5
A Kapangyariyan ni Jesus na Magpalayas sa Malakadakul na Demonyo
(Mateo 8:28–34; Lukas 8:26–39)
1 Pangala, innabot sira sadto loyo ko Ranuw ko Galilea, sadto rehiyon ko manga Geraseno. 2 Pagkababa ni Jesus sadto pangpang ko logar na adto, sinabat tolos iya sa usad na lalaking sinasaniban sa maraut na espirito. 3 Sa lubungan naka-istar ading lalaking adi. Uda siisay man na makagapos kadi dawa pa gamitan sa kadina 4 ta dakul na beses na iyang kinadinaan sa kamut sagkud tiil alagad rinurugnut sana man niya adi kaya uda kanya makapugul. 5 Alduw gab'i sige niya kagrat sadto lubungan sagkud sadto kakokolodan tapos ginugurut niya so sadiri niya sa batong matarum.
6 Kaya ko mabayad niya si Jesus, dinnalagan iya parani kadi, pangala tinniklod sadto atobangan niya 7 sabay kagrat sa makusug, “Diri mo ako pagpakilabutan, Jesus na Igin ka Kaoroalangkawing Diyos! Nakikimaerak ako sa ngaran ka Diyos diri mo ako pagpasakitan!” 8 (Sinabi niya adi ta sinabiyan iya ni Jesus, “Lomayas ika sa tawong an, maraut na espirito!”) 9 Pangala, inonga iya ni Jesus, “Ono ngaran mo?” “Legiona a ngaran ko ta malakadakul kaya namu!” simbag ko lalaki. 10 Tapos, padagos iyang nakimairak ki Jesus na diri iya pagpalayasun sadto logar na adto.
11 Kadtong oras man na adto agko kababaktinan na nanginginaun sadto iris ko kolod na arani sana kanda. 12 kaya nakimairak ki Jesus so manga maraut na espirito, sabi nira, “Palugun mo na sana kami sadto kababaktinan tanganing sadto kami kanda sumanib.” 13 Kaya tinogotan sira ni Jesus. Pangala, pagkalowas ko manga maraut na espirito, sinnanib tolos sira sadto kababaktinan kaya nangagkorolbowan adi sadto malakabakilid na iris ko kolod paros'og sadto ranuw. Nasa 2,000 na baktin ngamin so nagkalulumus.
14 Tapos nagdurulagan so manga nag-aataman ko kababaktinan. Ipinamareta nira sadto kasintrowan sagkud sadto manga kababaryowan so nangyari. Kaya nag-iriyanan so manga tawo sadto ki Jesus tanganing baydun kin ono nangyari. 15 Pangala ko makarani na sira ki Jesus, nabayad nira so lalaking dating sinaniban ko manga demonyong nginaranan sa Legion, toltol na so pag-iisip kadi, nakaula sagkud nakabado na. Kaya nakatakot so manga tawo. 16 Pangala, inistorya kanda ko manga tawong nakabayad ko nangyari kin napaono so lalaking sinaniban sa manga maraut na espirito sagkud kin paono nagkalulumus so manga kababaktinan. 17 Kaya nakimairak so manga tawo ki Jesus na gomalin iya sadto logar adto kaiba so manga disipolo.
18 Pangala ko linnolonad na si Jesus sadto bangka, nakimairak so lalaking sinaniban ko manga maraut na espirito na kin pwede iyang omiba kanya. 19 Alagad diri iya tinogotan ni Jesus, imbes sinabi niya kanya, “Agi na, paoli na sadto pamilya mo. Sabiyun mo kanda so ginibo ka Diyos sagkud kin gaomno iya kabuut kanimo.” 20 Kaya inniyan so lalaki sadto rehiyon na binabaoy na Sampolong Syodad. Ipinamarita niya sa ngamin so ginibo kanya ni Jesus kaya nangalas so ngamin na nakarungug ko nangyari.
A Kapangyariyan ni Jesus na Bomoway sa Guraan
(Mateo 9:18–26; Lukas 8:40–56)
21 Pagkasakuy naman nira ni Jesus sadto loyo, nag-iriyanan kanya so kadakul na manga tawo mantang sadto pa iya pangpang. 22 Agko man sadto innabot na lalaki, usad sa manga namamayo sa Sinagoga na a ngaran Jairo. Ko mabayad niya si Jesus, tinniklod iya sadto arani ko tiil niya. 23 Pangala, nakimairak iya ki Jesus, sabi niya, “Nag-iingagdan na tabi so iginb ko, nakikimaerak ako na kin poydi omiyan ika sadto baluy ko tanganing marunan mo iya ka kamut mo tanganing maray iya sagkud diri na magraan.”
24 Kaya inniba si Jesus sagkud so manga disipolo. Kadakul man ko manga tawong sinnonod sagkud nagsuruksukan ki Jesus. 25 Sadto manga tawong adtong nagsusuruksukan ki Jesus, agko usad na babaying doseng taon nang rinorogo. 26 Kadakul nang manga doktor so pinabolongan niya alagad lalo sana iyang nadipisilan. Diri basang iya naray dawa ngani naobos na so ngamin niyang pagsorosadiri sa pagparapabolong, imbes lalo sanang linnala so ilang niya. 27-28 Kaya ko marungug niya so bareta na nagbolong si Jesus sa manga nag-iilang, inniyan iya sadto iniyanan ni Jesus sagkud nakisuksukan tanganing makarani kanya. Nakisuksukan iya ta naisip kaya niya na, “Makaptan ko sana bado niya, mararay na ako.” Kaya kinaptan niya so bado ni Jesus. 29 Pagkakaput niya, kadto tolos napondo so pagrogo niya. Kaya kadtong oras na adto namatian niyang maray na iya. 30 Alagad namatian man tolos ni Jesus kadtong oras adto na agko linnowas na kapangyariyan kanya. Kaya linnili iya sadto katatawowan, pangala nag-onga, “Siisay kinnaput sadi bado ko?” 31 Sinimbag iya ko manga disipolo niya, “Ngata pa ika ta nag-oonga kin siisay kinnaput ka bado mo na kadakul baga ka nagsusuruksukan kanimo?” 32 Alagad padagos na sinnilung sadto katatawowan si Jesus tanganing mabayad kin siisay kinnaput ko bado niya. 33 Pangala, biyo nang nangubugkubug sa katakotan so babaying dating rinorogo ta kowasang isi niya so nangyari kanya kaya tinniklod iya sadto atobangan ni Jesus. Pagkatapos, isinaysay niya so interong nangyari. 34 Kaya sinabiyan iya ni Jesus, “Naraay ika, igin ko, ta tinnobod ika kanaku. Agi na, mamoway ika na agko katoninungan sa boway ta poon ngowan maray na ika.”
35 Pangala, diri pa natatapos magngabil si Jesus agko nagkapirang manga lalaking innabot galin sadto baluy ni Jairo. Kinaosip nira si Jairo, sabi nira, “Diri mo na po pagdistorbowon pa a Maestro ta guraan na po so igin mo.” 36 Narungug ni Jesus so sinabi ko manga lalaki kaya sinabiyan niya si Jairo, “Diri ika makatakot ka baretang an, imbes kusgan mo pagtobod mo kanaku.” 37 Diri tinogotan ni Jesus na somonod so manga tawo kanya imbes si Pedro sagkud so magngod na Juan sagkud Santiago sana so iniba ni Jesus sadto baluy ni Jairo.
38 Pag-abot nira sadto baluy, nabayad ni Jesus so manga nangagbobororaan sa malangkusug kaya malangribok. 39 Pangala, ko pagluug niya sinabiyan niya so manga tawo, “Ngata kamo ta nangagbobororaan? Buku man na guraan a igin. Torog sana man iya.” 40 Alagad pinagtaw'an sana iya ko manga tawo. Pangala pagkapalowas niya ko manga tawo, iniba niya so manga kag-igin ko igin sagkud so tolong disipolo paluug sadto nababatangan ko igin. 41-42 Tapos kinaptan niya so kamut kadtong dosi anyos na igin sabay sabi, “Talitha kum!” na a buut sabiyun “Bangon na, Nining!” Kadto tolos, binnangon man tolos so igin pangala nag-agi-agi na. Kaya so ngamin na kaiba ni Jesus sadto luug biyong nangalas. 43 Alagad maigpit sirang minandaan ni Jesus na diri pagsabiyun ki siisay man so nangyari. Pangala, sinabiyan niya sira, “Pakaunun ninyo iya.”