Bìo ó o Poole buera ho Korɛnte yi
2
Wàn zàwa lè wàn hĩ́nni,
bìo á ĩnɛ́n ĩ bɛɛre ɓuara mi cɔ̃́n á ɓueé zéenía le Dónbeenì bìo na sà yi làa mia,
á ĩ yí bía làa mia làa bíoní na kokókaa.
Mu mún yínɔń ho dĩ́míɲá bè-zũńminì bíoní á ĩ bíaráa làa mia.
2 Ho pã̀ahṹ na á ĩ wi làa mia,
á bìo á ĩ lá wi à ĩ zéení làa mia yínɔń bè-veere ɓúi ká mu yínɔń o Yeesu *Krista bìo,
o Yeesu na ɓa ɓúaa ho *kùrùwá wán.
3 Ho pã̀ahṹ na ĩ ɓuara mi cɔ̃́n ká ĩ pànká mía,
á le zã́níi wi yi.
4 Ĩ bíoní làa bìo á ĩ kàránna lè ɓa nùpua á wi mí dòn lè ho dĩ́míɲása dɛn-sĩa bíoní na ɓa wee bío à ɓúeráa ɓa nùpua ɲúná.
Ká mu lé le Dónbeenì Hácírí pànká á zéenía mu làa mia le bìo á ĩ bía á bon.
5 Lé bṹn nɔn á mi sĩidéró le Dónbeenì yi á yí fárá ɓa nùpua bè-zũńminì wán,
ká ho fárá le Dónbeenì pànká wán.
Le Dónbeenì bè-zũńminì
6 Wa wee zéení mu bè-zũńminì lè ɓa kèrètĩ́ɛwa ɓúenɓúen na sĩidéró fárá tĩna o Yeesu *Krista yi,
bṹn bon.
Ɛ̀ɛ ká mu bè-zũńminì mu màhã́ yínɔń ho dĩ́míɲá bè-zũńminì.
Mu bè-zũńminì mu mún yínɔń ho dĩ́míɲá nì-beera bè-zũńminì.
Bán khíi hí ì vé.
7 Bìo á warɛ́n wee zéení lè ɓa nùpua lé le Dónbeenì bè-zũńminì na bìo sà ho dĩ́míɲása yi.
Mu bè-zũńminì mu bìo fèra wi le Dónbeenì sĩi yi hàrí ká ho dĩ́míɲá dĩǹ yí léra,
bèra a na à wa páaní le cùkú yi làa de.
8 Mu bè-zũńminì mu á ho dĩ́míɲá nì-beera yí zũ.
Ká ɓa lá zũna mu,
se ɓa yí ɓúaa o Ɲúhṹso na lé o cùkúso ho *kùrùwá wán.
9 Bìo kà lé bìo túara le Dónbeenì bíonì vũahṹ yi:
«Mu bìo na ó o nùpue dĩǹ yí mɔn,
á dĩǹ yí ɲá,
bìo na ó o nùpue yàá dĩǹ yí leékaa hùúu,
lé bṹn le Dónbeenì wíokaa á bàrá ká làa bìa wa le.»a
10 Bṹn bìo so á le Dónbeenì zéenía lè warɛ́n lè mí Hácírí.
Mu bon.
Le Dónbeenì Hácírí wee mi mu bìo ɓúenɓúen sese á zũń,
hàrí le Dónbeenì mí bɛɛre bìo na khĩína zoo sà yi.
11 O nùpue hácírí mí dòn lé dìo zũ hã yilera na wi o yi.
Lé làa bṹn síi á le Dónbeenì Hácírí mí dòn lé dìo ɓɛ̀n mún zũ le Dónbeenì yilera na wi le yi.
12 Le hácírí na warɛ́n yú á yínɔń ho dĩ́míɲá na kà hácírí,
ká dìo wa yú lé le Dónbeenì Hácírí.
Le Dónbeenì dó mí Hácírí mu wɛn,
à wa dàń zũńnáa mu sãamu na le wó làa wɛn.
13 Warɛ́n yí máa bío mu sãamu mu bìo yi lè ho dĩ́míɲá bè-zũńminì kàránló na wa yú.
Ɓùeé.
Wa wee bío mu sãamu mu bìo yi lè le Dónbeenì Hácírí bíoní na le wee zéení làa wɛn.
Lé kà síi á wa wee zéenínáa le Dónbeenì bìo yara lè le Dónbeenì Hácírí mu bíoní.
14 O nùpue na bò mí kùrú hácírí mɔ́n,
wón nùpue so yí dà máa tà bìo wee lé le Dónbeenì Hácírí cɔ̃́n.
Mu ka lòn bɔ̃́nbúmu ɓànso cɔ̃́n.
O yí dà máa zũń mu kúará.
Lé bìo le Dónbeenì Hácírí mí dòn lé dìo wee na ò o nùpue dàń cikon mu bìo.
15 Ká a nùpue na le Dónbeenì Hácírí wi yi,
wón wee dàń cikon mu bìo ɓúenɓúen,
ká nì-veere yí dà máa cikon bìo wi orɛ́n yi.
16 Làa bìo mu túararáa le Dónbeenì bíonì vũahṹ yi kà:
«Lée wée dà à zũń o Ɲúhṹso yilera?
Lée wée dà le zéeníi á à na a yi?»b
Ɛ̀ɛ ká warɛ́n na le Dónbeenì Hácírí wi yi,
bán yilera là a *Krista yilera lée dà-kéní.