16
Nag-ayat sa Sinyales so manga Pariseo sagkud Saduceo
(Mk. 8,11-13; Lk. 12,54-56)
1 Pangala rinnapo ki Jesus so nagkapirang Pariseo sagkud Saduceo. Gosto nirang porbaran si Jesus kaya inayatan nira iya sa sinyales galin sa langit. 2 Alagad sinnimbag si Jesus, “Pagsulnud ka alduw sinasabi ninyo, ‘Migkaagko kita magayon na panawon, ta a langit mapola.’ 3 Sagkud pagkaramrag sinasabi ninyo, ‘Mig-oran, ta a langit malumlum.’ Natutukran ninyo a panawon sa pagsilung sa langit, alagad diri ninyo mabayad a manga sinyales ngowan na panawon. 4 Maraut sagkud manga uda pagtobod sa Diyos a manga tawo ngowan! Innaayat kamo kanaku sa sinyales, alagad uda itatao kaninyo kindi so nangyari ki Propeta Jonas.”
Pagkatapos ginnalin na iya.
So Lebadora ko manga Pariseo sagkud Saduceo
(Mk. 8,14-21)
5 Ko lomoyo sadto ranuw so manga disipolo, nalingaw sirang magdara sa tinapay. 6 Sinnabi si Jesus kanda, “Magmaan sagkud magbantay kamo kontra sa lebadoraa ka manga Pariseo sagkud Saduceo.” 7 Nag-osip-osip so manga disipolo sa kada usad sagkud sinnabi, “Nag-osip iya kadi holi ta uda kita daradarang tinapay.”
8 Isi ni Jesus kin ono so manga pinag-oosipan nira, kaya inonga niya sira, “Ngata ta nag-oosip kamo sa kada usad na uda kamo daradarang tinapay? Malakasadit ka kaninyong pagtobod. 9 Diri pa nanggayud na kamo nakaiintindi? Diri ninyo narurumruman ko pagbanga-bangaun ko so limang tinapay para sa singko mil na lalaki? Pirang bakol so natuda na natipon ninyo? 10 Amo man so pitong tinapay para sa kwatro mil na lalaki? Pirang bakol so natuda na natipon ninyo? 11 Ngata ta diri ninyo naiintindiyan na bukung manungud sa tinapay a buut sabiyun, ko sabiyun ko, ‘Magmaan kamo sa manga lebadorang ginagamit ka manga Pariseo sagkud manga Saduceo.’ ”
12 Pangala naintindiyan ko manga disipolo na bukung lebadora na ginagamit sa tinapay so buut sabiyun ni Jesus, kindi so manga katottoroan ko manga Pariseo sagkud ko manga Saduceo.
A Kapaayagan ni Pedro manungud ki Jesus
(Mk. 8,27-30; Lk. 9,18-21)
13 Ko makaabot na si Jesus sadto banwaan ko Cesarea Filipos, inonga niya so manga disipolo, “Ono sabi ka manga tawo manungud kanaku na Igin sa Tawo?”
14 Sinnimbag sira, “A sabi ka iba ika si Juan na Parabunyag, a iba man nagsasabi na ika si Propeta Elias, a iba man nagsasabi na ika si Propeta Jeremias o usad sa manga propeta ko onang panawon na naboway otro.”
15 “Para kaninyo, siisay ako?” Onga ni Jesus. 16 Sinnimbag si Simon Pedro, “Ika po a Cristob, Igin ka boway na Diyos.”
17 Sinnabi si Jesus kanya, “Pinagbendisyonan ika ka Diyos Simon, igin ni Jonas. Ta bukung tawo a nagpaayag kanimo ka kamatoranan na adi, kindi a kanakung Amang nasa langit. 18 Ngowan sinasabi ko kanimo Pedro, ika a bato, sagkud sa batong adi, itotogrok ko a pondasyon ka kanakung simbaan, sagkud diri adi madadaug dawa ka kapangyariyan ka kagranan. 19 Itatao ko kanimo a kapangyariyanc sa Kahadian ka Diyos, ono man na ipigbawal mo sa kinaban ipigbawal man sa langit, sagkud ono man na itinotogot mo sa kinaban itotogot man sa langit.”
20 Pangala maigpit na pinataniran ni Jesus so manga disipolo na diri pagsabiyun dawa kiisay na iya a Cristo.
Nagpoon ng Magtottoro si Jesus manungud ka kanyang Kagranan sagkud Pagkaboway Otro
(Mk. 8,31-9,1; Lk. 9,22-27)
21 Poon kadto ipinaisi na ni Jesus sadto manga disipolo niya, “Kaipowan akong omiyan sa Jerusalem sagkud magtius sa dakul na kadipisilan sa kamut ka manga namomoon sa banwaan, manga namomoon ka manga padi sagkud ko manga paratottoro sa Layi. Saka ipaguguraan nira ako, alagad sa ikatolong alduw maboboway ako otro.”
22 Ko marungug adto ni Pedro dinaddara niya si Jesus sadto gilid sagkud pinagsabiyan, “Kagorangnan, diri logod tabi itogot ka Diyos! Diri adi mingyari kanimo.” 23 Alagad inatobang iya ni Jesus sagkud pinagsabiyan, “Lomayas ika kanaku, Satanas! Pinupugulan mo akong gibowon a kabutan ka Diyos, ta a iniisip mo bukung kabutan niya, kindi kabutan ka tawo.”
24 Pangala sinabi ni Jesus sa manga disipolo niya, “A siisay man na gostong somonod kanaku, lingawan a kanyang sadiri, sagkud anda niyang atobangun a kagranan sa pagsonod kanaku. 25 Ta a tawong nagmamawut iligtas a kanyang boway mauudaan kadi alagad a tawo na nagmamawut na mag-atang ka kanyang boway alang-alang kanaku migkaagko ka boway na uda kasagkuran. 26 Ta ono a mapapakinabangan ka usad na tawo kin makoko niya a bilog na kinaban alagad mauda man a kanyang boway? Agko raw iya ikababayad tanganing mabawi niya a kanyang boway? 27 Ta akong Igin sa Tawo omaabot kaiba a manga anghel na dara a kapangyariyan ka Ama, sa alduw na an itatao ko sa kada usad a balus oyon sa kandang manga ginibo. 28 Sinasabi ko kaninyo a kamatoranan, agko nagkapira sadi kaninyo na diri migraan anggan na diri nira nababayad akong Igin sa Tawo na innaabot bilang Hadi.”