Bìo wó hã lúlúio khĩá-pírú pã̀ahṹ
20
Á ĩ bĩnía le ĩ loń á ĩ mɔn le Dónbeenì tonkaro ò o ló ho wáayi wee lii.
O ɓuan ho kɔ̃hṹ na nàyiló ɲii mía ɓàn zũaɲii won-za,
á ɓuan ho zúakùarí na ɓùaa.
2 O tonkaro mu wìira a ɲìa be-beenì.
O ɲìa mu lé o háa na wi bĩ́n hàánì.
Ɓa wee ve o làa Nì-bàkálo tàá Satãni.
O wìira a can lè ho zúakùarí ò o mía dã hã lúlúio khĩá-pírú.
3 O can wo lío dó ho kɔ̃hṹ na nàyiló ɲii mía yi,
á dó ɲii,
á bò le Dónbeenì fĩ̀iminì wán.
O wó bṹn bèra a na,
ò o wã́a yí bĩní yí dàń khà ɓa nùpua vĩ́iní ká hã lúlúio khĩá-pírú mu yí khĩína.
Ká hɔ̃́n khíi khĩína,
ó o ko ò o lén lée fee día o ò wé ho pɔ̃̀n-za dɛ̀ɛ.
4 Á ĩ bĩnía le ĩ loń á ĩ mɔn bá-zàmu kanmúiní.
Bìa kará hã wán á le bɛ́ɛnì díró pànká nɔn yi.
Ĩ mún mɔn bìa ɓa kúiora ɲúná mànákã̀wa.
Ɓa kúiora ɓa ɲúná lé bìo ɓa zéenía ho tũ̀iá na ó o Yeesu mà,
á buera le Dónbeenì bíonì.
Bán yí ɓùaanía o yìa,
á yí ɓùaanía o kansi.
O fĩ̀iminì mún mía ɓa ɓuráa lè ɓa níní wán.
Ɓa vèera á à páaní ì dí le bɛ́ɛnì làa yìa le Dónbeenì mɔn léra á à dã hã lúlúio khĩá-pírú.
5 Bṹn lé ho nín-yání vèeró.
Ɓa nì-hía na ká bán máa vèe ká hã lúlúio khĩá-pírú ɲii á yí sú.
6 Bìa nín-yání vèera bán ɲúná sĩ,
ɓa bìo sã̀ le Dónbeenì yi.
Mu cúa-ɲun níi húmú máa yí pànká bán wán.
Ɓa à wé le Dónbeenì làa yìa le mɔn léra yankarowà.
Ɓa à dí le bɛ́ɛnì làa wo á à dã hã lúlúio khĩá-pírú.
O Satãni bìo yáara
7 Ká hã lúlúio khĩá-pírú mu khĩína,
á ɓa à lén o Satãni á lée fee á à día
8 ó o tĩ́n ì hĩ́ní wé è khà ho dĩ́míɲá kãna ɓúenɓúen nùpua á à vĩ́iní.
Hɔ̃́n kãna so ɓa wee ve làa Kooki làa Makookia Ò o ò ve ɓa à kúee mín wán hã hĩa táró bìo yi.
Ɓa à wé boo lòn yámú ɲumu ɲii hɔ̃̀nlè bia bìo síi.
9 Ĩ mɔn ɓa à ɓa ló ho dĩ́míɲá kùaráa ɓúenɓúen yi ɲàana lua á ɓueé dó kĩ́nía ho lóhó na le Dónbeenì wa làa sòobɛ́ɛ yi,
hìa le nìpomu wi yi.
Ká dɔ̃hṹ ɓúi màhã́ ló ho wáayi á lií ɓó ɓa ɲúhṹ.
10 O Satãni na lá wee khà ɓa vĩ́iní wón ɓa wìira dó ho kìríbì dã-be-beenì yi,
hen na á ɓa kúaa o yìa làa yìa fɛɛra hã ɲi-cúa na yí bon yi.
Ɓa lò á à be bĩ́n fɛ́ɛɛ le wisoni lè ho tĩ́nàahṹ hã lúlúio na ɲii mía yi.
Le Dónbeenì cítío ho dĩ́míɲá nùpua ɓúenɓúen
11 Á ĩ bĩnía le ĩ loń á ĩ mɔn bá-zàmu kanmúi-beenì dà-poni làa yìa kará le wán.
Ho tá lè ho wáayi ɲuuna vṹnun o yahó,
á máa bĩní máa mi.
12 Á ĩ bĩnía le ĩ loń á ĩ mɔn ɓa nì-hía,
bìa bìo ɲúhṹ wi làa bìa bìo ɲúhṹ mía,
à ɓa dĩ̀n mu bá-zàmu kanmúiní mu yahó.
Ó o ɓúi hɛ́nkaa hã vɔ̃nna na ɓa nùpua bè-wénia túara yi.
Ó o ɓúi mún lá ho vũahṹ ɓúi hɛ́ra.
Hón á bìa yú le mukãnì binbirì yènnáa túara yi.
Á le Dónbeenì fã̀ le cítíi ɓa nì-hía wán á héhaa lè ɓa bè-wénia na túara hã vɔ̃nna mu yi.
13 Bìa húrun mu ɲumu yi céra á mu ɲumu día á ɓa ló.
Hàrí mu húmú lè ho nì-hɔ̃́nbó-lóhó á día mí nì-hía á ɓa ló.
Á le Dónbeenì cítío ɓa nì-hía ɓúenɓúen á héhaa làa bìo ɓa nì-kéní kéní wó.
14 Á mu húmú lè ho nì-hɔ̃́nbó-lóhó á ɓa dóra kúaa ho dã-be-beenì yi.
Hón dã-be-beenì so lé mu húmú cúa-ɲun níi.
15 Nùpue lée nùpue na yèni mía ho vũahṹ na á bìa yú le mukãnì binbirì yènnáa túara yi,
bán ɓúenɓúen ɓa mún dóra kúaa ho dã-be-beenì mu yi.