5
Wa zũ le ká le wizonle na wa sãnía na lé wa mànákã̀wa zĩní yáara,
á le Dónbeenì ì na hã sãnía wa nì-kéní kéníwà yi ho wáayi.
Hɔ̃́n mànákã̀wa zĩní so na á nùpue níi yí wó á à kɛń bĩ́n fɛ́ɛɛ.
2 Bìo kà wán á wa yiwa wee vá lé bìo wa wee cà mu lè wa sòobɛ́ɛ à le Dónbeenì na hã sãnía bè-fĩa mu wɛn ho wáayi.
3 Ká wa yú hɔ̃́n sãnía bè-fĩa so,
á wa mànákã̀wa máa wé bìo na wee hɛ́ɛka mí bírí á yí yú sãnía.
4 Mu bon,
Bìo wa wi hã sãnía na ka lòn zĩní yi á wa yiwa wee vá,
á lò wee be.
Wa yí le le Dónbeenì fé wa sãnía mí dòn,
ká wa wi à le wé hã làa bè-fĩa,
bèra a na à hã sãnía na à kɛń bĩ́n fɛ́ɛɛ à zo hã bè-kĩ́a na à hí lahó.
5 Le Dónbeenì mí bɛɛre lé dìo wíokaa wɛn bṹn bìo yi.
Le nɔn mí Hácírí wɛn à zéení le bìo le dó mí ɲii le mí ì na,
á le è na máa khí.
6 Lé bṹn bìo yi á wa yí máa tèé wa bàra,
ká wa ɲɔǹ zũ le bìo wa wi ho tá wán,
á wa dã́ní nàyi là a Ɲúhṹso.
7 Mu bon,
bìo wa wee ɓua lè waten á wa wee wé héha làa bìo wa dóráa wa sĩa le Dónbeenì yi,
ká mu yínɔń bìo wa wee mi lè wa yìo bìo yi.
8 Wa sĩa hereka,
á mu mún lá à wé sĩ wɛn à wa lé ho dĩ́míɲá na kà yi à vaa kɛɛní a Ɲúhṹso nìsã́ní.
9 Hàrí à wa kɛń ho dĩ́míɲá yi,
tàá à wa lɛ́n vaa kɛɛní a nìsã́ní,
se bìo wa màkóo wi yi lé ho wé bìo sĩ a yi.
10 Lé bìo wa ɓúenɓúen ko à wa khíi vaa dĩ̀n o *Krista yahó ò o cítí.
Ká wa wó mu bè-tente tàá ká wa wó mu bè-kora,
ó ò sàání wɛn á à héha làa bìo wa nì-kéní kéní wó ho dĩ́míɲá yi.
Wa lè le Dónbeenì bĩnía sĩ o Yeesu pànká yi
11 Bìo wa zũ a Ɲúhṹso kɔ̃̀nbii ɲúhṹ,
á wa wee bánbá à ɓa nùpua tà ho tũ̀iá poni.
Le Dónbeenì zũ wɛn binbirì,
á ĩ wee leéka le minɛ́n mún zũ mi mi sĩa yi.
12 Wa yí máa cà à wa zéení làa mia le mi ko mi tà wa bìo.
Bìo mí sĩa á à waráa wa bìo yi lé bṹn wa wee cà,
bèra a na à mi dàń bío sĩ́ bìa wee yòoní míten bìo ɓa karáa dã́ní yi,
ká bìo ɓa sĩa yi á ɓa yí máa loń.
13 Ká lé bìo wa wee wé lòn khéerowà,
lé le Dónbeenì yahó á wa wee wéráa mu.
Ká lé bìo wa wee wé lòn nùpua na ɲúná wi bĩ́n,
bṹn lé minɛ́n bìo yi.
14 O *Krista waminì pànká ɓùaa wa wán.
Wa láa mu yi le orɛ́n lé o nùpue nì-kéní na húrun ɓa nùpua ɓúenɓúen bìo yi,
á le Dónbeenì cɔ̃́n á wa ɓúenɓúen páanía húrun làa wo.
15 O húrun ɓa ɓúenɓúen bìo yi bèra a na à bìa yìo wi lua wé yí wé bìo sĩ ɓa yi,
ká ɓa wé wé bìo sĩ yìa húrun ɓa bìo yi,
á vèera.
16 Lé bṹn bìo yi,
á wa wã́a yí máa loń ɓa nùpua làa bìo wa wee mi làa ba à héha lè mu nìpomu.
Hàrí ká wa yánkaa wee loń o Yeesu yi làa bṹn bìo,
á hã laà na kà wán á wa wã́a yí máa loń wo yi làa bṹn.
17 Hen ká a nùpue páanía là a *Krista,
se wón ɓànso lée nì-fĩnle.
Mu bè-kĩ́a wã́a khĩína,
mu bìo ɓúenɓúen wã́a wó bè-fĩa.
18 Bṹn ɓúenɓúen lé le Dónbeenì wó mu.
O Krista pànká yi,
á le wó á warɛ́n làa de bĩnía sĩ,
á ho tonló na á le le wa sá,
lé ho wé à bìa ká mún wé sĩ làa de.
19 Mu bon,
o Krista pànká yi,
á le Dónbeenì nɔn le níi à ho dĩ́míɲása làa de bĩní wé sĩ.
Le wã́a yí máa loń ɓa nùpua ɓúenɓúen bè-kora yi.
Le le wa bío na ɓa nùpua na ká yi le ɓa bĩní wé sĩ làa mín.
20 Àwa,
á wa lé o Krista tonkarowà,
á wee lá le bíonì o Krista yèni yi.
Á mu ka lè mu lé le Dónbeenì mí bɛɛre dĩ̀n wa wán á wee bíoráa làa mia.
Wa wee ɓónɓóní mia o Krista yèni yi le mi día le le Dónbeenì làa mia bĩní wé sĩ.
21 O Krista yí wó mu bè-kohó yí mɔn,
à le Dónbeenì síinía a ɲúhṹ lòn bè-kora wéro bìo síi warɛ́n bìo yi,
bèra a na à wa wé ɓa nùpua na térénna le Dónbeenì yahó wa páaníló làa wo bìo yi.