4
Parabola manungud sa Binni
(Mt. 13:1-9; Lk. 8:4-8)
1 Pagkatapos, nagtottoro otro si Jesus sadto pangpang ko Ranuw Galilea. Malakadakul ko tawong nag-iirungug na nakapalibot kanya kaya innula na sana iya sadto bangkang nakaangkla sadto tobig mantang so manga tawo isadto pangpang. 2 Tinottoroan sira ni Jesus sa kadakul na bagay sa paagi sa manga parabola. Sinabi niya, 3 “Irunggun ninyo ading sasabiyun ko, agko usad na paraomang nagpatiprak. 4 Sadto pagpatiprak niya, agko manga natikrag na binni sadto aagyan pangala tinoka adi ko manga bayong. 5 So ibang manga binni naolog man sadto kabototowan. Tinnobo tolos so manga binni ta manipis kaya so raga 6 alagad ko agko na alduw, naloyos so manga nagtobong binni ta ababuw man sana kaya so manga gamot. 7 Agko man manga binning naolog sa katotodokan. Nagdakulu so manga matodok na doot kaya nadaug sa pagdakulu so manga nagtobong binni kaya diri adi namonga. 8 Alagad so manga binning natikrag sadto balonbon na raga nagtobo sagkud nagdakulu sa maraay kaya namonga adi sa tigtrenta, tigsaysenta anggan sa tigsanggatos kadobling beses.”
9 Pangala nagngabil pa si Jesus, “Intindiyun ninyo saigo a sinabi kong adi.”
A Katoyowan ka Parabola
(Mt. 13:10-17; Lk. 8:9-10)
10 Ko si Jesus na sana sagkud so Dosi sagkud so iba pang manga disipolo niya so isadto, nag-onga sira ki Jesus kin ono buut sabiyun ko parabola. 11 Nagsimbag si Jesus, “Itinao kaninyo a poder na maisiyan a misteryo ka Kahadian ka Diyos alagad sa iba itinotottoro ko adi sa paagi ka manga parabola 12 tanganing maotob so nasa Kasoratan na,
‘dawa pa sira magsilung diri sira makababayad, mag-irungug man sira, diri sira makakaintindi.Ta kin nakaintindi kintana sira, kintana nagsulsul na sira sagkud kintana napatawad na sira.a’ ”
A Buut Sabiyun ko Parabola manungud ko Binni
(Mt. 13:18-23; Lk. 8:11-15)
13 Pangala, inonga sira ni Jesus, “Paono ninyo maiintindiyan a iba pang manga parabola kin a parabolang adi diri ninyo maintindiyan? 14 Amo adi buut sabiyun ko parabola, so paraomang sinasabi ko amo so nangangadal ka Oosipun ka Diyos pagkatapos so binni amo man a Oosipun ka Diyos. 15 So aagyan kin sari natikrag so ibang manga binni amo man so manga tawong nag-irungug ko Oosipun alagad innabot tolos si Satanas pangala inalin adi kanda. 16 So kababatowan man kin sari natikrag so ibang binni amo man so manga tawong nag-irungug ko Oosipun sagkud tolos na tinnobod na agko kaogmaan. 17 Alagad ta uda gamot so binni diri adi nag-uban saigo. Kaya ko makamati sa kadipisilan o kaya sa pagpirsigir holi ko Oosipun, bigla nirang binayaan so pagtobod. 18 So katotodokan na natikragan ko ibang manga binni amo man so manga tawong nakarungug ko Oosipun 19 alagad mas tinawan nira sa panawon so pagkaribaraw sa manga pangangaipo sa boway, pagmawut na yomaman sagkud pagmawut sa manga materyal na bagay kaya nadaug so Oosipun ka Diyos sagkud diri na namonga. 20 So balonbon na raga na natikragan ko ibang manga binni amo so manga tawong nag-irungug sagkud innako ko Oosipun ka Diyos kaya nagdakulu adi saigo, nagsaringsing sa malakadakul tapos namonga sa tigtenta, tigsaysenta anggan sa tigsanggatos kadobling beses.”
A Oosipun ka Diyos diri kaipowan Itago Arug ka Solo
(Lk. 8:16–18)
21 Sinabi pa ni Jesus, “Diri ibinubutang a solo sa irarum ka katri o kaya sa luug ka koron tanganing itago. Imbes, ibinubutang adi sa alangkaw na bubutangan. 22 Uda nakatagong diri mabobolgar sagkud uda sikritong diri maiisiyan. 23 Intindiyun ninyo saigo ading sinabi kong adi.”
24 Sinabi pa niya kanda, “Intindiyun ninyo saigo a iniirungug ninyo, ta kin maray a pag-irungug ninyo, makaiintindi kamo sa maray sagkud rorogangan pa ka Diyos a pagkaintindi ninyo. 25 Ta a siisay man na nagsosonod ka kamatoranan na narurungug niya rorogangan pa a pagkaintindi alagad a siisay man na diri nagsosonod ka kamatoranan, maski so gatingay na pagkaintindi niya kokoon pa.”
A Pagtalobo ka Kahadian ka Diyos
26 Sinabi pa ni Jesus, “A paghahadi ka Diyos kapareyo sa usad na paraoma na nagtanum sa binni sadto oma niya. 27 Pagkatanum ko paraoma, binnalik na iya sa oroalduw niyang gibo. Mantang so binning itinanum niya padagos sa pagtobo dawa uda iya pagkaisi kin paono adi nagtatalobo. 28 A raga amo nagpapatobo ka binni anggan sa domakulu sagkud mamonga. 29 Pangala pag-inog na a manga bonga, buut sabiyun panawon na sa tig-aniyan kaya tinitipon niya a manga bonga sagkud ilinuluug sa bubutangan.”
A Kapinonan ka Kahadian ka Diyos
(Mt. 13:31-32; Lk. 13:18-19)
30 Sinabi pa ni Jesus, “Sari ko pa pwedeng ikompara a paghahadi ka Diyos? Onong parabola pa a pwede kong gamitun tangani sanang mas maintindiyan ninyo a Kahadian ka Diyos? 31 A kapareyo kadi amo a mingyari pag-itinanum sa raga a usad na pananum na mostasab. Amo adi a pinakasaday na tolang na itinatanum. 32 Alagad pag itinanum adi, dinnadakulu adi na bagana man sana kawoy sagkud mas dakulu adi kisa ngamin na klasing golay. Nagsasanga adi sa malakadakul na nagigin istaran ka manga bayong.”
33 Nagtottoro pa si Jesus gamit so manlainlain na parabola sagkud na kaya pa nirang mag-irungug. 34 Uda iya itinottorong diri ginamitan sa parabola alagad ko iya na sana sagkud so manga disipolo so tawo, inisplikar niya ngamin.
A Kapangyariyan ni Jesus na Papondoon so Malangkusug na Angin
(Mt. 8:23-27; Lk. 8:22-25)
35 Pangala, ko gab'ing adto, dinaddara ni Jesus so manga disipolo na magsakuy paiyan sadto loyo ko Ranuw Galilea. 36 Kaya binayaan nira so manga katatawowan tapos nagsakuy na sira paloyo pangala agko man manga bangkang nagsosonod kanda. 37 Pag-uban-uban, biglang nagkaagko malangkusug na angin. Tapos binangga sa kadaddakulu sagkud makukusug na alun so bangka nira sagkud apus nang mapono sa tobig so bangka.
38 Ko oras na adto isadto oriyan na parte ko bangka si Jesus malakatorog na nakaolonan pa. Pangala ginisung iya ko manga disipolo, sinabi nira, “Maestro, mata na! Uda basang ika pakilabut! Nalulunud na baga kita!” 39 Kaya nagbangon si Jesus pagkatapos pinapondo so angin sagkud so manga alun, “Angin sagkud alon pomondo kamo!” Pangala, nauda so angin kaya nagin kalmado saigo so dagat. 40 Pangala, inonga ni Jesus so manga disipolo, “Ngata kamo ta nakatatakot? Ono uda pa kamo pagtobod kanaku?” 41 Kaya nakatakot saigo so manga disipolo ki Jesus kaya nag-orongaan sira, “Siisay raw talaga a tawong adi ta dawa angin sagkud alun nagsosonod kanya?”