Zãn tĩn níi 1

Ho tĩn níi vũahṹ na ó o

Zãn

túara

Le tɛ̀ɛníi

Kayuusi,

mu lé ĩnɛ́n na lé o nì-kĩ́nle á wee túa ho vũahṹ na kà á a na foǹ.

Ĩ wa fo làa sòobɛ́ɛ.

2 Ũnɛ́n na á ĩ wa làa sòobɛ́ɛ,

ĩ wee fan à ũ bìo ɓúenɓúen wé se.

Bìo á ũnɛ́n lè le Dónbeenì ɓuannáa mín sese,

lé bṹn ɓàn síi à ũ sãnía lò mún wé hereráa.

3 Wàn zàwa kèrètĩ́ɛwa ɓueé bía nɔn miì le le Dónbeenì tũ̀iá poni bìo á fo henía,

á fo mún wee bè ho yi.

Bìo á ĩ ɲá mu,

á ĩ sĩi wan làa sòobɛ́ɛ.

4 Bìo á ĩ sĩi á à bĩní ì wa yi á à poń bìo á ĩ ɲá à ɓa le ĩ zàwa mu kèrètĩ́ɛmu dã́ní yi bò le Dónbeenì tũ̀iá yi,

bṹn mía.

O Kayuusi bò le Dónbeenì yi sese

5 Ũnɛ́n na á ĩ wa làa sòobɛ́ɛ,

wàn zàwa kèrètĩ́ɛwa á fo wee ɓua sese,

hàrí bìa lé ɓa nì-hãní á fo pá wee ɓua sese.

Bṹn lé bìo wee zéení le fo ɓɛ̀ntĩ́n bò le Dónbeenì yi.

6 Bìo fo wa làa ba á ɓa mà tũ̀iá nɔn ɓa kèrètĩ́ɛwa kuure yi.

Ká bán nùpua so síi fo wee séení ɓa varáa yi làa bìo le Dónbeenì le mu koráa,

se mu se.

7 Mu bon,

mu lé o *Krista tonló bìo yi á ɓa lóráa,

à ɓa yí fó hàrí dɛ̀ɛ bìa yí zũ le Dónbeenì cɔ̃́n.

8 Àwa,

á mu sã̀ warɛ́n yi à wa wé séení bán nùpua so síi.

Ká wa wee séení ɓa,

bṹn ká wa mún páanía làa ba á wee zéení le Dónbeenì tũ̀iá poni bìo.

O Diotɛrɛɛfu là a Demɛtiriyuusi bìo

9 Ĩ túara ho vɔ̃n-za nɔn mi kèrètĩ́ɛwa kuure yi.

Ɛ̀ɛ ká a Diotɛrɛɛfu na wa ò o wé dí mu bìo ɓúenɓúen yahó á yí máa càtí ĩ bíoní.

10 Ká ĩ ɓuara,

á hã wén-kora na ó o wó,

lè hã sabíoní na ó o fũ̀aana ĩ ɲii á ĩ ɓueé bío bìo làa mia.

Bìo ó o bĩnía wee wé yàá po bṹn.

O yí máa tà à wàn zàwa kèrètĩ́ɛwa làa o wán.

Á bìa mún tà le ɓa wé làa mí wán ó o hò.

Á bìa ɓa wee làa wán ó o wee ɲa lén ɓa kèrètĩ́ɛwa kuure yi.

11 Ũnɛ́n na á ĩ wa làa sòobɛ́ɛ,

fo wé mɔn ɓa nùpua na wee wé bìo yí se à ũ yí bè ɓa wárá yi.

Ɛ̀ɛ ká fo wé mɔn ɓa nùpua na wee wé bìo se à ũ bè bán wárá yi.

Yìa wee wé bìo se wón bìo sã̀ le Dónbeenì yi.

Yìa wee wé bìo yí se wón yí zũ Dónbeenì.

12 O Demɛtiriyuusi wón ɓa nùpua ɓúenɓúen ɓɛ̀n wee wíoka yèni.

Bìo ó o wee ɓua míten héha lè le Dónbeenì tũ̀iá poni lé bṹn wee zéení le o lé o nì-tente.

Ĩnɛ́n mún wee wíoka a yèni,

á ũ zũ le bìo á ĩ wee mì ɓúenɓúen lé ho tũ̀iá.

Le mɔ́ndɛ́n tɛ̀ɛníi

13 Bìo cɛ̀rɛ̀ɛ á ĩ wi à ĩ bío làa fo,

ká ĩ màhã́ máa túa mu vũahṹ yi.

14 Ĩ wi à ĩ ɓuen ũ cɔ̃́n hen làa cĩ́inú,

á wa ɓueé páaní ì tà hã láakáwá.

15 Le ho hɛ́ɛrà à kɛń làa fo.

Mìn bɔ̃́nlowà na làa wɛn páanía wi á wee tɛ̀ɛní foǹ.

Mún tɛ̀ɛní wàn bɔ̃́nlowà na làa fo páanía wi yi lè mí nì-kéní kéní.