7
Wàn zàwa na á ĩ wa làa sòobɛ́ɛ,
bṹn bìowa so ɓúenɓúen á le Dónbeenì dó mi ɲii le mí ì wé.
Á bìo mu ka kà,
á mi le wa ceé wa sãnía lè wa yiwa.
Mi wa ɓua waten,
à bìo sĩ̀ le Dónbeenì yi,
à wé kɔ̃̀nbi le.
O Poole yi vɛ́ɛ yèrèmáa wó le sĩ-wɛɛ
2 Mi wań wɛn!
Wa yí wó yí khon làa nìi woon,
wa yí yáara a ɓúi bìo,
wa mún yí tò a ɓúi wán.
3 Ĩ yí bía bṹn à síinínáa mi ɲúná.
Ĩ yàá lá bía mu le wa ɓɛ̀ntĩ́n wa mia làa sòobɛ́ɛ.
À wa yìo wé lua,
tàá à wa hí,
se wa pá wa mia.
4 Ĩ ɓɛ̀ntĩ́n láa mia,
ĩ sĩi wan mi bìo yi làa sòobɛ́ɛ.
Le lònbee na wee yí mi ɓúenɓúen á ĩ sĩi here yi,
á wee zã̀maka.
5 Mu bon,
bìo wa ɓueé dɔ̃n ho Maseduana,
á wa yí yú vũńnà,
le lònbee lè mí sìíwà yú wɛn hen.
Ɓa nùpua wee pĩ́ wa bìo à kán wɛn,
wa yilera hɔ̃́n yí kará lòn-kéní
6 Hen ká a nùpue bàra tò,
à le Dónbeenì bĩní hení a sĩi.
O Tiite ɓuenló wa cɔ̃́n lé bṹn á le dĩ̀n wán heníanáa warɛ́n sĩa.
7 Mu yàá yínɔń bṹn mí dòn.
Bìo ó o Tiite ɓueé bía á mún henía wa sĩa.
O bía nɔn wɛn le mi henía mí sĩi,
o le mi sĩa vá làa sòobɛ́ɛ à mi bĩní mi mi,
le bìo mi wó làa mi khĩína á bĩnía yí sĩ mia,
le mi henía ĩ bìo.
Bìo á ĩ ɲá bṹn,
á ĩ sĩi wíokaa wan.
8 Hàrí ká ho vũahṹ na á ĩ túara nɔn mia á vɛ́ɛnía mi yiwa,
á ĩnɛ́n mu yí máa vá yi.
Mu lá dà à vá miì lé bìo á ĩ zũ le ĩ vɛ́ɛnía mi yiwa ho pɔ̃̀n-za dɛ̀ɛ yi,
9 ɛ̀ɛ ká ĩ màhã́ sĩi wan hã laà na kà wán.
Ĩ sĩi yí wan bìo á ĩ vɛ́ɛnía mi yiwa bìo yi.
Ĩ wee zã̀maka lé bìo mi yiwa vá hã wén-kora na mi wó bìo yi,
á pã́ hã día.
Le yi-vɛ́ɛ na yú mia kà,
lé le Dónbeenì wi à mu wé làa bṹn,
bèra a na à mi sĩa cĩ̀ mi wén-kora mu bìo yi à pĩ́ hã.
Ká mu wó kà,
se wa vũahṹ mu túaró yínɔń bìo na wa wó khon làa mia.
10 Ká a nùpue yi wee vá lé bìo mu lé le Dónbeenì sĩi bìo,
à dén yi-vɛ́ɛ so wé ò o yèrèmá mí yilera lè mí wárá,
lé bṹn wee na à le Dónbeenì kã̀ní ɓànso.
Dén yi-vɛ́ɛ so síi bìo máa vá wɛn.
Ɛ̀ɛ ká le yi-vɛ́ɛ na màhã́ ka làa bìa yí zũ le Dónbeenì yi-vɛ́ɛ bìo síi,
á wee ɓua a nùpue varáa mu húmú yi.
11 Mu bon,
mi yiwa na wee vá lé bìo mu lé le Dónbeenì sĩi bìo,
á mi wã́a loń bìo wó mia bìo kà wán.
Mi loń bìo mi nɔnnáa miten,
á yilera ɓúenɓúen yèrèmáa.
Mi wee bío sĩ̀ miten yi làa sòobɛ́ɛ.
Mi wee zéení bìo kà wán le mi yí wa mu bè-kora.
Mi wee cĩ̀í mi sĩa mu bìo yi.
Bìo lá dà à yí mia mu bìo yi á mi yàá zã́na.
Mi sĩa vá à mi bĩní mi mi,
á mi wi à mi bĩní wé le Dónbeenì sĩi bìo,
ká mi bé yìa wó mu bè-kohó.
Mi zéenía mu bìo cɛ̀rɛ̀ɛ yi le mi níní mía bṹn bìowa so wéeníi.
12 Ká ĩ túara ho vũahṹ nɔn mia,
se mu yínɔń yìa wó khon bìo yi,
á mu mún yínɔń yìa ɓa wó khonnáa bìo yi.
Ĩ túara ho bèra a na à bìo mi nɔnnáa miten wa bìo yi à bìo zũń wéréwéré le Dónbeenì yahó.
13 Lé bṹn bìo yi á wa yúráa le sĩ-heɓúee.
Mu bon,
mu yàá yínɔń bṹn mí dòn á wa sĩa hã̀ bìo yi.
Wa mún wee zã̀maka bìo ó o Tiite sĩi wan bìo yi,
lé bìo mi ɓúenɓúen hĩ̀ína a sĩi.
14 Ĩ khòonía mia o Tiite yìo yi,
á bìo ó o van mi cɔ̃́n bĩnía,
á mi ɓɛ̀n yí dó nìyio miì.
Bìo á bìo wa wee bío ɓúenɓúen lé ho tũ̀iá ponináa,
lé làa bṹn á bìo wa khòonía làa mia o Tiite yìo yi mún wóráa ho tũ̀iá.
15 Bìo ó o ɓuara mi cɔ̃́n á mi ɓuan wo se.
Mi bò a bíoní yi lè le sòobɛ́ɛ lè le kɔ̃̀nbii.
Hen ká a leékaa mu,
ò o wíoka wań mia.
16 Ĩ wee zã̀maka lé bìo á ĩ láa mia mu bìo ɓúenɓúen yi.