Ɓa kèrètĩ́ɛwa kuure ya-díwá
3
Bìo á ĩ mì ì na mia á láayi wi:
Nùpue na wi ò o wé o ya-dí ɓa kèrètĩ́ɛwa kuure yi,
wón wi ò o sá tonló na se.
2 O ya-dí ko ò o zũń míten ɓuaró à wékheró bìo yí mì lɛɛ́ yi.
O ko ò o wé hã́a yà-kéní ɓànso.
O wárá ko à hã wé se,
à wé o nùpue na bìo ɓúenɓúen ó o wee wé kã́ɲa,
á ɓa nùpua wee kɔ̃̀nbi.
O mún ko ò o zũń ɓa nì-hãní ɓuaró,
à zũń ɓa nùpua kàránló.
3 O yí ko ò o wé ɲa-ɲu,
o mún yí ko ò o wé nùpue na wa fio,
ɓùeé.
O sĩi ko le wé se,
à wé o nùpue na yí wa bíoní.
O yí ko ò o sòobá dé mí sĩi le wárí yi.
4 O ko ò o dàń mí zĩi nùpua ɓua,
ò o zàwa wé ɲí a cɔ̃́n,
à wé kɔ̃̀nbi o.
5 Ká a nùpue hĩ́a yí dà mí kùrú zĩi nùpua máa ɓua,
ó o ò wé kaka à dàń ǹ ɓuaráa ɓa kèrètĩ́ɛwa kuure?
6 O ya-dí yí ko ò o wé nùpue na sĩidéró o *Krista yi dĩǹ yí míana,
bèra a na o hĩ́a yí yòoní míten mu bìo yi,
à le Dónbeenì síiní a ɲúhṹ làa bìo le síiníanáa o Satãni ɲúhṹ bìo síi.
7 O ko ò o wé o nùpue na wee ɓua míten sese à bìa yínɔń ɓa kèrètĩ́ɛwa wé kɔ̃̀nbi o o wén-tentewà bìo yi,
bèra a na à bè-kohó bìo yí mì lɛɛ́ wo yi,
ò o Satãni hĩ́a yí yí o vĩ.
Ɓa kèrètĩ́ɛwa kuure ton-sáwá bìo
8 Ɓa kèrètĩ́ɛwa kuure ton-sáwá ko à ɓa wé ɓa nùpua na wee ɓua míten sese,
à yí wé ɲiní ɲun ɓànsowà.
Ɓa yí ko ɓa wé ɲu ho *dìvɛ̃́n dà mí níi wán,
à sòobá dé mí sĩi le wárí càró yi.
9 Le Dónbeenì tũ̀iá poni bíonì na le zéenía hã sĩadéró le yi dã́ní yi á ɓa ko ɓa wé bè yi lè le yi na wee ce.
10 Hen ká mi le mi ì lén nùpua á à wé lè ɓa kèrètĩ́ɛwa kuure ton-sáwá à mi loń ɓa ká fĩ́anì mía ɓa yi,
ká ɓa dà à sá ho tonló mu,
à mi wã́a ɓua bán.
11 Ɓa hã́nání ko à ɓa ɓua míten sese,
à yí wań hã nì-ɲùa.
Ɓa ko ɓa wé ɓa nùpua na bìo ɓúenɓúen ɓa wee wé kã́ɲa,
à láayi kɛń mu bìo ɓúenɓúen yi.
12 Ɓa kèrètĩ́ɛwa kuure ton-sá ko à ɓàn hã́a wé yà-kéní,
o ko ò o dàń mí zàwa lè mín zĩi nùpua ɓua.
13 Ɓa kèrètĩ́ɛwa kuure ton-sáwá na tonló se bán á ɓa nùpua wee kɔ̃̀nbi,
á ɓa poní á à sɛ́n á à bíoráa o Yeesu na ɓa dó mí sĩa yi bìo.
Mu bìo zũńló na wa wee yí o Krista yi cɔ̃́n
14 Ĩ wee leéka à ĩ ɓuen ũ cɔ̃́n hen làa cĩ́inú.
Ɛ̀ɛ ká ĩ wee túa bìo kà
15 bèra a na ká ĩ míana ɓuararáa à ũ pá zũń bìo á ũ ɓuaráa ũten ɓa kèrètĩ́ɛwa kuure yi.
Dén kuure so lé ɓa kèrètĩ́ɛwa zĩ-ɲúhṹ na bìo sã̀ le Dónbeenì yi.
Le kuure mu lé dìo sã́ ho tũ̀iá poni dĩ̀nía làa bìo á hã bòròbòròwa wé sĩ́náa le zĩi dĩ̀ní bìo síi,
lé lerɛ́n á ho tũ̀iá poni mu dĩ̀n wán.
16 Le Dónbeenì bè-sànkanii na le zéenía làa wɛn wa sĩadéró o Yeesu yi dã́ní yi ɓɛ̀ntĩ́n lée bè-beenì.
O Krista
ɓueé wó a nùpue,
á le Dónbeenì Hácírí vèenía wo zéeníanáa le o bìo bon.a
Ó o zéenía míten lè le Dónbeenì tonkarowà na ho wáayi.
O bìo buera nɔn hã sìíwà ɓúenɓúen yi.
Ho dĩ́míɲá yi á ɓa nùpua dó mí sĩa wo yi.
Le Dónbeenì yòonía wo á dó ho cùkú yi.