15
A manungud sa manga Tradisyon
(Mk. 7:1-13)
1 Pagkatapos kadi, rinnapo ki Jesus so nagkapirang Pariseo sagkud manga paratottoro sa Layi na galin sa Jerusalem. 2 Inonga nira si Jesus, “Ngata ta diri kinokoyog ka manga disipolo mo so manga katottoroan ko kanatung manga ginikanan? Diri sira nannininuw sa kamut bago magkaun sigon sa iminamanda!”
3 Sinnimbag si Jesus, “Ngata man ta diri ninyo kinokoyog a iminamanda ka Diyos, masonod sana a sadiri ninyong katottoroan? 4 Ta sinabi ka Diyos, ‘Igalang mo a kanimong manga kag-igin’ +\fr 15:4 \ft Exo. 20:12; Deut. 5:16 sagkud ‘A siisay man na mag-osip kontra sa kanyang manga kag-igin, kaipowan na guranun.’ a 5 Alagad itinotottoro man ninyo na a siisay man na magsabi sa kag-igin nira na, ‘A itatabang ko kaninyo naipanoga ko na sa Diyos, ’ 6 diri na niya kaipowan na magtabang kanda. Sa arug kading paagi diri ninyo tinatawan sa importansiya a kamandaan ka Diyos tanganing masonod sana so itinottoro ko manga ginikanan ninyo. 7 Manga parasaginsagin! Tama mananggayud na a sinabi ka Diyos manungud kaninyo sa paagi ni Propeta Isaias,
8 ‘Inoomaw ako ka manga tawong adi sa kandang manga oosipun,
alagad a kandang poso arayo kanaku.
9 Uda alaga a manga pagsamba nira kanaku
holi ta a itinotottoro nira bilang doktrina, manga pagbuut sana sa tawo!’ ”
Manga Bagay na Nakapaaati sa Tawo
(Mk. 7:14-23)
10 Pangala pinarani ni Jesus kanya so manga tawo sagkud sinabiyan, “Irunggun sagkud intindiyun ninyo a sasabiyun ko. 11 Bukung a linnuluug sa nganga ka tawo a nakapaaati sa atobangan ka Diyos, kindi a linnolowas sa nganga niya a nakapaaati.”
12 Pangala so manga disipolo rinnapo kanya sagkud sinnabi, “Isi mo po nakulgan so buut ko manga Pariseo ko manga sinabi mo.”
13 Kaya sinnimbag si Jesus, “Ono man na tanum na diri itinanum ka kanakung Amang nasa langit, gagaboton. 14 Pabayai ninyo sira! Manga bota sirang tagakabit, sagkud kin bota a migkabit sa kapareyo nira bota, pareyo sirang maoolog sa kalot.”
15 Sinnabi si Pedro, “Isplikaran man tabi kanamu a parabolang adi.”
16 Sinnabi si Jesus kanda, “Diri pa nanggayud na kamo nakaiintindi? 17 Diri ninyo naiintindiyan? A onoman na linnuluug sa nganga ninyo dinnadagos sa boros pangala ilinolowas. 18 Alagad a linnolowas sa nganga, naggagalin sa poso, sagkud amo adi a nakapaaati sa tawo. 19 Ta sa poso ka tawo naggagalin a mararaut na kamawutan na nagigin giya na gomuraan, manambay, gomibo sa kadostaan, pagtataban, pagbobotig sagkud pagpapakaraut ka iba. 20 Amo adi a manga bagay na nakapaaati sa tawo. Alagad a diri panninuw sa kamut bago magkaun arug ka sinasabi na kaipowan na gibowon diri nakapaaati sa tawo.”
So Pagtobod ko Usad na Babayi
(Mk. 7:24-30)
21 Ginnalin sadto si Jesus sagkud inniyan sa manga logar na arani sa Tiro sagkud Sidon. 22 Agko usad na babayi na taga Canaan na nakaistar sadto, so rinnapo ki Jesus na nagrarait, “Kagorangnan, Erensiya ni David, kaeraki man tabi ako! A igin kong babayi sinasaniban sa demonyo sagkud pinadidipisilan saigo.”
23 Alagad uda sinabi si Jesus kanya. Rinnapo kanya so manga disipolo niya sagkud sinnabi, “Pagalinun mo na tabi iya ta sige a sonod kanatu sagkud nagpapararait!”
24 Alagad sinabi ni Jesus sadto babayi, “Iminanda sana ako para sa manga taga Israel na bagana karnerong nalalagalag.”
25 Alagad rinnapo so babayi ki Jesus pangala tinniklod sadto atobangan niya sagkud sinnabi, “Kagorangnan, tabangan tabi ninyo ako!”
26 Sinnimbag si Jesus, “Tama raw na koon a pagkaun ka manga igin tanganing itao sa manga ayam?”
27 Sinnimbag so babayi, “Matood po an Kagorangnan, alagad magin a manga ayam nagkakaun man ka manga ngima na naoolog sa lamesa ka kagsadiri nira.”
28 Kaya sinnimbag si Jesus kanya, “Babayi, holi ka malakadakulung pagtobod mo kanaku, pararayun ko a igin mo arug ka minamawut mo!” Kadto tolos naraay so igin.
Pinaraay ni Jesus so Malakadakul na Tawo
29 Paggalin ni Jesus sa logar na adto, nag-iyan iya sadto gilid ko Ranuw ka Galilea. Pangala tinnokad iya sadto kolod sagkud innula. 30 Rinnapo kanya so malakadakul na tawo na agko darang manga lopog, bota, pilay, ngola sagkud iba pang manga nag-iilang. Dinara nira sira sadto atobangan ni Jesus, sagkud pinaraay niya sira ngamin. 31 Nagngalas so manga tawo ko mabayad nira so manga ngola na nakangangabil na, so manga lopog kinnusug, nakaagi so manga pilay, sagkud nakabayad so manga bota. Kaya inomaw nira a Diyos ka Israel.
Pinakaun ni Jesus so Kwatro Mil na Lalaki
(Mk. 8:1-10)
32 Binaoy ni Jesus so manga disipolo niya sagkud sinnabi, “Naeerak ako ka manga tawong adi, tolong alduw na ngowan na kaiba ko sira, sagkud uda na sira makaun. Abu kong pagalinun sira na nag-aalup, ta baka panloyawun sira sa aagyan.”
33 Sinnimbag so manga disipolo niya, “Sari man tabi kita komokoko sa kaunun sa kalangtaran na adi tanganing ipakaun kanda?”
34 Inonga sira ni Jesus, “Pira a tinapay ninyo?”
“Pitong tinapay sagkud nagkapirang sassadit na isura,” simbag nira.
35 Sinabiyan ni Jesus so manga tawo na omula sadto raga. 36 Pangala kinoko niya so pitong tinapay sagkud so isura, pagkatapos na makapagpasalamat sa Diyos, binangabanga niya adi sagkud itinao sadto manga disipolo, tanganing ipanao man nira sadto manga tawo. 37 Nagkaun sira ngamin sagkud nagkabobosog. Tinipon ko manga disipolo so manga natuda, sagkud pitong bakol pa so napono nira. 38 So bilang ko manga lalaking nagkaun, kwatro mil pwera pa ko manga babayi sagkud manga igin.
39 Pagkatapos na paoliun ni Jesus so manga tawo, linnonad iya sa bangka, sagkud inniyan sadto karagaan ko Magadan.