani magkaun, diri na nira maginibo pa. 32 Kaya ginnalin sira na uda ibang kaiba pangala naglonad sa bangka paiyan sa bukung matawong logar. 33 Alagad nabisto sira ko manga tawo ko naggagalin na sira kaya nagdaralaganan so manga tawo paiyan sadto iiyanan nira ni Jesus. Kaya naona pang innabot sadto so manga tawo kisa ki Jesus. 34 Ko omabot na sira si Jesus sagkud ko makababa na iya sadto pangpang, naerak iya ko mabayad niya so malakadakul na tawo ta bagana sira manga karnerong uda paraataman kaya tinottoroan niya sira sa manlainlain na bagay.
35 Ko mangorongitngit na, rinnapo so manga disipolo ki Jesus sagkud sinabi, “Kalangtadan po ading iniyanan ta saka usad pa, gab'i na po 36 kaya pagalinun mo na po a manga tawo tanganing magbakal sa pagkaun sa manga araning banwaan sagkud tanuman.” 37 Alagad nagsimbag si Jesus, “Kamo mismo a tomao kanda sa pagkaun.” Sinnimbag so manga disipolo, “Buut mong sabiyun kami a migbakal sa tinapay na kantidad sa dosintos na denaryoa tangani sanang ipakaun kanda?” 38 Sinnimbag si Jesus, “Pirang tinapay a dorodara ninyo? Silngi raw.” Ko maisyan nira kin pira, sinnimbag sira, “Agko po kami dorodarang limang pidasong tinapay sagkud darwang isura.” 39 Pangala minandaan ni Jesus so manga disipolo na gropo gropong paulaan so manga tawo sadto berdeng kadodootan. 40 Kaya gropo gropong innula so manga tawo. Agko tigsanggatos katawo kada gropo sagkud agko man tigsingkwenta.
41 Pangala, pagkakoko ni Jesus ko limang pidasong tinapay sagkud darwang isura, tinnangad iya sa langit, nagpasalamat pangala binangabanga so tinapay pagkatapos itinao sadto manga disipolo tanganing ipanao man nira sadto manga tawo. Binangabanga man ni Jesus so isura para sa ngamin. 42 Ngamin na tawo sadto nakakaun sagkud nangagkabobosog. 43 Pagkakaun ko manga tawo, tinipon ko manga disipolo so natudang tinapay sagkud isura. Nakatipon sira sa doseng bakol. 44 Singko mil na manga lalaki so nagkaun ko tinapay sagkud isura pwera pa ko manga babayi sagkud manga igin.
Nag-agi si Jesus sadto Ibabuw ko Tobig
(Mt. 14:22–33; Jn. 6:15–21)
45 Pangala, dalidaling pinalonad ni Jesus sa bangka so manga disipolo sagkud pinaona na niya sadto loyo ko Ranuw Galilea, sadto banwaan na binabaoy na Betsaida mantang inuulat niyang makaoli ngamin na tawo. 46 Pagkapatuud niya sadto manga disipolo, tinnokad iya sadto gilid ko bokid tanganing mangadyi. 47 Pangala ko gab'i na, iya na sana tawo sadto pangpang mantang so bangka man na nalolonadan ko manga disipolo niya sadto na bitnga ko ranuw. 48 Nabayad niyang nadidipisilan so manga disipolo sa pagsagwan ta pasabat kaya sira sa angin. Ko migraramragun na sinnonod iya kanda na nag-aagi sadto ibabuw ko tobig. Lalampasan kintana niya sira 49 alagad ko mabayad iyang nag-aagi sadto ibabuw ko tobig ko manga disipolo niya, nag-una sirang molto iya kaya nangagkagratan sira. 50 Nakatakot sira ngamin na nakabayad kanya. Alagad nagngabil tolos si Jesus, “Diri kamo makatakot! Ako si Jesus, kusugan ninyo buut ninyo.” 51 Pangala linnonad na iya sadto bangka kaiba ko manga disipolo. Pagkalonad niya biglang napondo so makusug na angin. Diri nira maunauna saigo so manga nangyari. 52 Ta dawa nabayad na nira so pagpadakul ko tinapay diri nira maintindiyan so buut sabiyun kadi manungud ka kapangyariyan ni Jesus. Diri nira naintindiyan ta kakusung kaya nira.
Pagparaay ni Jesus sadto Genesaret
(Mt. 14:34–36)
53 Pagkasakuy nira, rinnoong sira sadto logar na a ngaran, Genesaret. Pangala ipinangguud nira so manga bangka nira. 54 Pagkababa nira sadto pangpang, nabisto tolos si Jesus ko manga tawo sadto. 55 Pangala nagdaralaganan so manga tawo tanganing ibareta sadto interong logar na adto na isadto si Jesus. Sari man na upud omiyan si Jesus sadto logar na adto, dinadara kanya ko manga tawo so manga nakabatang na nag-iilang. 56 Dawa sari man iya mag-iyan, sa tanuman, sa manga borobaryo, sa manga banwaan o sa manga syodad man, dinadara ko manga tawo so manga nag-iilang sadto sasaran. Nakikimaerak sirang togotan niya na makaptan ko manga nag-iilang dawa so gayad ko bado niya. So ngamin na nakakaput ko bado niya naraay.