Bìo á mi sĩa wee vá wéró yi na yí se á mi khí yi
4
Wàn zàwa lè wàn hĩ́nni,
mu wó kaka á mi wee firáa làa mín?
Mu so yínɔń mi sĩa bìo na yí se càró ɓàn poni na wee ɓúe mia fɛ́ɛɛ bìo yi á mu wee wéráa le?
2 Mi sĩa wee vá mu bìo ɓúi yi ká mi màhã́ yí dà máa yí mu à mi wã́a wé ɓúe mín.
Le yandee wi mia á bìo mi yí máa yí bìo mi sĩa vá yi,
à mi wã́a wé fi làa mín.
Mi yí máa yí bìo mi sĩa vá yi,
lé bìo mi yí máa fìo mu le Dónbeenì cɔ̃́n.
3 Tàá ká mi fìora le Dónbeenì cɔ̃́n á mi máa yí mu,
lé bìo á bìo mi leékaa wee fìoráa yí se.
Mi fìoró ɲúhṹ lé à mi yí mu bìo à wɛɛ́ráa mi sĩa cùeée.
4 Mi ka lòn hã́a na ɓàn báa wi ò o wee fé ɓa bá-vio.
Mi so yí zũ le yìa wa ho dĩ́míɲá bìo se wón ɲina le Dónbeenì le?
Yìa wi ò o wań ho dĩ́míɲá bìo,
á ɓànso ɓɛ̀n ǹ wé le Dónbeenì zúkúso.
5 Mi so wee leéka le le Dónbeenì bíonì vũahṹ yi á hã bíoní na kà bía kã́amáa le?
«Le Dónbeenì Hácírí na le dó wɛn á le yí wi à le lɛɛ́ yi là a ɓúi hùúu.»
6 Ɛ̀ɛ ká le sãamu na le màhã́ wee wé làa wɛn á po bṹn.
Bìo kà lé bìo bía le Dónbeenì bíonì vũahṹ yi:
«Bìa wee yòoní míten á le Dónbeenì pã́ bìo,
ká le màhã́ wee wé mí sãamu làa bìa wee liiní míten.»a
7 Á mi cén wé liiní miten le Dónbeenì yahó.
Mi dĩ̀n sánsá a Satãni,
ó o ò lùwí ká à día mia.
8 Mi lɛ́n va lè le Dónbeenì cɔ̃́n á lerɛ́n ɓɛ̀n ǹ sĩ́ mí yahó.
Minɛ́n bè-kora wérowà,
mi khí mu bè-kora wéró yi.
Minɛ́n na yí máa bè mu bìo dà-kéní mɔ́n,
mi día miten ɓúenɓúen na le Dónbeenì yi.
9 Mi sè mi yara,
à mi wá.
Mi día hã konsĩní à mi wá.
Mi día le sĩ-wɛɛ à mi sè mi yara.
10 Mi liiní miten o Ɲúhṹso yahó ó o ò yòoní mia.
Mi wé yí cítí mín
11 Wàn zàwa lè wàn hĩ́nni,
mi wé yí ɲùu mín.
Yìa ɲùuna mìn za tàá mìn hĩ́nló,
tàá á cítío wo,
se ɓànso bía khon le Dónbeenì làndá dã́ní yi,
o wee cítí ho.
Ká fo hĩ́a wee fĩ̀ le cítíi ho làndá wán,
se fo wã́a yí máa bè ho yi.
Fo wee wé ũten lè le Dónbeenì làndá cítí-fĩ̀.
12 Le Dónbeenì mí dòn lé dìo bàrá ho làndá á lé lerɛ́n mún lé o cítí-fĩ̀.
Lé lerɛ́n dà à kã̀ní a nùpue,
á mún dà à wé ó o bìo á à yáa.
Á ũnɛ́n ɓɛ̀n lé o yɛ́n á wee cítíráa mín za?
Minɛ́n nàfòró ɓànsowà, héyìi!
13 Àwa,
mi le ĩ bío bìo dà-kéní na mia.
Mi wee wé bío le ho zuia tàá ho yìró ká mi ì va ho lóhó na kà,
á vaá duan le lúlú-kùure,
á à yí ho cũ̀nú.
14 Mi wee wé bío bṹn ká mi ɲɔǹ yí zũ bìo pan mia ho yìró.
Mi ka lòn ɓó-khũumu na wé fà à dɛ̀ɛní bĩní khĩí fùafùa.
15 Mi lá ko mi wé bío bìo kà:
«Ká le Dónbeenì tà,
á wa yìo wi lua ho yìró á séenía wɛn á wa à wé bìo kà làa bìo kà.»
16 Ɛ̀ɛ á bṹn mi yí máa wé à mi wee yòoní miten lè mi khòn-bíoní.
Bṹn síi yí se.
17 Lé bṹn nɔn,
ká yìa zũ bìo ó o ko ò o wé ká mu se ò o yí wó mu,
se ɓànso wó khon.