Ya pinakapuun pari tamu buy ya bayun kasunduwan Bapan Namalyari
8
1 Mani mapatêl ku, ati ya labay sabin sinabi ku kamuyu. Pêtêg dilag kitaminan pinakapuun pari ya sabay ya nakaiknu sa wanan turonun Makapangyarian na Bapan Namalyari ya idi sa langit. 2 Bilang pinakapuun pari, maglingkud ya sa pêtêg Pinakabanal la Lugal ya alwan dinyag tawu nun a dinyag Bapan Namalyari.3 Ya balang pinakapuun pari baydi sa babun luta, intalaga amên mamiandug mani ayup pa pinaraya buy kaatag kaluub. Kabay ya pinakapuun pari tamu sa langit, kaylangan dilag ya êt iandug kan Bapan Namalyari. 4 Nu idi ya pun baydi sa babun luta, a ya malyarin magin pari gawan dilag gan mani pari ya mag-andug ayun sa Kautusan. 5 Ya paglingkud mani pari, kay kaparisun pandaygên sa langit. Tanda tamuy abiin gawan sên pan-ipaydêng ngan Moises ya Tolday Pangulimênan, masipit intipan Bapan Namalyari kanay, “Kaylangan sunulun muy palanuy impakit ku kamu sa bung-uy nu parasaantu mun daygên na Tolday Pangulimênan.”a 6 Nuwa ya mani pandaygên Jesus bilang pinakapuun pari, igit pun dakila kaysa sa mani pandaygên mani nunan pari baydi sa babun luta. Gawan sa kapamilatan Jesus, natanggap tamuy bayuy kasunduwan Bapan Namalyari. Buy ya bayuy kasunduwan, mas mangêd ya pun kaysa sa nuna gawan nakasalalay ya ati sa mas mangangêd da pangakun Bapan Namalyari.
7 Nu ayin dayin pamagkulang ya nunan kasunduwan, asina kaylangan na bayun kasunduwan. 8 Nuwa nakitan Bapan Namalyari ya taganan dilag pamagkulang ya panunul mani tawu sa nunan kasunduwan. Kabay sinabi na,
“Lumatêng nga panawun na
manyag gakun panibayun kasunduwan sa kaapuapuan Israel buy sa kaapuapuan Juda.
9 Ya bayuy kasunduwan, asê kaparisun nunan kasunduwan na dinyag ku para sa mani ninunu la
sabitun insalwang ku sila sa bansan Egipto.
A la sinunul la kasunduwan ku kalla.
Kabay pinaulayan ku sila.”
10 Sinabi pun êt Bapan Namalyari,
“Pallumatêng panawun na abitu,
ati ya bayuy kasunduwan ya daygên ku sa kaapuapuan Israel.
Idin ku sa bêkê lay mani utus ku
buy itatak ku sa isip la.
Sikuy kilalanên lan Namalyari la
buy silay mani tawuy sakup ku.
11 A layna kaylangan turwanan na mani kabalayan la
o sabin sa mapatêl la, ‘Mani mapatêl lay, sêpat yun kilalanên na Panginuun na sabay ya Namalyari.’
A layna kaylangan ituruy abiin,
gawan sa panawun abitu, kilalanên nakun kaganawan, matag-ay man o asê.
12 Gawan patawarên kuy mani kadawakan la
buy litêpên kuy mani kasalanan la.”b
13 Kabay sên sinabin Bapan Namalyari ya dilag gan bayuy kasunduwan, impakit nay tinasan nan ulagay nunan kasunduwan. Buy agyan dakun sabêt man na bagay ya ayin nan ulaga buy lumay na, asê mabuyutan, mitas sana.