Hebreo 1

HEBREO

KAG KAYABAWAN NI HESUS NAK ANAK IT DIOS

It katong unang panahon pa, maramong besesey ag sa iba't-ibang parayan kung kag Dios ay inggwa it gustong ipahadag sa ato mga ginikanan, Sida ay nagbisayay sa inra parayan sa mga propeta. 2 Pero ngasing nak mga huling adlaw, parayaney sa Ida Anak kag Ida pagbisaya sa ato, nak imaw Nida't gingbutang nak manugpanubli it tanan, ag parayan ra sa Ida ay Ida ingtuga kag tanan. 3 Sa Anak ra makikita kag kahimayaan it Dios. Ag aber ni-o kag ingpapakita it Dios ay imaw ra kag ingpapakita it Anak. Sida't nagtatatap sa tanang mga butang parayan sa Ida gamhanang bisaya.

Ag pagkatapos nak inghimoy Nida kag tanang kinahangyan pramas limpyuhon kita sa ato mga kasal-anan, Sida ay nag-ingkorey sa bandang tu-o it Makagagahom nak Dios sa langit. 4 Ngani, Sida ay gingbutang it Dios nak mas yabaw kisa mga anghel, kumo gingtaw-an Sida it pangayan it Dios nak mas yabaw kisa sa inra.

KAG KAYABAWAN NI HESUS SA MGA ANGHEL

Kag mga Bisaya it Dios sa Sagradong Kasuyatan

5 Dahil waya nak gador it aber usang anghel nak gingsilinggan it Dios nak,

“Ikawey kag Ako Anak,

ag ngasing Akoey apamatuuran nak Ako kag Imo Tatay,”

ag waya ra it anghel nak gingsilinggan it Dios nak,

“Ako kag Ida Tatay ag Sida kag Ako Anak.”

6 Ag tong gingparaya it Dios sa kalibutan kag Ida bugtong nak Anak, nagsiling Sida,

“Kag tanang kaanghelan it Dios ay dapat magdayaw sa Ida.”

7 Ugaling, tungor sa mga anghel ay kali kag ingsiling it Dios,

“Kag mga anghel nak nagsiserbisyo sa Ako

ay Ako inghihimong tuyar sa hangin ag mga rayab it kayado.”

8 Pero, tungor sa Ida Anak ay tuyar kag Ida ingsiling,

“Ikaw nak Dios, kag mahari hastang sa waya't katapusan

ag kag Imo pagiging hari ay magiging matarong nak gador.

9 “Ingpapalangga Nimo kag kaaduhan ag ginghahangitan Nimo kag kayainan.

Kada Ako nak Imo Dios kag nagpili sa Imo

pramas taw-an Ka it kasadyahan nak mas yabaw sa Imo mga kaibahan.”

10 Ag usa pang gingsiling it Dios sa Ida Anak ay,

“Magtuna sa kauna-unahan, Ikaw, GINO-O, kag inghalinan it tanan.

Ikaw ngani kag nagtuga it tanan sa kalibutan ag sa kalangitan.

11 Maabot kag adlaw kung sauno mawawagit kinang tanan,

pero Ikaw ay mapabilin hastang sa waya't katapusan.

Kinang tanan ay mayuyuma tuyar sa yamit

12 nak arolyuhon ag ipahabig pramas apang-islan.

Pero Ikaw ay inding gador magguyang

dahil kag Imo kabuhi ay waya't katapusan.”

13 Pero waya nak gador it aber usang anghel nak gingsilinggan it Dios pareho sa Ida gingsiling sa Ida Anak nak,

“Maley, ingkor rili sa Ako tu-o,

hastang humanon Nako nak tungtungan it Imo mga siki

kag Imo mga kaaway.”

14 Ay kung imaw kina, ni-o kag kahimtangan it mga anghel? Di baga sinra ay mga ispiritong nagsiserbisyo sa Dios nak Ida ingsusugong magbulig sa mga tawong Ida ingbuot nak maluwas?